விஷ்ணு பாதா³தி³ கேஶாந்த வர்ணன ஸ்தோத்ரம்

അവ്യാന്നിര്ഘാതഘോരോ ഹരിഭുജപവനാമര്ശനാധ്മാതമൂര്തേ- -രസ്മാന്വിസ്മേരനേത്രത്രിദശനുതിവചഃസാധുകാരൈഃ സുതാരഃ । സർവം സംഹര്തുമിച്ഛോരരികുലഭുവന സ്ഫാരവിഷ്ഫാരനാദഃ സംയത്കല്പാംതസിംധൌ ശരസലിലഘടാവാര്മുചഃ കാര്മുകസ്യ ॥ 3 ॥

ജീമൂതശ്യാമഭാസാ മുഹുരപി ഭഗവദ്ബാഹുനാ മോഹയംതീ യുദ്ധേഷൂദ്ധൂയമാനാ ഝടിതി തടിദിവാലക്ഷ്യതേ യസ്യ മൂര്തിഃ । സോഽസിസ്ത്രാസാകുലാക്ഷത്രിദശരിപുവപുഃശോണിതാസ്വാദതൃപ്തോ നിത്യാനംദായ ഭൂയാന്മധുമഥനമനോനംദനോ നംദകോ നഃ ॥ 4 ॥

കമ്രാകാരാ മുരാരേഃ കരകമലതലേനാനുരാഗാദ്ഗൃഹീതാ സമ്യഗ്വൃത്താ സ്ഥിതാഗ്രേ സപദി ന സഹതേ ദര്ശനം യാ പരേഷാമ് । രാജംതീ ദൈത്യജീവാസവമദമുദിതാ ലോഹിതാലേപനാര്ദ്രാ കാമം ദീപ്താംശുകാംതാ പ്രദിശതു ദയിതേവാസ്യ കൌമോദകീ നഃ ॥ 5 ॥

യോ വിശ്വപ്രാണഭൂതസ്തനുരപി ച ഹരേര്യാനകേതുസ്വരൂപോ യം സംചിംത്യൈവ സദ്യഃ സ്വയമുരഗവധൂവര്ഗഗര്ഭാഃ പതംതി । ചംചച്ചംഡോരുതുംഡത്രുടിതഫണിവസാരക്തപംകാംകിതസ്യം വംദേ ഛംദോമയം തം ഖഗപതിമമലസ്വര്ണവര്ണം സുപര്ണമ് ॥ 6 ॥

വിഷ്ണോർവിശ്വേശ്വരസ്യ പ്രവരശയനകൃത്സർവലോകൈകധര്താ സോഽനംതഃ സർവഭൂതഃ പൃഥുവിമലയശാഃ സർവവേദൈശ്ച വേദ്യഃ । പാതാ വിശ്വസ്യ ശശ്വത്സകലസുരരിപുധ്വംസനഃ പാപഹംതാ സർവജ്ഞഃ സർവസാക്ഷീ സകലവിഷഭയാത്പാതു ഭോഗീശ്വരോ നഃ ॥ 7 ॥

വാഗ്ഭൂഗൈര്യാദിഭേദൈർവിദുരിഹ മുനയോ യാം യദീയൈശ്ച പുംസാം കാരുണ്യാര്ദ്രൈഃ കടാക്ഷൈഃ സകൃദപി പതിതൈഃ സംപദഃ സ്യുഃ സമഗ്രാഃ । കുംദേംദുസ്വച്ഛമംദസ്മിതമധുരമുഖാംഭോരുഹാം സുംദരാംഗീം വംദേ വംദ്യാമശേഷൈരപി മുരഭിദുരോമംദിരാമിംദിരാം താമ് ॥ 8 ॥

യാ സൂതേ സത്ത്വജാലം സകലമപി സദാ സംനിധാനേന പുംസോ ധത്തേ യാ തത്ത്വയോഗാച്ചരമചരമിദം ഭൂതയേ ഭൂതജാതമ് । ധാത്രീം സ്ഥാത്രീം ജനിത്രീം പ്രകൃതിമവികൃതിം വിശ്വശക്തിം വിധാത്രീം വിഷ്ണോർവിശ്വാത്മനസ്താം വിപുലഗുണമയീം പ്രാണനാഥാം പ്രണൌമി ॥ 9 ॥

യേഭ്യോഽസൂയദ്ഭിരുച്ചൈഃ സപദി പദമുരു ത്യജ്യതേ ദൈത്യവര്ഗൈ- -ര്യേഭോ ധര്തും ച മൂര്ധ്നാ സ്പൃഹയതി സതതം സർവഗീർവാണവര്ഗഃ । നിത്യം നിര്മൂലയേയുര്നിചിതതരമമീ ഭക്തിനിഘ്നാത്മനാം നഃ പദ്മാക്ഷസ്യാംഘ്രിപദ്മദ്വയതലനിലയാഃ പാംസവഃ പാപപംകമ് ॥ 10 ॥

രേഖാ ലേഖാദിവംദ്യാശ്ചരണതലഗതാശ്ചക്രമത്സ്യാദിരൂപാഃ സ്നിഗ്ധാഃ സൂക്ഷ്മാഃ സുജാതാ മൃദുലലിതതരക്ഷൌമസൂത്രായമാണാഃ । ദദ്യുര്നോ മംഗളാനി ഭ്രമരഭരജുഷാ കോമലേനാബ്ധിജായാഃ കമ്രേണാമ്രേഡ്യമാനാഃ കിസലയമൃദുനാ പാണിനാ ചക്രപാണേഃ ॥ 11 ॥

യസ്മാദാക്രാമതോ ദ്യാം ഗരുഡമണിശിലാകേതുദംഡായമാനാ ദാശ്ച്യോതംതീ ബഭാസേ സുരസരിദമലാ വൈജയംതീവ കാംതാ । ഭൂമിഷ്ഠോ യസ്തഥാന്യോ ഭുവനഗൃഹബൃഹത്‍സ്തംഭശോഭാം ദധൌ നഃ പാതാമേതൌ പായോജോദരലലിതതലൌ പംകജാക്ഷസ്യ പാദൌ ॥ 12 ॥

ആക്രാമദ്ഭ്യാം ത്രിലോകീമസുരസുരപതീ തത്ക്ഷണാദേവ നീതൌ യാഭ്യാം വൈരോചനീംദ്രൌ യുഗപദപി വിപത്സംപദോരേകധാമഃ । താഭ്യാം താമ്രോദരാഭ്യാം മുഹുരഹമജിതസ്യാംചിതാഭ്യാമുഭാഭ്യാം പ്രാജ്യൈശ്വര്യപ്രദാഭ്യാം പ്രണതിമുപഗതഃ പാദപംകേരുഹാഭ്യാമ് ॥ 13 ॥

യേഭ്യോ വര്ണശ്ചതുര്ഥശ്ചരമത ഉദഭൂദാദിസര്ഗേ പ്രജാനാം സാഹസ്രീ ചാപി സംഖ്യാ പ്രകടമഭിഹിതാ സർവവേദേഷു യേഷാമ് । പ്രാപ്താ വിശ്വംഭരാ യൈരതിവിതതതനോർവിശ്വമൂര്തേർവിരാജോ വിഷ്ണോസ്തേഭ്യോ മഹദ്ഭ്യഃ സതതമപി നമോഽസ്ത്വംഘ്രിപംകേരുഹേഭ്യഃ ॥ 14 ॥

വിഷ്ണോഃ പാദദ്വയാഗ്രേ വിമലനഖമണിഭ്രാജിതാ രാജതേ യാ രാജീവസ്യേവ രമ്യാ ഹിമജലകണികാലംകൃതാഗ്രാ ദലാലീ । അസ്മാകം വിസ്മയാര്ഹാണ്യഖിലജനമന പ്രാര്ഥനീയാ ഹി സേയം ദദ്യാദാദ്യാനവദ്യാ തതിരതിരുചിരാ മംഗളാന്യംഗുളീനാമ് ॥ 15 ॥

യസ്യാം ദൃഷ്ട്വാമലായാം പ്രതികൃതിമമരാഃ സംഭവംത്യാനമംതഃ സേംദ്രാഃ സാംദ്രീകൃതേര്ഷ്യാസ്ത്വപരസുരകുലാശംകയാതംകവംതഃ । സാ സദ്യഃ സാതിരേകാം സകലസുഖകരീം സംപദം സാധയേന്ന- -ശ്ചംചച്ചാർവംശുചക്രാ ചരണനളിനയോശ്ചക്രപാണേര്നഖാലീ ॥ 16 ॥

പാദാംഭോജന്മസേവാസമവനതസുരവ്രാതഭാസ്വത്കിരീട- -പ്രത്യുപ്തോച്ചാവചാശ്മപ്രവരകരഗണൈശ്ചിംതിതം യദ്വിഭാതി । നമ്രാംഗാനാം ഹരേര്നോ ഹരിദുപലമഹാകൂര്മസൌംദര്യഹാരി- -ച്ഛായം ശ്രേയഃപ്രദായി പ്രപദയുഗമിദം പ്രാപയേത്പാപമംതമ് ॥ 17 ॥

ശ്രീമത്യൌ ചാരുവൃത്തേ കരപരിമലനാനംദഹൃഷ്ടേ രമായാഃ സൌംദര്യാഢ്യേംദ്രനീലോപലരചിതമഹാദംഡയോഃ കാംതിചോരേ । സൂരീംദ്രൈഃ സ്തൂയമാനേ സുരകുലസുഖദേ സൂദിതാരാതിസംഘേ ജംഘേ നാരായണീയേ മുഹുരപി ജയതാമസ്മദംഹോ ഹരംത്യൌ ॥ 18 ॥

സമ്യക്സാഹ്യം വിധാതും സമമിവ സതതം ജംഘയോഃ ഖിന്നയോര്യേ ഭാരീഭൂതോരുദംഡദ്വയഭരണകൃതോത്തംഭഭാവം ഭജേതേ । ചിത്താദര്ശം നിധാതും മഹിതമിവ സതാം തേ സമുദ്രായമാനേ വൃത്താകാരേ വിധത്താം ഹ്യദി മുദമജിതസ്യാനിശം ജാനുനീ നഃ ॥ 19 ॥

ദേവോ ഭീതിം വിധാതുഃ സപദി വിദധതൌ കൈടഭാഖ്യം മധും ചാ- -പ്യാരോപ്യാരൂഢഗർവാവധിജലധി യയോരാദിദൈത്യൌ ജഘാന । വൃത്താവന്യോന്യതുല്യൌ ചതുരമുപചയം ബിഭ്രതാവഭ്രനീലാ- -വൂരൂ ചാരൂ ഹരേസ്തൌ മുദമതിശയിനീം മാനസേ നോ വിധത്താമ് ॥ 20 ॥

പീതേന ദ്യോതതേ യച്ചതുരപരിഹിതേനാംബരേണാത്യുദാരം ജാതാലംകാരയോഗം ജലമിവ ജലധേര്ബാഡബാഗ്നിപ്രഭാഭിഃ । ഏതത്പാതിത്യദാന്നോ ജഘനമതിഘനാദേനസോ മാനനീയം സാതത്യേനൈവ ചേതോവിഷയമവതരത്പാതു പീതാംബരസ്യ ॥ 21 ॥

യസ്യാ ദാമ്നാ ത്രിധാമ്നോ ജഘനകലിതയാ ഭ്രാജതേഽംഗം യഥാബ്ധേ- -ര്മധ്യസ്ഥോ മംദരാദ്രിര്ഭുജഗപതിമഹാഭോഗസംനദ്ധമധ്യഃ । കാംചീ സാ കാംചനാഭാ മണിവരകിരണൈരുല്ലസദ്ഭിഃ പ്രദീപ്താ കല്യാം കള്യാണദാത്രീം മമ മതിമനിശം കമ്രരൂപാം കരോതു ॥ 22 ॥

ഉന്നമ്രം കമ്രമുച്ചൈരുപചിതമുദഭൂദ്യത്ര പത്രൈർവിചിത്രൈഃ പൂർവം ഗീർവാണപൂജ്യം കമലജമധുപസ്യാസ്പദം തത്പയോജമ് । യസ്മിന്നീലാശ്മനീലൈസ്തരലരുചിജലൈഃ പൂരിതേ കേലിബുദ്ധ്യാ നാലീകാക്ഷസ്യ നാഭീസരസി വസതു നശ്ചിത്തഹംസശ്ചിരായ ॥ 23 ॥

പാതാലം യസ്യ നാലം വലയമപി ദിശാം പത്രപംക്തീര്നഗേംദ്രാ- -ന്വിദ്വാംസഃ കേസരാലീർവിദുരിഹ വിപുലാം കര്ണികാം സ്വര്ണശൈലമ് । ഭൂയാദ്ഗായത്സ്വയംഭൂമധുകരഭവനം ഭൂമയം കാമദം നോ നാലീകം നാഭിപദ്മാകരഭവമുരു തന്നാഗശയ്യസ്യ ശൌരേഃ ॥ 24 ॥

ആദൌ കല്പസ്യ യസ്മാത്പ്രഭവതി വിതതം വിശ്വമേതദ്വികല്പൈഃ കല്പാംതേ യസ്യ ചാംത പ്രവിശതി സകലം സ്ഥാവരം ജംഗമം ച । അത്യംതാചിംത്യമൂര്തേശ്ചിരതരമജിതസ്യാംതരിക്ഷസ്വരൂപേ തസ്മിന്നസ്മാകമംതഃകരണമതിമുദാ ക്രീഡതാത്ക്രോഡഭാഗേ ॥ 25 ॥

കാംത്യംഭഃപൂരപൂര്ണേ ലസദസിതവലീഭംഗഭാസ്വത്തരംഗേ ഗംഭീരാകാരനാഭീചതുരതരമഹാവര്തശോഭിന്യുദാരേ । ക്രീഡത്വാനദ്വഹേമോദരനഹനമഹാബാഡബാഗ്നിപ്രഭാഢ്യേ കാമം ദാമോദരീയോദരസലിലനിധൌ ചിത്തമത്സ്യശ്ചിരം നഃ ॥ 26 ॥

നാഭീനാലീകമൂലാദധികപരിമളോന്മോഹിതാനാമലീനാം മാലാ നീലേവ യാംതീ സ്ഫുരതി രുചിമതീ വക്ത്രപദ്മോന്മുഖീ യാ । രമ്യാ സാ രോമരാജിര്മഹിതരുചികരീ മധ്യഭാഗസ്യ വിഷ്ണോ- -ശ്ചിത്തസ്ഥാ മാ വിരംസീച്ചിരതരമുചിതാം സാധയംതീ ശ്രിയം നഃ ॥ 27 ॥

സംസ്തീര്ണം കൌസ്തുഭാംശുപ്രസരകിസലയൈര്മുഗ്ധമുക്താഫലാഢ്യം ശ്രീവത്സോല്ലാസി ഫുല്ലപ്രതിനവവനമാലാംകി രാജദ്ഭുജാംതമ് । വക്ഷഃ ശ്രീവൃക്ഷകാംതം മധുകരനികരശ്യാമലം ശാര്ങ്ഗപാണേഃ സംസാരാധ്വശ്രമാര്തൈരുപവനമിവ യത്സേവിതം തത്പ്രപദ്യേ ॥ 28 ॥

കാംതം വക്ഷോ നിതാംതം വിദധദിവ ഗലം കാലിമാ കാലശത്രോ- -രിംദോര്ബിംബം യഥാംകോ മധുപ ഇവ തരോര്മംജരീം രാജതേ യഃ । ശ്രീമാന്നിത്യം വിധേയാദവിരലമിലിതഃ കൌസ്തുഭശ്രീപ്രതാനൈഃ ശ്രീവത്സഃ ശ്രീപതേഃ സ ശ്രിയ ഇവ ദയിതോ വത്സ ഉച്ചൈഃശ്രിയം നഃ ॥ 29 ॥

സംഭൂയാംഭോധിമധ്യാത്സപദി സഹജയാ യഃ ശ്രിയാ സംനിധത്തേ നീലേ നാരായണോരഃസ്ഥലഗഗനതലേ ഹാരതാരോപസേവ്യേ । ആശാഃ സർവാഃ പ്രകാശാ വിദധദപിദധച്ചാത്മഭാസാന്യതേജാ- -സ്യാശ്ചര്യസ്യാകരോ നോ ദ്യുമണിരിവ മണിഃ കൌസ്തുഭഃ സോഽസ്തുഭൂത്യൈ ॥ 30 ॥

യാ വായാവാനുകൂല്യാത്സരതി മണിരുചാ ഭാസമാനാ സമാനാ സാകം സാകംപമംസേ വസതി വിദധതീ വാസുഭദ്രം സുഭദ്രമ് । സാരം സാരംഗസംഘൈര്മുഖരിതകുസുമാ മേചകാംതാ ച കാംതാ മാലാ മാലാലിതാസ്മാന്ന വിരമതു സുഖൈര്യോജയംതീ ജയംതീ ॥ 31 ॥

ഹാരസ്യോരുപ്രഭാഭിഃ പ്രതിനവവനമാലാശുഭിഃ പ്രാംശുരൂപൈഃ ശ്രീഭിശ്ചാപ്യംഗദാനാം കബലിതരുചി യന്നിഷ്കഭാഭിശ്ച ഭാതി । ബാഹുല്യേനൈവ ബദ്ധാംജലിപുടമജിതസ്യാഭിയാചാമഹേ ത- -ദ്വംധാര്തിം ബാധതാം നോ ബഹുവിഹതികരീം ബംധുരം ബാഹുമൂലമ് ॥ 32 ॥

വിശ്വത്രാണൈകദീക്ഷാസ്തദനുഗുണഗുണക്ഷത്രനിര്മാണദക്ഷാഃ കര്താരോ ദുര്നിരൂപസ്ഫുടഗുണയശസാ കര്മണാമദ്ഭുതാനാമ് । ശാര്ങ്ഗം ബാണം കൃപാണം ഫലകമരിഗദേ പദ്മശംഖൌ സഹസ്രം ബിഭ്രാണാഃ ശസ്ത്രജാലം മമ ദധതു ഹരേര്ബാഹവോ മോഹഹാനിമ് ॥ 33 ॥

കംഠാകല്പോദ്ഗതൈര്യഃ കനകമയലസത്കുംഡലോത്ഥൈരുദാരൈ- -രുദ്യോതൈഃ കൌസ്തുഭസ്യാപ്യുരുഭിരുപചിതശ്ചിത്രവര്ണോ വിഭാതി । കംഠാശ്ലേഷേ രമായാഃ കരവലയപദൈര്മുദ്രിതേ ഭദ്രരൂപേ വൈകുംഠീയേഽത്ര കംഠേ വസതു മമ മതിഃ കുംഠഭാവം വിഹായ ॥ 34 ॥

പദ്മാനംദപ്രദാതാ പരിലസദരുണശ്രീപരീതാഗ്രഭാഗഃ കാലേ കാലേ ച കംബുപ്രവരശശധരാപൂരണേ യഃ പ്രവീണഃ । വക്ത്രാകാശാംതരസ്ഥസ്തിരയതി നിതരാം ദംതതാരൌഘശോഭാം ശ്രീഭര്തുര്ദംതവാസോദ്യുമണിരഘതമോനാശനായാസ്ത്വസൌ നഃ ॥ 35 ॥

നിത്യം സ്നേഹാതിരേകാന്നിജകമിതുരലം വിപ്രയോഗാക്ഷമാ യാ വക്ത്രേംദോരംതരാലേ കൃതവസതിരിവാഭാതി നക്ഷത്രരാജിഃ । ലക്ഷ്മീകാംതസ്യ കാംതാകൃതിരതിവിലസന്മുഗ്ധമുക്താവലിശ്രീ- -ര്ദംതാലീ സംതതം സാ നതിനുതിനിരതാനക്ഷതാന്രക്ഷതാന്നഃ ॥ 36 ॥

ബ്രഹ്മന്ബ്രഹ്മണ്യജിഹ്മാം മതിമപി കുരുഷേ ദേവ സംഭാവയേ ത്വാം ശംഭോ ശക്ര ത്രിലോകീമവസി കിമമരൈര്നാരദാദ്യാഃ സുഖം വഃ । ഇത്ഥം സേവാവനമ്രം സുരമുനിനികരം വീക്ഷ്യ വിഷ്ണോഃ പ്രസന്ന- -സ്യാസ്യേംദോരാസ്രവംതീ വരവചനസുധാഹ്ലാദയേന്മാനസം നഃ ॥ 37 ॥

കര്ണസ്ഥസ്വര്ണകമ്രോജ്ജ്വലമകരമഹാകുംഡലപ്രോതദീപ്യ- -ന്മാണിക്യശ്രീപ്രതാനൈഃ പരിമിലിതമലിശ്യാമലം കോമലം യത് । പ്രോദ്യത്സൂര്യാംശുരാജന്മരകതമുകുരാകാരചോരം മുരാരേ- -ര്ഗാഢാമാഗാമിനീം നഃ ശമയതു വിപദം ഗംഡയോര്മംഡലം തത് ॥ 38 ॥

വക്ത്രാംഭോജേ ലസംതം മുഹുരധരമണിം പക്വബിംബാഭിരാമം ദൃഷ്ട്വാ ദ്രഷ്ടും ശുകസ്യ സ്ഫുടമവതരതസ്തുംഡദംഡായതേ യഃ । ഘോണഃ ശോണീകൃതാത്മാ ശ്രവണയുഗളസത്കുംഡലോസ്രൈര്മുരാരേഃ പ്രാണാഖ്യസ്യാനിലസ്യ പ്രസരണസരണിഃ പ്രാണദാനായ നഃ സ്യാത് ॥ 39 ॥

ദിക്കാലൌ വേദയംതൌ ജഗതി മുഹുരിമൌ സംചരംതൌ രവീംദൂ ത്രൈലോക്യാലോകദീപാവഭിദധതി യയോരേവ രൂപം മുനീംദ്രാഃ । അസ്മാനബ്ജപ്രഭേ തേ പ്രചുരതരകൃപാനിര്ഭരം പ്രേക്ഷമാണേ പാതാമാതാമ്രശുക്ലാസിതരുചിരുചിരേ പദ്മനേത്രസ്യ നേത്രേ ॥ 40 ॥

പാതാത്പാതാലപാതാത്പതഗപതിഗതേര്ഭ്രൂയുഗം ഭുഗ്നമധ്യം യേനേഷച്ചാലിതേന സ്വപദനിയമിതാഃ സാസുരാ ദേവസംഘാഃ । നൃത്യല്ലാലാടരംഗേ രജനികരതനോരര്ധഖംഡാവദാതേ കാലവ്യാലദ്വയം വാ വിലസതി സമയാ വാലികാമാതരം നഃ ॥ 41 ॥

ലക്ഷ്മാകാരാലകാലിസ്ഫുരദലികശശാംകാര്ധസംദര്ശമീല- -ന്നേത്രാംഭോജപ്രബോധോത്സുകനിഭൃതതരാലീനഭൃംഗച്ഛടാഭേ । ലക്ഷ്മീനാഥസ്യ ലക്ഷ്യീകൃതവിബുധഗണാപാംഗബാണാസനാര്ധ- -ച്ഛായേ നോ ഭൂരിഭൂതിപ്രസവകുശലതേ ഭ്രൂലതേ പാലയേതാമ് ॥ 42 ॥

രൂക്ഷസ്മാരേക്ഷുചാപച്യുതശരനികരക്ഷീണലക്ഷ്മീകടാക്ഷ- -പ്രോത്ഫുല്ലത്പദ്മമാലാവിലസിതമഹിതസ്ഫാടികൈശാനലിംഗമ് । ഭൂയാദ്ഭൂയോ വിഭൂത്യൈ മമ ഭുവനപതേര്ഭ്രൂലതാദ്വംദ്വമധ്യാ- -ദുത്ഥം തത്പുംഡ്രമൂര്ധ്വം ജനിമരണതമഃഖംഡനം മംഡനം ച ॥ 43 ॥

പീഠീഭൂതാലകാംതേ കൃതമകുടമഹാദേവലിംഗപ്രതിഷ്ഠേ ലാലാടേ നാട്യരംഗേ വികടതരതടേ കൈടഭാരേശ്ചിരായ । പ്രോദ്ധാട്യൈവാത്മതംദ്രീപ്രകടപടകുടീം പ്രസ്ഫുരംതീം സ്ഫുടാംഗം പട്വീയം ഭാവനാഖ്യാം ചടുലമതിനടീ നാടികാം നാടയേന്നഃ ॥ 44 ॥

മാലാലീവാലിധാമ്നഃ കുവലയകലിതാ ശ്രീപതേഃ കുംതലാലീ കാലിംദ്യാരുഹ്യ മൂര്ധ്നോ ഗലതി ഹരശിരഃസ്വര്ധുനീസ്പര്ധയാ നു । രാഹുർവാ യാതി വക്ത്രം സകലശശികലാഭ്രാംതിലോലാംതരാത്മാ ലോകൈരാലോക്യതേ യാ പ്രദിശതു സതതം സാഖിലം മംഗളം നഃ ॥ 45 ॥

സുപ്താകാരാഃ പ്രസുപ്തേ ഭഗവതി വിബുധൈരപ്യദൃഷ്ടസ്വരൂപാ വ്യാപ്തവ്യോമാംതരാലാസ്തരലമണിരുചാ രംജിതാഃ സ്പഷ്ടഭാസഃ । ദേഹച്ഛായോദ്ഗമാഭാ രിപുവപുരഗുരുപ്ലോഷരോഷാഗ്നിധൂമ്യാഃ കേശാഃ കേശിദ്വിഷോ നോ വിദധതു വിപുലക്ലേശപാശപ്രണാശമ് ॥ 46 ॥

യത്ര പ്രത്യുപ്തരത്നപ്രവരപരിലസദ്ഭൂരിരോചിഷ്പ്രതാന- -സ്ഫൂര്ത്യാം മൂര്തിര്മുരാരേര്ദ്യുമണിശതചിതവ്യോമവദ്ദുര്നിരീക്ഷ്യാ । കുർവത്പാരേപയോധി ജ്വലദകൃശശിഖാഭാസ്വദൌർവാഗ്നിശംകാം ശശ്വന്നഃ ശര്മ ദിശ്യാത്കലികലുഷതമഃപാടനം തത്കിരീടമ് ॥ 47 ॥

ഭ്രാംത്വാ ഭ്രാംത്വാ യദംതസ്ത്രിഭുവനഗുരുരപ്യബ്ദകോടീരനേകാ ഗംതും നാംതം സമര്ഥോ ഭ്രമര ഇവ പുനര്നാഭിനാലീകനാലാത് । ഉന്മജ്ജന്നൂര്ജിതശ്രീസ്ത്രിഭുവനമപരം നിര്മമേ തത്സദൃക്ഷം ദേഹാംഭോധിഃ സ ദേയാന്നിരവധിരമൃതം ദൈത്യവിദ്വേഷിണോ നഃ ॥ 48 ॥

മത്സ്യഃ കൂര്മോ വരാഹോ നരഹരിണപതിർവാമനോ ജാമദഗ്ന്യഃ കാകുത്സ്ഥഃ കംസഘാതീ മനസിജവിജയീ യശ്ച കല്കിര്ഭവിഷ്യന് । വിഷ്ണോരംശാവതരാ ഭുവനഹിതകരാ ധര്മസംസ്ഥാപനാര്ഥാഃ പായാസുര്മാം ത ഏതേ ഗുരുതരകരുണാഭാരഖിന്നാശയാ യേ ॥ 49 ॥

യസ്മാദ്വാചോ നിവൃത്താഃ സമമപി മനസാ ലക്ഷണാമീക്ഷമാണാഃ സ്വാര്ഥാലാഭാത്പരാര്ഥവ്യപഗമകഥനശ്ലാഘിനോ വേദവാദാഃ । നിത്യാനംദം സ്വസംവിന്നിരവധിവിമലസ്വാംതസംക്രാംതബിംബ- -ച്ഛായാപത്യാപി നിത്യം സുഖയതി യമിനോ യത്തദവ്യാന്മഹോ നഃ ॥ 50 ॥

ആപാദാദാ ച ശീര്ഷാദ്വപുരിദമനഘം വൈഷ്ണവം യഃ സ്വചിത്തേ ധത്തേ നിത്യം നിരസ്താഖിലകലികലുഷ സംതതാംതഃ പ്രമോദമ് । ജുഹ്വജ്ജിഹ്വാകൃശാനൌ ഹരിചരിതഹവിഃ സ്തോത്രമംത്രാനുപാഠൈ- -സ്തത്പാദാംഭോരുഹാഭ്യാം സതതമപി നമസ്കുര്മഹേ നിര്മലാഭ്യാമ് ॥ 51 ॥

മോദാത്പാദാദികേശസ്തുതിമിതിരചിതാ കീര്തയിത്വാ ത്രിധാമ്ന പാദാബ്ജദ്വംദ്വസേവാസമയനതമതിര്മസ്തകേനാനമേദ്യ । ഉന്മുച്യൈവാത്മനൈനോനിചയകവചക പംചതാമേത്യ ഭാനോ- -ര്ബിംബാംതര്ഗോചര സ പ്രവിശതി പരമാനംദമാത്മസ്വരൂപമ് ॥ 52 ॥

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ ശ്രീ വിഷ്ണു പാദാദികേശാംതവര്ണണ സ്തോത്രം സംപൂര്ണമ് ।

Browse Related Categories: