అష్టావక్ర గీతా నవమోఽధ్యాయః

అష్టావక్ర ఉవాచ

కృతాకృతే చ ద్వంద్వాని కదా శాంతాని కస్య వా । ఏవం జ్ఞాత్వేహ నిర్వేదాద్ భవ త్యాగపరోఽవ్రతీ ॥ 9-1

కస్యాపి తాత ధన్యస్య లోకచేష్టావలోకనాత్ । జీవితేచ్ఛా బుభుక్షా చ బుభుత్సోపశమం గతాః ॥ 9-2॥

అనిత్యం సర్వమేవేదం తాపత్రితయదూషితమ్ । అసారం నిందితం హేయమితి నిశ్చిత్య శామ్యతి ॥ 9-3॥

కోఽసౌ కాలో వయః కిం వా యత్ర ద్వంద్వాని నో నృణామ్ । తాన్యుపేక్ష్య యథాప్రాప్తవర్తీ సిద్ధిమవాప్నుయాత్ ॥ 9-4॥

నానా మతం మహర్షీణాం సాధూనాం యోగినాం తథా । దృష్ట్వా నిర్వేదమాపన్నః కో న శామ్యతి మానవః ॥ 9-5॥

కృత్వా మూర్తిపరిజ్ఞానం చైతన్యస్య న కిం గురుః । నిర్వేదసమతాయుక్త్యా యస్తారయతి సంసృతేః ॥ 9-6॥

పశ్య భూతవికారాంస్త్వం భూతమాత్రాన్ యథార్థతః । తత్క్షణాద్ బంధనిర్ముక్తః స్వరూపస్థో భవిష్యసి ॥ 9-7॥

వాసనా ఏవ సంసార ఇతి సర్వా విముంచ తాః । తత్త్యాగో వాసనాత్యాగాత్స్థితిరద్య యథా తథా ॥ 9-8॥