నారాయణీయం దశక 51 - అఘాసురవధం

కదాచన వ్రజశిశుభిః సమం భవాన్ వనాశనే విహితమతిః ప్రగేతరామ్ । సమావృతో బహుతరవత్సమండలైః సతేమనైర్నిరగమదీశ జేమనైః ॥1॥

వినిర్యతస్తవ చరణాంబుజద్వయా- దుదంచితం త్రిభువనపావనం రజః । మహర్షయః పులకధరైః కలేబరై- రుదూహిరే ధృతభవదీక్షణోత్సవాః ॥2॥

ప్రచారయత్యవిరలశాద్వలే తలే పశూన్ విభో భవతి సమం కుమారకైః । అఘాసురో న్యరుణదఘాయ వర్తనీ భయానకః సపది శయానకాకృతిః ॥3॥

మహాచలప్రతిమతనోర్గుహానిభ- ప్రసారితప్రథితముఖస్య కాననే । ముఖోదరం విహరణకౌతుకాద్గతాః కుమారకాః కిమపి విదూరగే త్వయి ॥4॥

ప్రమాదతః ప్రవిశతి పన్నగోదరం క్వథత్తనౌ పశుపకులే సవాత్సకే । విదన్నిదం త్వమపి వివేశిథ ప్రభో సుహృజ్జనం విశరణమాశు రక్షితుమ్ ॥5॥

గలోదరే విపులితవర్ష్మణా త్వయా మహోరగే లుఠతి నిరుద్ధమారుతే । ద్రుతం భవాన్ విదలితకంఠమండలో విమోచయన్ పశుపపశూన్ వినిర్యయౌ ॥6॥

క్షణం దివి త్వదుపగమార్థమాస్థితం మహాసురప్రభవమహో మహో మహత్ । వినిర్గతే త్వయి తు నిలీనమంజసా నభఃస్థలే ననృతురథో జగుః సురాః ॥7॥

సవిస్మయైః కమలభవాదిభిః సురై- రనుద్రుతస్తదను గతః కుమారకైః । దినే పునస్తరుణదశాముపేయుషి స్వకైర్భవానతనుత భోజనోత్సవమ్ ॥8॥