నారాయణీయం దశక 8 - ప్రలయవర్ణనం

ഏവം താവത് പ്രാകൃതപ്രക്ഷയാംതേ ബ്രാഹ്മേ കല്പേ ഹ്യാദിമേ ലബ്ധജന്മാ । ബ്രഹ്മാ ഭൂയസ്ത്വത്ത ഏവാപ്യ വേദാന് സൃഷ്ടിം ചക്രേ പൂർവകല്പോപമാനാമ് ॥1॥

സോഽയം ചതുര്യുഗസഹസ്രമിതാന്യഹാനി താവന്മിതാശ്ച രജനീര്ബഹുശോ നിനായ । നിദ്രാത്യസൌ ത്വയി നിലീയ സമം സ്വസൃഷ്ടൈ- ര്നൈമിത്തികപ്രലയമാഹുരതോഽസ്യ രാത്രിമ് ॥2॥

അസ്മാദൃശാം പുനരഹര്മുഖകൃത്യതുല്യാം സൃഷ്ടിം കരോത്യനുദിനം സ ഭവത്പ്രസാദാത് । പ്രാഗ്ബ്രാഹ്മകല്പജനുഷാം ച പരായുഷാം തു സുപ്തപ്രബോധനസമാസ്തി തദാഽപി സൃഷ്ടിഃ ॥3॥

പംചാശദബ്ദമധുനാ സ്വവയോര്ധരൂപ- മേകം പരാര്ധമതിവൃത്യ ഹി വര്തതേഽസൌ । തത്രാംത്യരാത്രിജനിതാന് കഥയാമി ഭൂമന് പശ്ചാദ്ദിനാവതരണേ ച ഭവദ്വിലാസാന് ॥4॥

ദിനാവസാനേഽഥ സരോജയോനിഃ സുഷുപ്തികാമസ്ത്വയി സന്നിലില്യേ । ജഗംതി ച ത്വജ്ജഠരം സമീയു- സ്തദേദമേകാര്ണവമാസ വിശ്വമ് ॥5॥

തവൈവ വേഷേ ഫണിരാജി ശേഷേ ജലൈകശേഷേ ഭുവനേ സ്മ ശേഷേ । ആനംദസാംദ്രാനുഭവസ്വരൂപഃ സ്വയോഗനിദ്രാപരിമുദ്രിതാത്മാ ॥6॥

കാലാഖ്യശക്തിം പ്രലയാവസാനേ പ്രബോധയേത്യാദിശതാ കിലാദൌ । ത്വയാ പ്രസുപ്തം പരിസുപ്തശക്തി- വ്രജേന തത്രാഖിലജീവധാമ്നാ ॥7॥

ചതുര്യുഗാണാം ച സഹസ്രമേവം ത്വയി പ്രസുപ്തേ പുനരദ്വിതീയേ । കാലാഖ്യശക്തിഃ പ്രഥമപ്രബുദ്ധാ പ്രാബോധയത്ത്വാം കില വിശ്വനാഥ ॥8॥