శరభేశాష్టకం

శ్రీ శివ ఉవాచ

శృణు దేవి మహాగుహ్యం పరం పుణ్యవివర్ధనం . శరభేశాష్టకం మంత్రం వక్ష్యామి తవ తత్త్వతః ॥

ఋషిన్యాసాదికం యత్తత్సర్వపూర్వవదాచరేత్ . ధ్యానభేదం విశేషేణ వక్ష్యామ్యహమతః శివే ॥

ధ్యానం

జ్వలనకుటిలకేశం సూర్యచంద్రాగ్నినేత్రం నిశితతరనఖాగ్రోద్ధూతహేమాభదేహమ్ । శరభమథ మునీంద్రైః సేవ్యమానం సితాంగం ప్రణతభయవినాశం భావయేత్పక్షిరాజమ్ ॥

అథ స్తోత్రం

దేవాదిదేవాయ జగన్మయాయ శివాయ నాలీకనిభాననాయ । శర్వాయ భీమాయ శరాధిపాయ నమోఽస్తు తుభ్యం శరభేశ్వరాయ ॥ 1 ॥

హరాయ భీమాయ హరిప్రియాయ భవాయ శాంతాయ పరాత్పరాయ । మృడాయ రుద్రాయ విలోచనాయ నమోఽస్తు తుభ్యం శరభేశ్వరాయ ॥ 2 ॥

శీతాంశుచూడాయ దిగంబరాయ సృష్టిస్థితిధ్వంసనకారణాయ । జటాకలాపాయ జితేంద్రియాయ నమోఽస్తు తుభ్యం శరభేశ్వరాయ ॥ 3 ॥