अरुणाचल अष्टकम्

दर्शनादभ्रसदसि जननात्कमलालये । काश्यां तु मरणान्मुक्तिः स्मरणादरुणाचले ॥ 1 ॥

करुणापूरितापांगं शरणागतवत्सलम् । तरुणेंदुजटामौलिं स्मरणादरुणाचलम् ॥ 2 ॥

समस्तजगदाधारं सच्चिदानंदविग्रहम् । सहस्ररथसोपेतं स्मरणादरुणाचलम् ॥ 3 ॥

कांचनप्रतिमाभासं वांछितार्थफलप्रदम् । मां च रक्ष सुराध्यक्षं स्मरणादरुणाचलम् ॥ 4 ॥

बद्धचंद्रजटाजूटमर्धनारीकलेबरम् । वर्धमानदयांभोधिं स्मरणादरुणाचलम् ॥ 5 ॥

कांचनप्रतिमाभासं सूर्यकोटिसमप्रभम् । बद्धव्याघ्रपुरीध्यानं स्मरणादरुणाचलम् ॥ 6 ॥

शिक्षयाखिलदेवारि भक्षितक्ष्वेलकंधरम् । रक्षयाखिलभक्तानां स्मरणादरुणाचलम् ॥ 7 ॥

अष्टभूतिसमायुक्तमिष्टकामफलप्रदम् । शिष्टभक्तिसमायुक्तान् स्मरणादरुणाचलम् ॥ 8 ॥

विनायकसुराध्यक्षं विष्णुब्रह्मेंद्रसेवितम् । विमलारुणपादाब्जं स्मरणादरुणाचलम् ॥ 9 ॥