ഗീതഗോവിംദം നവമഃ സര്ഗഃ - മംദ മുകുംദഃ

॥ നവമഃ സര്ഗഃ ॥ ॥ മംദമുകുംദഃ ॥

താമഥ മന്മഥഖിന്നാം രതിരസഭിന്നാം വിഷാദസംപന്നാമ് । അനുചിംതിതഹരിചരിതാം കലഹാംതരിതമുവാച സഖീ ॥ 51 ॥

॥ ഗീതം 18 ॥

ഹരിരഭിസരതി വഹതി മധുപവനേ । കിമപരമധികസുഖം സഖി ഭുവനേ ॥ മാധവേ മാ കുരു മാനിനി മാനമയേ ॥ 1 ॥

താലഫലാദപി ഗുരുമതിസരസമ് । കിം വിഫലീകുരുഷേ കുചകലശമ് ॥ 2 ॥

കതി ന കഥിതമിദമനുപദമചിരമ് । മാ പരിഹര ഹരിമതിശയരുചിരമ് ॥ 3 ॥

കിമിതി വിഷീദസി രോദിഷി വികലാ । വിഹസതി യുവതിസഭാ തവ സകലാ ॥ 4 ॥

സജലനലിനീദലശീതലശയനേ । ഹരിമവലോക്യ സഫലയ് നയനേ ॥ 5 ॥

ജനയസി മനസി കിമിതി ഗുരുഖേദമ് । ശൃണു മമ വചനമനീഹിതഭേദമ് ॥ 6 ॥

ഹരിരുപയാതു വദതു ബഹുമധുരമ് । കിമിതി കരോഷി ഹൃദയമതിവിധുരമ് ॥ 7 ॥