നാരായണ കവചമ്

ശ്രീ ശുക ഉവാച

വൃതഃ പുരോഹിതസ്ത്വാഷ്ട്രോ മഹേംദ്രായാനുപൃച്ഛതേ । നാരായണാഖ്യം വര്മാഹ തദിഹൈകമനാഃ ശൃണു ॥ 3

ശ്രീവിശ്വരൂപ ഉവാച

ധൌതാംഘ്രിപാണിരാചമ്യ സപവിത്ര ഉദങ്മുഖഃ । കൃതസ്വാംഗകരന്യാസോ മംത്രാഭ്യാം വാഗ്യതഃ ശുചിഃ ॥ 4

നാരായണമയം വര്മ സന്നഹ്യേദ്ഭയ ആഗതേ । ദൈവഭൂതാത്മകര്മഭ്യോ നാരായണമയഃ പുമാന് ॥ 5 ॥

പാദയോര്ജാനുനോരൂർവോരുദരേ ഹൃദ്യഥോരസി । മുഖേ ശിരസ്യാനുപൂർവ്യാദോംകാരാദീനി വിന്യസേത് ॥ 6 ॥

ഓം നമോ നാരായണായേതി വിപര്യയമഥാപി വാ । കരന്യാസം തതഃ കുര്യാദ്ദ്വാദശാക്ഷരവിദ്യയാ ॥ 7 ॥

പ്രണവാദിയകാരാംതമംഗുല്യംഗുഷ്ഠപർവസു । ന്യസേദ്ധൃദയ ഓംകാരം വികാരമനു മൂര്ധനി ॥ 8 ॥

ഷകാരം തു ഭ്രുവോര്മധ്യേ ണകാരം ശിഖയാ ന്യസേത് । വേകാരം നേത്രയോര്യുംജ്യാന്നകാരം സർവസംധിഷു ॥ 9 ॥

മകാരമസ്ത്രമുദ്ദിശ്യ മംത്രമൂര്തിര്ഭവേദ്ബുധഃ । സവിസര്ഗം ഫഡംതം തത്സർവദിക്ഷു വിനിര്ദിശേത് ॥ 10 ॥

ഓം വിഷ്ണവേ നമഃ ॥

ഇത്യാത്മാനം പരം ധ്യായേദ്ധ്യേയം ഷട്ഛക്തിഭിര്യുതമ് । വിദ്യാതേജസ്തപോമൂര്തിമിമം മംത്രമുദാഹരേത് ॥ 11 ॥

ഓം ഹരിർവിദധ്യാന്മമ സർവരക്ഷാം ന്യസ്താംഘ്രിപദ്മഃ പതഗേംദ്ര പൃഷ്ഠേ । ദരാരിചര്മാസിഗദേഷുചാപ- -പാശാംദധാനോഽഷ്ടഗുണോഽഷ്ടബാഹുഃ ॥ 12 ॥

ജലേഷു മാം രക്ഷതു മത്സ്യമൂര്തി- -ര്യാദോഗണേഭ്യോ വരുണസ്യ പാശാത് । സ്ഥലേഷു മായാവടുവാമനോഽവ്യാ- -ത്ത്രിവിക്രമഃ ഖേഽവതു വിശ്വരൂപഃ ॥ 13 ॥

ദുര്ഗേഷ്വടവ്യാജിമുഖാദിഷു പ്രഭുഃ പായാന്നൃസിംഹോഽസുരയൂഥപാരിഃ । വിമുംചതോ യസ്യ മഹാട്ടഹാസം ദിശോ വിനേദുര്ന്യപതംശ്ച ഗര്ഭാഃ ॥ 14 ॥

രക്ഷത്വസൌ മാധ്വനി യജ്ഞകല്പഃ സ്വദംഷ്ട്രയോന്നീതധരോ വരാഹഃ । രാമോഽദ്രികൂടേഷ്വഥ വിപ്രവാസേ സലക്ഷ്മണോഽവ്യാദ്ഭരതാഗ്രജോഽസ്മാന് ॥ 15 ॥

മാമുഗ്രധര്മാദഖിലാത്പ്രമാദാ- -ന്നാരായണഃ പാതു നരശ്ച ഹാസാത് । ദത്തസ്ത്വയോഗാദഥ യോഗനാഥഃ പായാദ്ഗുണേശഃ കപിലഃ കര്മബംധാത് ॥ 16 ॥

സനത്കുമാരോഽവതു കാമദേവാ- -ദ്ധയാനനോ മാം പഥി ദേവഹേലനാത് । ദേവര്ഷിവര്യഃ പുരുഷാര്ചനാംതരാ- -ത്കൂര്മോ ഹരിര്മാം നിരയാദശേഷാത് ॥ 17 ॥

ധന്വംതരിര്ഭഗവാന്പാത്വപഥ്യാ- -ദ്ദ്വംദ്വാദ്ഭയാദൃഷഭോ നിര്ജിതാത്മാ । യജ്ഞശ്ച ലോകാദവതാജ്ജനാംതാ- -ദ്ബലോ ഗണാത്ക്രോധവശാദഹീംദ്രഃ ॥ 18 ॥

ദ്വൈപായനോ ഭഗവാനപ്രബോധാ- -ദ്ബുദ്ധസ്തു പാഷംഡഗണാത്പ്രമാദാത് । കല്കിഃ കലേഃ കാലമലാത്പ്രപാതു ധര്മാവനായോരുകൃതാവതാരഃ ॥ 19 ॥

മാം കേശവോ ഗദയാ പ്രാതരവ്യാ- -ദ്ഗോവിംദ ആസംഗവമാത്തവേണുഃ । നാരായണഃ പ്രാഹ്ണ ഉദാത്തശക്തി- -ര്മധ്യംദിനേ വിഷ്ണുരരീംദ്രപാണിഃ ॥ 20 ॥

ദേവോഽപരാഹ്ണേ മധുഹോഗ്രധന്വാ സായം ത്രിധാമാവതു മാധവോ മാമ് । ദോഷേ ഹൃഷീകേശ ഉതാര്ധരാത്രേ നിശീഥ ഏകോഽവതു പദ്മനാഭഃ ॥ 21 ॥

ശ്രീവത്സധാമാ¶രാത്ര ഈശഃ പ്രത്യുഷ ഈശോഽസിധരോ ജനാര്ദനഃ । ദാമോദരോഽവ്യാദനുസംധ്യം പ്രഭാതേ വിശ്വേശ്വരോ ഭഗവാന്കാലമൂര്തിഃ ॥ 22 ॥

ചക്രം യുഗാംതാനലതിഗ്മനേമി ഭ്രമത്സമംതാദ്ഭഗവത്പ്രയുക്തമ് । ദംദഗ്ധി ദംദഗ്ധ്യരിസൈന്യമാശു കക്ഷം യഥാ വാതസഖോ ഹുതാശഃ ॥ 23 ॥

ഗദേഽശനിസ്പര്ശനവിസ്ഫുലിംഗേ നിഷ്പിംഢി നിഷ്പിംഢ്യജിതപ്രിയാസി । കൂഷ്മാംഡവൈനായകയക്ഷരക്ഷോ ഭൂതഗ്രഹാംശ്ചൂര്ണയ ചൂര്ണയാരീന് ॥ 24 ॥

ത്വം യാതുധാനപ്രമഥപ്രേതമാതൃ- -പിശാചവിപ്രഗ്രഹഘോരദൃഷ്ടീന് । ദരേംദ്ര വിദ്രാവയ കൃഷ്ണപൂരിതോ ഭീമസ്വനോഽരേര്ഹൃദയാനി കംപയന് ॥ 25 ॥

ത്വം തിഗ്മധാരാസിവരാരിസൈന്യ- -മീശപ്രയുക്തോ മമ ഛിംധി ഛിംധി । ചക്ഷൂംഷി ചര്മന് ശതചംദ്ര ഛാദയ ദ്വിഷാമഘോനാം ഹര പാപചക്ഷുഷാമ് ॥ 26 ॥

യന്നോ ഭയം ഗ്രഹേഭ്യോഽഭൂത്കേതുഭ്യോ നൃഭ്യ ഏവ ച । സരീസൃപേഭ്യോ ദംഷ്ട്രിഭ്യോ ഭൂതേഭ്യോഽഘേഭ്യ ഏവ ച ॥ 27 ॥

സർവാണ്യേതാനി ഭഗവന്നാമരൂപാസ്ത്രകീര്തനാത് । പ്രയാംതു സംക്ഷയം സദ്യോ യേ നഃ ശ്രേയഃപ്രതീപകാഃ ॥ 28 ॥

ഗരുഡോ ഭഗവാന് സ്തോത്രസ്തോമശ്ഛംദോമയഃ പ്രഭുഃ । രക്ഷത്വശേഷകൃച്ഛ്രേഭ്യോ വിഷ്വക്സേനഃ സ്വനാമഭിഃ ॥ 29 ॥

സർവാപദ്ഭ്യോ ഹരേര്നാമരൂപയാനായുധാനി നഃ । ബുദ്ധീംദ്രിയമനഃപ്രാണാന്പാംതു പാര്ഷദഭൂഷണാഃ ॥ 30 ॥

യഥാ ഹി ഭഗവാനേവ വസ്തുതഃ സദസച്ച യത് । സത്യേനാനേന നഃ സർവേ യാംതു നാശമുപദ്രവാഃ ॥ 31 ॥

യഥൈകാത്മ്യാനുഭാവാനാം വികല്പരഹിതഃ സ്വയമ് । ഭൂഷണായുധലിംഗാഖ്യാ ധത്തേ ശക്തീഃ സ്വമായയാ ॥ 32 ॥

തേനൈവ സത്യമാനേന സർവജ്ഞോ ഭഗവാന് ഹരിഃ । പാതു സർവൈഃ സ്വരൂപൈര്നഃ സദാ സർവത്ര സർവഗഃ ॥ 33 ॥

വിദിക്ഷു ദിക്ഷൂര്ധ്വമധഃ സമംതാ- -ദംതര്ബഹിര്ഭഗവാന്നാരസിംഹഃ । പ്രഹാപയഁല്ലോകഭയം സ്വനേന സ്വതേജസാ ഗ്രസ്തസമസ്തതേജാഃ ॥ 34 ॥

മഘവന്നിദമാഖ്യാതം വര്മ നാരായണാത്മകമ് । വിജേഷ്യസ്യംജസാ യേന ദംശിതോഽസുരയൂഥപാന് ॥ 35 ॥

ഏതദ്ധാരയമാണസ്തു യം യം പശ്യതി ചക്ഷുഷാ । പദാ വാ സംസ്പൃശേത്സദ്യഃ സാധ്വസാത്സ വിമുച്യതേ ॥ 36 ॥

ന കുതശ്ചിദ്ഭയം തസ്യ വിദ്യാം ധാരയതോ ഭവേത് । രാജദസ്യുഗ്രഹാദിഭ്യോ വ്യാധ്യാദിഭ്യശ്ച കര്ഹിചിത് ॥ 37 ॥

ഇമാം വിദ്യാം പുരാ കശ്ചിത്കൌശികോ ധാരയന് ദ്വിജഃ । യോഗധാരണയാ സ്വാംഗം ജഹൌ സ മരുധന്വനി ॥ 38 ॥

തസ്യോപരി വിമാനേന ഗംധർവപതിരേകദാ । യയൌ ചിത്രരഥഃ സ്ത്രീഭിർവൃതോ യത്ര ദ്വിജക്ഷയഃ ॥ 39 ॥

ഗഗനാന്ന്യപതത്സദ്യഃ സവിമാനോ ഹ്യവാക്ഛിരാഃ । സ വാലഖില്യവചനാദസ്ഥീന്യാദായ വിസ്മിതഃ । പ്രാപ്യ പ്രാച്യാം സരസ്വത്യാം സ്നാത്വാ ധാമ സ്വമന്വഗാത് ॥ 40 ॥

ശ്രീ ശുക ഉവാച

യ ഇദം ശൃണുയാത്കാലേ യോ ധാരയതി ചാദൃതഃ । തം നമസ്യംതി ഭൂതാനി മുച്യതേ സർവതോ ഭയാത് ॥ 41

ഏതാം വിദ്യാമധിഗതോ വിശ്വരൂപാച്ഛതക്രതുഃ । ത്രൈലോക്യലക്ഷ്മീം ബുഭുജേ വിനിര്ജിത്യ മൃധേഽസുരാന് ॥ 42 ॥

ഇതി ശ്രീമദ്ഭാഗവതേ മഹാപുരാണേ ഷഷ്ഠസ്കംധേ നാരായണവര്മോപദേശോ നാമാഷ്ടമോഽധ്യായഃ ।

Browse Related Categories: