Vishnu · Traditional devotional text · Source: vignanam.org (Traditional devotional text (public-domain shlokas))
ദക്ഷോ വിരിംചതനയോഽഥ മനോസ്തനൂജാം ലബ്ധ്വാ പ്രസൂതിമിഹ ഷോഡശ ചാപ കന്യാഃ । ധര്മേ ത്രയോദശ ദദൌ പിതൃഷു സ്വധാം ച സ്വാഹാം ഹവിര്ഭുജി സതീം ഗിരിശേ ത്വദംശേ ॥1॥
മൂര്തിര്ഹി ധര്മഗൃഹിണീ സുഷുവേ ഭവംതം നാരായണം നരസഖം മഹിതാനുഭാവമ് । യജ്ജന്മനി പ്രമുദിതാഃ കൃതതൂര്യഘോഷാഃ പുഷ്പോത്കരാന് പ്രവവൃഷുര്നുനുവുഃ സുരൌഘാഃ ॥2॥
Offered for worship and study, not as prediction. Non-commercial.
More devotional texts
ദൈത്യം സഹസ്രകവചം കവചൈഃ പരീതം സാഹസ്രവത്സരതപസ്സമരാഭിലവ്യൈഃ । പര്യായനിര്മിതതപസ്സമരൌ ഭവംതൌ ശിഷ്ടൈകകംകടമമും ന്യഹതാം സലീലമ് ॥3॥
അന്വാചരന്നുപദിശന്നപി മോക്ഷധര്മം ത്വം ഭ്രാതൃമാന് ബദരികാശ്രമമധ്യവാത്സീഃ । ശക്രോഽഥ തേ ശമതപോബലനിസ്സഹാത്മാ ദിവ്യാംഗനാപരിവൃതം പ്രജിഘായ മാരമ് ॥4॥
കാമോ വസംതമലയാനിലബംധുശാലീ കാംതാകടാക്ഷവിശിഖൈർവികസദ്വിലാസൈഃ । വിധ്യന്മുഹുര്മുഹുരകംപമുദീക്ഷ്യ ച ത്വാം ഭീരുസ്ത്വയാഽഥ ജഗദേ മൃദുഹാസഭാജാ ॥5॥
ഭീത്യാഽലമംഗജ വസംത സുരാംഗനാ വോ മന്മാനസം ത്വിഹ ജുഷധ്വമിതി ബ്രുവാണഃ । ത്വം വിസ്മയേന പരിതഃ സ്തുവതാമഥൈഷാം പ്രാദര്ശയഃ സ്വപരിചാരകകാതരാക്ഷീഃ ॥6॥
സമ്മോഹനായ മിലിതാ മദനാദയസ്തേ ത്വദ്ദാസികാപരിമലൈഃ കില മോഹമാപുഃ । ദത്താം ത്വയാ ച ജഗൃഹുസ്ത്രപയൈവ സർവ- സ്വർവാസിഗർവശമനീം പുനരുർവശീം താമ് ॥7॥
ദൃഷ്ട്വോർവശീം തവ കഥാം ച നിശമ്യ ശക്രഃ പര്യാകുലോഽജനി ഭവന്മഹിമാവമര്ശാത് । ഏവം പ്രശാംതരമണീയതരാവതാരാ- ത്ത്വത്തോഽധികോ വരദ കൃഷ്ണതനുസ്ത്വമേവ ॥8॥
ദക്ഷസ്തു ധാതുരതിലാലനയാ രജോഽംധോ നാത്യാദൃതസ്ത്വയി ച കഷ്ടമശാംതിരാസീത് । യേന വ്യരുംധ സ ഭവത്തനുമേവ ശർവം യജ്ഞേ ച വൈരപിശുനേ സ്വസുതാം വ്യമാനീത് ॥9॥
ക്രുദ്ധേശമര്ദിതമഖഃ സ തു കൃത്തശീര്ഷോ ദേവപ്രസാദിതഹരാദഥ ലബ്ധജീവഃ । ത്വത്പൂരിതക്രതുവരഃ പുനരാപ ശാംതിം സ ത്വം പ്രശാംതികര പാഹി മരുത്പുരേശ ॥10॥
Browse Related Categories: