Vishnu · Traditional devotional text · Source: vignanam.org (Traditional devotional text (public-domain shlokas))
കദാപി ജന്മര്ക്ഷദിനേ തവ പ്രഭോ നിമംത്രിതജ്ഞാതിവധൂമഹീസുരാ । മഹാനസസ്ത്വാം സവിധേ നിധായ സാ മഹാനസാദൌ വവൃതേ വ്രജേശ്വരീ ॥1॥
തതോ ഭവത്ത്രാണനിയുക്തബാലകപ്രഭീതിസംക്രംദനസംകുലാരവൈഃ । വിമിശ്രമശ്രാവി ഭവത്സമീപതഃ പരിസ്ഫുടദ്ദാരുചടച്ചടാരവഃ ॥2॥
തതസ്തദാകര്ണനസംഭ്രമശ്രമപ്രകംപിവക്ഷോജഭരാ വ്രജാംഗനാഃ । ഭവംതമംതര്ദദൃശുസ്സമംതതോ വിനിഷ്പതദ്ദാരുണദാരുമധ്യഗമ് ॥3॥
ശിശോരഹോ കിം കിമഭൂദിതി ദ്രുതം പ്രധാവ്യ നംദഃ പശുപാശ്ച ഭൂസുരാഃ । ഭവംതമാലോക്യ യശോദയാ ധൃതം സമാശ്വസന്നശ്രുജലാര്ദ്രലോചനാഃ ॥4॥
കസ്കോ നു കൌതസ്കുത ഏഷ വിസ്മയോ വിശംകടം യച്ഛകടം വിപാടിതമ് । ന കാരണം കിംചിദിഹേതി തേ സ്ഥിതാഃ സ്വനാസികാദത്തകരാസ്ത്വദീക്ഷകാഃ ॥5॥
കുമാരകസ്യാസ്യ പയോധരാര്ഥിനഃ പ്രരോദനേ ലോലപദാംബുജാഹതമ് । മയാ മയാ ദൃഷ്ടമനോ വിപര്യഗാദിതീശ തേ പാലകബാലകാ ജഗുഃ ॥6॥
ഭിയാ തദാ കിംചിദജാനതാമിദം കുമാരകാണാമതിദുര്ഘടം വചഃ । ഭവത്പ്രഭാവാവിദുരൈരിതീരിതം മനാഗിവാശംക്യത ദൃഷ്ടപൂതനൈഃ ॥7॥
പ്രവാലതാമ്രം കിമിദം പദം ക്ഷതം സരോജരമ്യൌ നു കരൌ വിരോജിതൌ। ഇതി പ്രസര്പത്കരുണാതരംഗിതാസ്ത്വദംഗമാപസ്പൃശുരംഗനാജനാഃ ॥8॥
Offered for worship and study, not as prediction. Non-commercial.
More devotional texts
അയേ സുതം ദേഹി ജഗത്പതേഃ കൃപാതരംഗപാതാത്പരിപാതമദ്യ മേ । ഇതി സ്മ സംഗൃഹ്യ പിതാ ത്വദംഗകം മുഹുര്മുഹുഃ ശ്ലിഷ്യതി ജാതകംടകഃ ॥9॥
അനോനിലീനഃ കില ഹംതുമാഗതഃ സുരാരിരേവം ഭവതാ വിഹിംസിതഃ । രജോഽപി നോ ദൃഷ്ടമമുഷ്യ തത്കഥം സ ശുദ്ധസത്ത്വേ ത്വയി ലീനവാന് ധ്രുവമ് ॥10॥
പ്രപൂജിതൈസ്തത്ര തതോ ദ്വിജാതിഭിർവിശേഷതോ ലംഭിതമംഗലാശിഷഃ । വ്രജം നിജൈര്ബാല്യരസൈർവിമോഹയന് മരുത്പുരാധീശ രുജാം ജഹീഹി മേ ॥11॥
Browse Related Categories: