Vishnu · Traditional devotional text · Source: vignanam.org (Traditional devotional text (public-domain shlokas))
ത്വത്സേവോത്കസ്സൌഭരിര്നാമ പൂർവം കാലിംദ്യംതര്ദ്വാദശാബ്ദം തപസ്യന് । മീനവ്രാതേ സ്നേഹവാന് ഭോഗലോലേ താര്ക്ഷ്യം സാക്ഷാദൈക്ഷതാഗ്രേ കദാചിത് ॥1॥
ത്വദ്വാഹം തം സക്ഷുധം തൃക്ഷസൂനും മീനം കംചിജ്ജക്ഷതം ലക്ഷയന് സഃ । തപ്തശ്ചിത്തേ ശപ്തവാനത്ര ചേത്ത്വം ജംതൂന് ഭോക്താ ജീവിതം ചാപി മോക്താ ॥2॥
Offered for worship and study, not as prediction. Non-commercial.
More devotional texts
തസ്മിന് കാലേ കാലിയഃ ക്ഷ്വേലദര്പാത് സര്പാരാതേഃ കല്പിതം ഭാഗമശ്നന് । തേന ക്രോധാത്ത്വത്പദാംഭോജഭാജാ പക്ഷക്ഷിപ്തസ്തദ്ദുരാപം പയോഽഗാത് ॥3॥
ഘോരേ തസ്മിന് സൂരജാനീരവാസേ തീരേ വൃക്ഷാ വിക്ഷതാഃ ക്ഷ്വേലവേഗാത് । പക്ഷിവ്രാതാഃ പേതുരഭ്രേ പതംതഃ കാരുണ്യാര്ദ്രം ത്വന്മനസ്തേന ജാതമ് ॥4॥
കാലേ തസ്മിന്നേകദാ സീരപാണിം മുക്ത്വാ യാതേ യാമുനം കാനനാംതമ് । ത്വയ്യുദ്ദാമഗ്രീഷ്മഭീഷ്മോഷ്മതപ്താ ഗോഗോപാലാ വ്യാപിബന് ക്ഷ്വേലതോയമ് ॥5॥
നശ്യജ്ജീവാന് വിച്യുതാന് ക്ഷ്മാതലേ താന് വിശ്വാന് പശ്യന്നച്യുത ത്വം ദയാര്ദ്രഃ । പ്രാപ്യോപാംതം ജീവയാമാസിഥ ദ്രാക് പീയൂഷാംഭോവര്ഷിഭിഃ ശ്രീകടക്ഷൈഃ ॥6॥
കിം കിം ജാതോ ഹര്ഷവര്ഷാതിരേകഃ സർവാംഗേഷ്വിത്യുത്ഥിതാ ഗോപസംഘാഃ । ദൃഷ്ട്വാഽഗ്രേ ത്വാം ത്വത്കൃതം തദ്വിദംത- സ്ത്വാമാലിംഗന് ദൃഷ്ടനാനാപ്രഭാവാഃ ॥7॥
ഗാവശ്ചൈവം ലബ്ധജീവാഃ ക്ഷണേന സ്ഫീതാനംദാസ്ത്വാം ച ദൃഷ്ട്വാ പുരസ്താത് । ദ്രാഗാവവ്രുഃ സർവതോ ഹര്ഷബാഷ്പം വ്യാമുംചംത്യോ മംദമുദ്യന്നിനാദാഃ ॥8॥
രോമാംചോഽയം സർവതോ നഃ ശരീരേ ഭൂയസ്യംതഃ കാചിദാനംദമൂര്ഛാ । ആശ്ചര്യോഽയം ക്ഷ്വേലവേഗോ മുകുംദേ- ത്യുക്തോ ഗോപൈര്നംദിതോ വംദിതോഽഭൂഃ ॥9॥
ഏവം ഭക്താന് മുക്തജീവാനപി ത്വം മുഗ്ധാപാംഗൈരസ്തരോഗാംസ്തനോഷി । താദൃഗ്ഭൂതസ്ഫീതകാരുണ്യഭൂമാ രോഗാത് പായാ വായുഗേഹാധിവാസ ॥10॥
Browse Related Categories: