Vishnu · Traditional devotional text · Source: vignanam.org (Traditional devotional text (public-domain shlokas))
സ്ഫുരത്പരാനംദരസാത്മകേന ത്വയാ സമാസാദിതഭോഗലീലാഃ । അസീമമാനംദഭരം പ്രപന്നാ മഹാംതമാപുര്മദമംബുജാക്ഷ്യഃ ॥1॥
നിലീയതേഽസൌ മയി മയ്യമായം രമാപതിർവിശ്വമനോഭിരാമഃ । ഇതി സ്മ സർവാഃ കലിതാഭിമാനാ നിരീക്ഷ്യ ഗോവിംദ് തിരോഹിതോഽഭൂഃ ॥2॥
Offered for worship and study, not as prediction. Non-commercial.
More devotional texts
രാധാഭിധാം താവദജാതഗർവാമതിപ്രിയാം ഗോപവധൂം മുരാരേ । ഭവാനുപാദായ ഗതോ വിദൂരം തയാ സഹ സ്വൈരവിഹാരകാരീ ॥3॥
തിരോഹിതേഽഥ ത്വയി ജാതതാപാഃ സമം സമേതാഃ കമലായതാക്ഷ്യഃ । വനേ വനേ ത്വാം പരിമാര്ഗയംത്യോ വിഷാദമാപുര്ഭഗവന്നപാരമ് ॥4॥
ഹാ ചൂത ഹാ ചംപക കര്ണികാര ഹാ മല്ലികേ മാലതി ബാലവല്യഃ । കിം വീക്ഷിതോ നോ ഹൃദയൈകചോരഃ ഇത്യാദി താസ്ത്വത്പ്രവണാ വിലേപുഃ ॥5॥
നിരീക്ഷിതോഽയം സഖി പംകജാക്ഷഃ പുരോ മമേത്യാകുലമാലപംതീ । ത്വാം ഭാവനാചക്ഷുഷി വീക്ഷ്യ കാചിത്താപം സഖീനാം ദ്വിഗുണീചകാര ॥6॥
ത്വദാത്മികാസ്താ യമുനാതടാംതേ തവാനുചക്രുഃ കില ചേഷ്ടിതാനി । വിചിത്യ ഭൂയോഽപി തഥൈവ മാനാത്ത്വയാ വിമുക്താം ദദൃശുശ്ച രാധാമ് ॥7॥
തതഃ സമം താ വിപിനേ സമംതാത്തമോവതാരാവധി മാര്ഗയംത്യഃ । പുനർവിമിശ്രാ യമുനാതടാംതേ ഭൃശം വിലേപുശ്ച ജഗുര്ഗുണാംസ്തേ ॥8॥
തഥാ വ്യഥാസംകുലമാനസാനാം വ്രജാംഗനാനാം കരുണൈകസിംധോ । ജഗത്ത്രയീമോഹനമോഹനാത്മാ ത്വം പ്രാദുരാസീരയി മംദഹാസീ ॥9॥
സംദിഗ്ധസംദര്ശനമാത്മകാംതം ത്വാം വീക്ഷ്യ തന്വ്യഃ സഹസാ തദാനീമ് । കിം കിം ന ചക്രുഃ പ്രമദാതിഭാരാത് സ ത്വം ഗദാത് പാലയ മാരുതേശ ॥10॥
Browse Related Categories: