Vishnu · Traditional devotional text · Source: vignanam.org (Traditional devotional text (public-domain shlokas))
പ്രദ്യുമ്നോ രൌക്മിണേയഃ സ ഖലു തവ കലാ ശംബരേണാഹൃതസ്തം ഹത്വാ രത്യാ സഹാപ്തോ നിജപുരമഹരദ്രുക്മികന്യാം ച ധന്യാമ് । തത്പുത്രോഽഥാനിരുദ്ധോ ഗുണനിധിരവഹദ്രോചനാം രുക്മിപൌത്രീം തത്രോദ്വാഹേ ഗതസ്ത്വം ന്യവധി മുസലിനാ രുക്മ്യപി ദ്യൂതവൈരാത് ॥1॥
ബാണസ്യ സാ ബലിസുതസ്യ സഹസ്രബാഹോ- ര്മാഹേശ്വരസ്യ മഹിതാ ദുഹിതാ കിലോഷാ । ത്വത്പൌത്രമേനമനിരുദ്ധമദൃഷ്ടപൂർവം സ്വപ്നേഽനുഭൂയ ഭഗവന് വിരഹാതുരാഽഭൂത് ॥2॥
Offered for worship and study, not as prediction. Non-commercial.
More devotional texts
യോഗിന്യതീവ കുശലാ ഖലു ചിത്രലേഖാ തസ്യാഃ സഖീ വിലിഖതീ തരുണാനശേഷാന് । തത്രാനിരുദ്ധമുഷയാ വിദിതം നിശായാ- മാനേഷ്ട യോഗബലതോ ഭവതോ നികേതാത് ॥3॥
കന്യാപുരേ ദയിതയാ സുഖമാരമംതം ചൈനം കഥംചന ബബംധുഷി ശർവബംധൌ । ശ്രീനാരദോക്തതദുദംതദുരംതരോഷൈ- സ്ത്വം തസ്യ ശോണിതപുരം യദുഭിര്ന്യരുംധാഃ ॥4॥
പുരീപാലശ്ശൈലപ്രിയദുഹിതൃനാഥോഽസ്യ ഭഗവാന് സമം ഭൂതവ്രാതൈര്യദുബലമശംകം നിരുരുധേ । മഹാപ്രാണോ ബാണോ ഝടിതി യുയുധാനേനയുയുധേ ഗുഹഃ പ്രദ്യുമ്നേന ത്വമപി പുരഹംത്രാ ജഘടിഷേ ॥5॥
നിരുദ്ധാശേഷാസ്ത്രേ മുമുഹുഷി തവാസ്ത്രേണ ഗിരിശേ ദ്രുതാ ഭൂതാ ഭീതാഃ പ്രമഥകുലവീരാഃ പ്രമഥിതാഃ । പരാസ്കംദ്ത് സ്കംദഃ കുസുമശരബാണൈശ്ച സചിവഃ സ കുംഭാംഡോ ഭാംഡം നവമിവ ബലേനാശു ബിഭിദേ ॥6॥
ചാപാനാം പംചശത്യാ പ്രസഭമുപഗതേ ഛിന്നചാപേഽഥ ബാണേ വ്യര്ഥേ യാതേ സമേതോ ജ്വരപതിരശനൈരജ്വരി ത്വജ്ജ്വരേണ । ജ്ഞാനീ സ്തുത്വാഽഥ ദത്വാ തവ ചരിതജുഷാം വിജ്വരം സ ജ്വരോഽഗാത് പ്രായോഽംതര്ജ്ഞാനവംതോഽപി ച ബഹുതമസാ രൌദ്രചേഷ്ടാ ഹി രൌദ്രാഃ ॥7॥
ബാണം നാനായുധോഗ്രം പുനരഭിപതിതം ദര്പദോഷാദ്വിതന്വന് നിര്ലൂനാശേഷദോഷം സപദി ബുബുധുഷാ ശംകരേണോപഗീതഃ । തദ്വാചാ ശിഷ്ടബാഹുദ്വിതയമുഭയതോ നിര്ഭയം തത്പ്രിയം തം മുക്ത്വാ തദ്ദത്തമാനോ നിജപുരമഗമഃ സാനിരുദ്ധഃ സഹോഷഃ ॥8॥
മുഹുസ്താവച്ഛക്രം വരുണമജയോ നംദഹരണേ യമം ബാലാനീതൌ ദവദഹനപാനേഽനിലസഖമ് । വിധിം വത്സസ്തേയേ ഗിരിശമിഹ ബാണസ്യ സമരേ വിഭോ വിശ്വോത്കര്ഷീ തദയമവതാരോ ജയതി തേ ॥9॥
ദ്വിജരുഷാ കൃകലാസവപുര്ധരം നൃഗനൃപം ത്രിദിവാലയമാപയന് । നിജജനേ ദ്വിജഭക്തിമനുത്തമാമുപദിശന് പവനേശ്വര് പാഹി മാമ് ॥10॥
Browse Related Categories: