Ganesha · Traditional devotional text · Source: vignanam.org (Traditional devotional text (public-domain shlokas))
द्विरदवदन विषमरद वरद जयेशान शांतवरसदन । सदनवसादन दयया कुरु सादनमंतरायस्य ॥ 1 ॥
इंदुकला कलितालिक सालिकशुंभत्कपोलपालियुग । विकटस्फुटकटधाराधारोऽस्यस्य प्रपंचस्य ॥ 2 ॥
वरपरशुपाशपाणे पणितपणायापणायितोऽसि यतः । आरूह्य वज्रदंतं आखुं विदधासि विपदंतम् ॥ 3 ॥
लंबोदर दूर्वासन शयधृतसामोदमोदकाशनक । शनकैरवलोकय मां यमांतरायापहारिचारुदृशा ॥ 4 ॥
आनंदतुंदिलाखिलवृंदारकवृंदवंदितांघ्रियुग । सुखधृतदंडरसालो नागजभालोऽतिभासि विभो ॥ 5 ॥
अगणेयगुणेशात्मज चिंतकचिंतामणे गणेशान । स्वचरणशरणं करुणावरुणालय देव पाहि मां दीनम् ॥ 6 ॥
रुचिरवचोऽमृतरावोन्नीता नीता दिवं स्तुतिः स्फीता । इति षट्पदी मदीया गणपतिपादांबुजे विशतु ॥ 7 ॥
इति चिंतामणिषट्पदी ॥
Browse Related Categories:
Offered for worship and study, not as prediction. Non-commercial.
More devotional texts