Sri Krishna · Traditional devotional text · Source: vignanam.org (Traditional devotional text (public-domain shlokas))
॥ షష్ఠః సర్గః ॥ ॥ కుంఠవైకుంఠః ॥
అథ తాం గంతుమశక్తాం చిరమనురక్తాం లతాగృహే దృష్ట్వా । తచ్చరితం గోవిందే మనసిజమందే సఖీ ప్రాహ ॥ 37 ॥
Offered for worship and study, not as prediction. Non-commercial.
More devotional texts
॥ గీతం 12 ॥
పశ్యతి దిశి దిశి రహసి భవంతమ్ । తదధరమధురమధూని పిబంతమ్ ॥ నాథ హరే జగన్నాథ హరే సీదతి రాధా వాసగృహే - ధ్రువమ్ ॥ 1 ॥
త్వదభిసరణరభసేన వలంతీ । పతతి పదాని కియంతి చలంతీ ॥ 2 ॥
విహితవిశదబిసకిసలయవలయా । జీవతి పరమిహ తవ రతికలయా ॥ 3 ॥
ముహురవలోకితమండనలీలా । మధురిపురహమితి భావనశీలా ॥ 4 ॥
త్వరితముపైతి న కథమభిసారమ్ । హరిరితి వదతి సఖీమనువారమ్ ॥ 5 ॥
శ్లిష్యతి చుంబతి జలధరకల్పమ్ । హరిరుపగత ఇతి తిమిరమనల్పమ్ ॥ 6 ॥
భవతి విలంబిని విగలితలజ్జా । విలపతి రోదితి వాసకసజ్జా ॥ 7 ॥
శ్రీజయదేవకవేరిదముదితమ్ । రసికజనం తనుతామతిముదితమ్ ॥ 8 ॥
విపులపులకపాలిః స్ఫీతసీత్కారమంత-ర్జనితజడిమకాకువ్యాకులం వ్యాహరంతీ । తవ కితవ విధత్తేఽమందకందర్పచింతాం రసజలధినిమగ్నా ధ్యానలగ్నా మృగాక్షీ ॥ 38 ॥
అంగేష్వాభరణం కరోతి బహుశః పత్రేఽపి సంచారిణి ప్రాప్తం త్వాం పరిశంకతే వితనుతే శయ్యాం చిరం ధ్యాయతి । ఇత్యాకల్పవికల్పతల్పరచనాసంకల్పలీలాశత-వ్యాసక్తాపి వినా త్వయా వరతనుర్నైషా నిశాం నేష్యతి ॥ 39 ॥
కిం విశ్రామ్యసి కృష్ణభోగిభవనే భాండీరభూమీరుహి భ్రాత ర్యాహి నదృష్టిగోచరమితస్సానందనందాస్పదం। రధాయావచనం తదధ్వగముఖాన్నందాంతికేగోపతో గోవిందస్యజయంతి సాయమతిథిప్రాశస్త్యగర్భాగిరః॥ 40 ॥
॥ ఇతి గీతగోవిందే వాసకసజ్జావర్ణనే కుంఠవైకుంఠో నామ షష్ఠః సర్గః ॥
Browse Related Categories: