मूक पंच शति 2 - पादारविंद शतकम्

marālīnāṃ yānābhyasanakalanāmūlaguravē daridrāṇāṃ trāṇavyatikarasurōdyānataravē । tamaskāṇḍaprauḍhiprakaṭanatiraskārapaṭavē janō'yaṃ kāmākṣyāścharaṇanalināya spṛhayatē ॥3॥

vahantī saindūrīṃ saraṇimavanamrāmarapuRī- purandhrīsīmantē kavikamalabālārkasuṣamā । trayīsīmantinyāḥ stanataṭanichōlāruṇapaṭī vibhāntī kāmākṣyāḥ padanalinakāntirvijayatē ॥4॥

praṇamrībhūtasya praṇayakalahatrastamanasaḥ smarārātēśchūḍāviyati gṛhamēdhī himakaraḥ । yayōḥ sāndhyāṃ kāntiṃ vahati suṣamābhiścharaṇayōḥ tayōrmē kāmākṣyā hṛdayamapatandraṃ viharatām ॥5॥

yayōḥ pīṭhāyantē vibudhamukuṭīnāṃ paṭalikā yayōḥ saudhāyantē svayamudayabhājō bhaṇitayaḥ । yayōḥ dāsāyantē sarasijabhavādyāścharaṇayōḥ tayōrmē kāmākṣyā dinamanu varīvartu hṛdayam ॥6॥

nayantī saṅkōchaṃ sarasijaruchaṃ dikparisarē sṛjantī lauhityaṃ nakhakiraṇachandrārdhakhachitā । kavīndrāṇāṃ hṛtkairavavikasanōdyōgajananī sphurantī kāmākṣyāḥ charaṇaruchisandhyā vijayatē ॥7॥

virāvairmāñjīraiḥ kimapi kathayantīva madhuraṃ purastādānamrē puravijayini smēravadanē । vayasyēva prauḍhā śithilayati yā prēmakalaha- prarōhaṃ kāmākṣyāḥ charaṇayugalī sā vijayatē ॥8॥

suparvastrīlōlālakaparichitaṃ ṣaṭpadakulaiḥ sphurallākṣārāgaṃ taruṇataraṇijyōtiraruṇaiḥ । bhṛtaṃ kāntyambhōbhiḥ visṛmaramarandaiḥ sarasijaiḥ vidhattē kāmākṣyāḥ charaṇayugalaṃ bandhupadavīm ॥9॥

rajaḥsaṃsargē'pi sthitamarajasāmēva hṛdayē paraṃ raktatvēna sthitamapi viraktaikaśaraṇam । alabhyaṃ mandānāṃ dadhadapi sadā mandagatitāṃ vidhattē kāmākṣyāḥ charaṇayugamāścharyalaharīm ॥10॥

jaṭālā mañjīrasphuradaruṇaratnāṃśunikaraiḥ niṣidantī madhyē nakharuchijharīgāṅgapayasām । jagattrāṇaṃ kartuṃ janani mama kāmākṣi niyataṃ tapaścharyāṃ dhattē tava charaṇapāthōjayugalī ॥11॥

tulākōṭidvandvakkaṇitabhaṇitābhītivachasōḥ vinamraṃ kāmākṣī visṛmaramahaḥpāṭalitayōḥ । kṣaṇaṃ vinyāsēna kṣapitatamasōrmē lalitayōḥ punīyānmūrdhānaṃ puraharapurandhrī charaṇayōḥ ॥12॥

bhavāni druhyētāṃ bhavanibiḍitēbhyō mama muhu- stamōvyāmōhēbhyastava janani kāmākṣi charaṇau । yayōrlākṣābindusphuraṇadharaṇāddhvarjaṭijaṭā- kuṭīrā śōṇāṅkaṃ vahati vapurēṇāṅkakalikā ॥13॥

pavitrīkuryurnuḥ padatalabhuvaḥ pāṭalaruchaḥ parāgāstē pāpapraśamanadhurīṇāḥ paraśivē । kaṇaṃ labdhuṃ yēṣāṃ nijaśirasi kāmākṣi vivaśā valantō vyātanvantyahamahamikāṃ mādhavamukhāḥ ॥14॥

balākāmālābhirnakharuchimayībhiḥ parivṛtē vinamrasvarnārīvikachakachakālāmbudakulē । sphurantaḥ kāmākṣi sphuṭadalitabandhūkasuhṛda- staṭillēkhāyantē tava charaṇapāthōjakiraṇāḥ ॥15॥

sarāgaḥ sadvēṣaḥ prasṛmarasarōjē pratidinaṃ nisargādākrāmanvibudhajanamūrdhānamadhikam । kathaṅkāraṃ mātaḥ kathaya padapadmastava satāṃ natānāṃ kāmākṣi prakaṭayati kaivalyasaraṇim ॥16॥

japālakṣmīśōṇō janitaparamajñānanalinī- vikāsavyāsaṅgō viphalitajagajjāḍyagarimā । manaḥpūrvādriṃ mē tilakayatu kāmākṣi tarasā tamaskāṇḍadrōhī tava charaṇapāthōjaramaṇaḥ ॥17॥

namaskurmaḥ prēṅkhanmaṇikaṭakanīlōtpalamahaḥ- payōdhau riṅkhadbhirnakhakiraṇaphēnairdhavalitē । sphuṭaṃ kurvāṇāya prabalachaladaurvānalaśikhā- vitarkaṃ kāmākṣyāḥ satatamaruṇimnē charaṇayōḥ ॥18॥

śivē pāśāyētāmalaghuni tamaḥkūpakuharē dinādhīśāyētāṃ mama hṛdayapāthōjavipinē । nabhōmāsāyētāṃ sarasakavitārītisariti tvadīyau kāmākṣi prasṛtakiraṇau dēvi charaṇau ॥19॥

niṣaktaṃ śrutyantē nayanamiva sadvṛttaruchiraiḥ samairjuṣṭaṃ śuddhairadharamiva ramyairdvijagaṇaiḥ । śivē vakṣōjanmadvitayamiva muktāśritamumē tvadīyaṃ kāmākṣi praṇataśaraṇaṃ naumi charaṇam ॥20॥

namasyāsaṃsajjannamuchiparipanthipraṇayinī- nisargaprēṅkhōlatkuralakulakālāhiśabalē । nakhachChāyādugdhōdadhipayasi tē vaidrumaruchāṃ prachāraṃ kāmākṣi prachurayati pādābjasuṣamā ॥21॥

kadā dūrīkartuṃ kaṭuduritakākōlajanitaṃ mahāntaṃ santāpaṃ madanaparipanthipriyatamē । kṣaṇāttē kāmākṣi tribhuvanaparītāpaharaṇē paṭīyāṃsaṃ lapsyē padakamalasēvāmṛtarasam ॥22॥

yayōḥ sāndhyaṃ rōchiḥ satatamaruṇimnē spṛhayatē yayōśchāndrī kāntiḥ paripatati dṛṣṭvā nakharuchim । yayōḥ pākōdrēkaṃ pipaṭhiṣati bhaktyā kisalayaṃ mradimnaḥ kāmākṣyā manasi charaṇau tau tanumahē ॥23॥

jagannēdaṃ nēdaṃ paramiti parityajya yatibhiḥ kuśāgrīyasvāntaiḥ kuśaladhiṣaṇaiḥ śāstrasaraṇau । gavēṣyaṃ kāmākṣi dhruvamakṛtakānāṃ girisutē girāmaidamparyaṃ tava charaṇapadmaṃ vijayatē ॥24॥

kṛtasnānaṃ śāstrāmṛtasarasi kāmākṣi nitarāṃ dadhānaṃ vaiśadyaṃ kalitarasamānandasudhayā । alaṅkāraṃ bhūmērmunijanamanaśchinmayamahā- payōdhērantassthaṃ tava charaṇaratnaṃ mṛgayatē ॥25॥

manōgēhē mōhōdbhavatimirapūrṇē mama muhuḥ daridrāṇīkurvandinakarasahasrāṇi kiraṇaiḥ । vidhattāṃ kāmākṣi prasṛmaratamōvañchanachaṇaḥ kṣaṇārdhaṃ sānnidhyaṃ charaṇamaṇidīpō janani tē ॥26॥

kavīnāṃ chētōvannakhararuchisamparki vibudha- sravantīsrōtōvatpaṭumukharitaṃ haṃsakaravaiḥ । dinārambhaśrīvanniyatamaruṇachChāyasubhagaṃ madantaḥ kāmākṣyāḥ sphuratu padapaṅkēruhayugam ॥27॥

sadā kiṃ samparkātprakṛtikaṭhinairnākimukuṭaiḥ taṭairnīhārādrēradhikamaṇunā yōgimanasā । vibhintē sammōhaṃ śiśirayati bhaktānapi dṛśām adṛśyaṃ kāmākṣi prakaṭayati tē pādayugalam ॥28॥

pavitrābhyāmamba prakṛtimṛdulābhyāṃ tava śivē padābhyāṃ kāmākṣi prasabhamabhibhūtaiḥ sachakitaiḥ । pravālairambhōjairapi cha vanavāsavratadaśāḥ sadaivārabhyantē paricharitanānādvijagaṇaiḥ ॥29॥

chirāddṛśyā haṃsaiḥ kathamapi sadā haṃsasulabhaṃ nirasyantī jāḍyaṃ niyatajaḍamadhyaikaśaraṇam । adōṣavyāsaṅgā satatamapi dōṣāptimalinaṃ payōjaṃ kāmākṣyāḥ parihasati pādābjayugalī ॥30॥

surāṇāmānandaprabalanatayā maṇḍanatayā nakhēndujyōtsnābhirvisṛmaratamaḥkhaṇḍanatayā । payōjaśrīdvēṣavrataratatayā tvachcharaṇayōḥ vilāsaḥ kāmākṣi prakaṭayati naiśākaradaśām ॥31॥

sitimnā kāntīnāṃ nakharajanuṣāṃ pādanalina- chChavīnāṃ śōṇimnā tava janani kāmākṣi namanē । labhantē mandāragrathitanavabandhūkakusuma- srajāṃ sāmīchīnyaṃ surapurapurandhrīkachabharāḥ ॥32॥

sphuranmadhyē śuddhē nakhakiraṇadugdhābdhipayasāṃ vahannabjaṃ chakraṃ daramapi cha lēkhātmakatayā । śritō mātsyaṃ rūpaṃ śriyamapi dadhānō nirupamāṃ tridhāmā kāmākṣyāḥ padanalinanāmā vijayatē ॥33॥

nakhaśrīsannaddhastabakanichitaḥ svaiścha kiraṇaiḥ piśaṅgaiḥ kāmākṣi prakaṭitalasatpallavaruchiḥ । satāṃ gamyaḥ śaṅkē sakalaphaladātā surataruḥ tvadīyaḥ pādō'yaṃ tuhinagirirājanyatanayē ॥34॥

vaṣaṭkurvanmāñjīrakalakalaiḥ karmalaharī- havīṃṣi prauddaṇḍaṃ jvalati paramajñānadahanē । mahīyānkāmākṣi sphuṭamahasi jōhōti sudhiyāṃ manōvēdyāṃ mātastava charaṇayajvā girisutē ॥35॥

mahāmantraṃ kiñchinmaṇikaṭakanādairmṛdu japan kṣipandikṣu svachChaṃ nakharuchimayaṃ bhāsmanarajaḥ । natānāṃ kāmākṣi prakṛtipaṭurachchāṭya mamatā- piśāchīṃ pādō'yaṃ prakaṭayati tē māntrikadaśām ॥36॥

udītē bōdhēndau tamasi nitarāṃ jagmuṣi daśāṃ daridrāṃ kāmākṣi prakaṭamanurāgaṃ vidadhatī । sitēnāchChādyāṅgaṃ nakharuchipaṭēnāṅghriyugalī- purandhrī tē mātaḥ svayamabhisaratyēva hṛdayam ॥37॥

dinārambhaḥ sampannalinavipinānāmabhinavō vikāsō vāsantaḥ sukavipikalōkasya niyataḥ । pradōṣaḥ kāmākṣi prakaṭaparamajñānaśaśina- śchakāsti tvatpādasmaraṇamahimā śailatanayē ॥38॥

dhṛtachChāyaṃ nityaṃ sarasiruhamaitrīparichitaṃ nidhānaṃ dīptīnāṃ nikhilajagatāṃ bōdhajanakam । mumukṣūṇāṃ mārgaprathanapaṭu kāmākṣi padavīṃ padaṃ tē pātaṅgīṃ parikalayatē parvatasutē ॥39॥

śanaistīrtvā mōhāmbudhimatha samārōḍhumanasaḥ kramātkaivalyākhyāṃ sukṛtisulabhāṃ saudhavalabhīm । labhantē niḥśrēṇīmiva jhaṭiti kāmākṣi charaṇaṃ puraścharyābhistē puramathanasīmantini janāḥ ॥40॥

prachaṇḍārtikṣōbhapramathanakṛtē prātibhasari- tpravāhaprōddaṇḍīkaraṇajaladāya praṇamatām । pradīpāya prauḍhē bhavatamasi kāmākṣi charaṇa- prasādaunmukhyāya spṛhayati janō'yaṃ janani tē ॥41॥

marudbhiḥ saṃsēvyā satatamapi chāñchalyarahitā sadāruṇyaṃ yāntī pariṇatidaridrāṇasuṣamā । guṇōtkarṣānmāñjīrakakalakalaistarjanapaṭuḥ pravālaṃ kāmākṣyāḥ parihasati pādābjayugalī ॥42॥

jagadrakṣādakṣā jalajaruchiśikṣāpaṭutarā samairnamyā ramyā satatamabhigamyā budhajanaiḥ । dvayī līlālōlā śrutiṣu surapālādimukuṭī- taṭīsīmādhāmā tava janani kāmākṣi padayōḥ ॥43॥

girāṃ dūrau chōrau jaḍimatimirāṇāṃ kṛtajaga- tparitrāṇau śōṇau munihṛdayalīlaikanipuṇau । nakhaiḥ smērau sārau nigamavachasāṃ khaṇḍitabhava- grahōnmādau pādau tava janani kāmākṣi kalayē ॥44॥

aviśrāntaṃ paṅkaṃ yadapi kalayanyāvakamayaṃ nirasyankāmākṣi praṇamanajuṣāṃ paṅkamakhilam । tulākōṭidvandaṃ dadhadapi cha gachChannatulatāṃ girāṃ mārgaṃ pādō girivarasutē laṅghayati tē ॥45॥

pravālaṃ savrīlaṃ vipinavivarē vēpayati yā sphurallīlaṃ bālātapamadhikabālaṃ vadati yā । ruchiṃ sāndhyāṃ vandhyāṃ virachayati yā vardhayatu sā śivaṃ mē kāmākṣyāḥ padanalinapāṭalyalaharī ॥46॥

kirañjyōtsnārītiṃ nakhamukharuchā haṃsamanasāṃ vitanvānaḥ prītiṃ vikachataruṇāmbhōruharuchiḥ । prakāśaḥ śrīpādastava janani kāmākṣi tanutē śaratkālaprauḍhiṃ śaśiśakalachūḍapriyatamē ॥47॥

nakhāṅkūrasmēradyutivimalagaṅgāmbhasi sukhaṃ kṛtasnānaṃ jñānāmṛtamamalamāsvādya niyatam । udañchanmañjīrasphuraṇamaṇidīpē mama manō manōjñē kāmākṣyāścharaṇamaṇiharmyē viharatām ॥48॥

bhavāmbhōdhau naukāṃ jaḍimavipinē pāvakaśikhā- mamartyēndrādīnāmadhimukuṭamuttaṃsakalikām । jagattāpē jyōtsnāmakṛtakavachaḥpañjarapuṭē śukastrīṃ kāmākṣyā manasi kalayē pādayugalīm ॥49॥

paratmaprākāśyapratiphalanachuñchuḥ praṇamatāṃ manōjñastvatpādō maṇimukuramudrāṃ kalayatē । yadīyāṃ kāmākṣi prakṛtimasṛṇāḥ śōdhakadaśāṃ vidhātuṃ chēṣṭhantē balaripuvadhūṭīkachabharāḥ ॥50॥

aviśrāntaṃ tiṣṭhannakṛtakavachaḥkandarapuṭī- kuṭīrāntaḥ prauḍhaṃ nakharuchisaṭālīṃ prakaṭayan । prachaṇḍaṃ khaṇḍatvaṃ nayatu mama kāmākṣi tarasā tamōvētaṇḍēndraṃ tava charaṇakaṇṭhīravapatiḥ ॥51॥

purastātkāmākṣi prachurarasamākhaṇḍalapurī- purandhrīṇāṃ lāsyaṃ tava lalitamālōkya śanakaiḥ । nakhaśrībhiḥ smērā bahu vitanutē nūpuraravai- śchamatkṛtyā śaṅkē charaṇayugalī chāṭurachanāḥ ॥52॥

sarōjaṃ nindantī nakhakiraṇakarpūraśiśirā niṣiktā mārārērmukuṭaśaśirēkhāhimajalaiḥ । sphurantī kāmākṣi sphuṭaruchimayē pallavachayē tavādhattē maitrīṃ pathikasudṛśā pādayugalī ॥53॥

natānāṃ sampattēranavaratamākarṣaṇajapaḥ prarōhatsaṃsāraprasaragarimastambhanajapaḥ । tvadīyaḥ kāmākṣi smaraharamanōmōhanajapaḥ paṭīyānnaḥ pāyātpadanalinamañjīraninadaḥ ॥54॥

vitanvīthā nāthē mama śirasi kāmākṣi kṛpayā padāmbhōjanyāsaṃ paśuparibṛḍhaprāṇadayitē । pibantō yanmudrāṃ prakaṭamupakampāparisaraṃ dṛśā nānandyantē nalinabhavanārāyaṇamukhāḥ ॥55॥

praṇāmōdyadbṛndāramukuṭamandārakalikā- vilōlallōlambaprakaramayadhūmaprachurimā । pradīptaḥ pādābjadyutivitatipāṭalyalaharī- kṛśānuḥ kāmākṣyā mama dahatu saṃsāravipinam ॥56॥

valakṣaśrīrṛkṣādhipaśiśusadṛkṣaistava nakhaiḥ jighṛkṣurdakṣatvaṃ sarasiruhabhikṣutvakaraṇē । kṣaṇānmē kāmākṣi kṣapitabhavasaṅkṣōbhagarimā vachōvaichakṣanyaṃ charaṇayugalī pakṣmalayatāt ॥57॥

samantātkāmākṣi kṣatatimirasantānasubhagān anantābhirbhābhirdinamanu digantānvirachayan । ahantāyā hantā mama jaḍimadantāvalahariḥ vibhintāṃ santāpaṃ tava charaṇachintāmaṇirasau ॥58॥

dadhānō bhāsvattāmamṛtanilayō lōhitavapuḥ vinamrāṇāṃ saumyō gururapi kavitvaṃ cha kalayan । gatau mandō gaṅgādharamahiṣi kāmākṣi bhajatāṃ tamaḥkēturmātastava charaṇapadmō vijayatē ॥59॥

nayantīṃ dāsatvaṃ nalinabhavamukhyānasulabha- pradānāddīnānāmamaratarudaurbhāgyajananīm । jagajjanmakṣēmakṣayavidhiṣu kāmākṣi padayō- rdhurīṇāmīṣṭē karastava bhaṇitumāhōpuruṣikām ॥60॥

janō'yaṃ santaptō janani bhavachaṇḍāṃśukiraṇaiḥ alabdhavaikaṃ śītaṃ kaṇamapi parajñānapayasaḥ । tamōmārgē pānthastava jhaṭiti kāmākṣi śiśirāṃ padāmbhōjachChāyāṃ paramaśivajāyē mṛgayatē ॥61॥

jayatyamba śrīmannakhakiraṇachīnāṃśukamayaṃ vitānaṃ bibhrāṇē suramukuṭasaṅghaṭṭamasṛṇē । nijāruṇyakṣaumāstaraṇavati kāmākṣi sulabhā budhaiḥ saṃvinnārī tava charaṇamāṇikyabhavanē ॥62॥

pratīmaḥ kāmākṣi sphuritataruṇādityakiraṇa- śriyō mūladravyaṃ tava charaṇamadrīndratanayē । surēndrāśāmāpūrayati yadasau dhvāntamakhilaṃ dhunītē digbhāgānapi cha mahasā pāṭalayatē ॥63॥

mahābhāṣyavyākhyāpaṭuśayanamārōpayati vā smaravyāpārērṣyāpiśunaniṭilaṃ kārayati vā । dvirēphāṇāmadhyāsayati satataṃ vādhivasatiṃ praṇamrānkāmākṣyāḥ padanalinamāhātmyagarimā ॥64॥

vivēkāmbhassrōtassnapanaparipāṭīśiśiritē samībhūtē śāstrasmaraṇahalasaṅkarṣaṇavaśāt । satāṃ chētaḥkṣētrē vapati tava kāmākṣi charaṇō mahāsaṃvitsasyaprakaravarabījaṃ girisutē ॥65॥

dadhānō mandārastabakaparipāṭīṃ nakharuchā vahandīptāṃ śōṇāṅgulipaṭalachāmpēyakalikām । aśōkōllāsaṃ naḥ prachurayatu kāmākṣi charaṇō vikāsī vāsantaḥ samaya iva tē śarvadayitē ॥66॥

nakhāṃśuprāchuryaprasṛmaramarālālidhavalaḥ sphuranmañjīrōdyanmarakatamahaśśaivalayutaḥ । bhavatyāḥ kāmākṣi sphuṭacharaṇapāṭalyakapaṭō nadaḥ śōṇābhikhyō nagapatitanūjē vijayatē ॥67॥

dhunānaṃ paṅkaughaṃ paramasulabhaṃ kaṇṭakakulaiḥ vikāsavyāsaṅgaṃ vidadhadaparādhīnamaniśam । nakhēndujyōtsnābhirviśadaruchi kāmākṣi nitarām asāmānyaṃ manyē sarasijamidaṃ tē padayugam ॥68॥

karīndrāya druhyatyalasagatilīlāsu vimalaiḥ payōjairmātsaryaṃ prakaṭayati kāmaṃ kalayatē । padāmbhōjadvandvaṃ tava tadapi kāmākṣi hṛdayaṃ munīnāṃ śāntānāṃ kathamaniśamasmai spṛhayatē ॥69॥

nirastā śōṇimnā charaṇakiraṇānāṃ tava śivē samindhānā sandhyāruchirachalarājanyatanayē । asāmarthyādēnaṃ paribhavitumētatsamaruchāṃ sarōjānāṃ jānē mukulayati śōbhāṃ pratidinam ॥70॥

upādikṣaddākṣyaṃ tava charaṇanāmā gururasau marālānāṃ śaṅkē masṛṇagatilālityasaraṇau । atastē nistandraṃ niyatamamunā sakhyapadavīṃ prapannaṃ pāthōjaṃ prati dadhati kāmākṣi kutukam ॥71॥

dadhānaiḥ saṃsargaṃ prakṛtimalinaiḥ ṣaṭpadakulaiḥ dvijādhīśaślāghāvidhiṣu vidadhadbhirmukulatām । rajōmiśraiḥ padmairniyatamapi kāmākṣi padayōḥ virōdhastē yuktō viṣamaśaravairipriyatamē ॥72॥

kavitvaśrīmiśrīkaraṇanipuṇau rakṣaṇachaṇau vipannānāṃ śrīmannalinamasṛṇau śōṇakiraṇau । munīndrāṇāmantaḥkaraṇaśaraṇau mandasaraṇau manōjñau kāmākṣyā duritaharaṇau naumi charaṇau ॥73॥

parasmātsarvasmādapi cha parayōrmuktikarayōḥ nakhaśrībhirjyōtsnākalitatulayōstāmratalayōḥ । nilīyē kāmākṣyā nigamanutayōrnākinatayōḥ nirastaprōnmīlannalinamadayōrēva padayōḥ ॥74॥

svabhāvādanyōnyaṃ kisalayamapīdaṃ tava padaṃ mradimnā śōṇimnā bhagavati dadhātē sadṛśatām । vanē pūrvasyēchChā satatamavanē kiṃ tu jagatāṃ parasyētthaṃ bhēdaḥ sphurati hṛdi kāmākṣi sudhiyām ॥75॥

kathaṃ vāchālō'pi prakaṭamaṇimañjīraninadaiḥ sadaivānandārdrānvirachayati vāchaṃyamajanān । prakṛtyā tē śōṇachChavirapi cha kāmākṣi charaṇō manīṣānairmalyaṃ kathamiva nṛṇāṃ māṃsalayatē ॥76॥

chalattṛṣṇāvīchīparichalanaparyākulatayā muhurbhrāntastāntaḥ paramaśivavāmākṣi paravān । titīrṣuḥ kāmākṣi prachuratarakarmāmbudhimamuṃ kadāhaṃ lapsyē tē charaṇamaṇisētuṃ girisutē ॥77॥

viśuṣyantyāṃ prajñāsariti duritagrīṣmasamaya- prabhāvēṇa kṣīṇē sati mama manaḥkēkini śuchā । tvadīyaḥ kāmākṣi sphuritacharaṇāmbhōdamahimā nabhōmāsāṭōpaṃ nagapatisutē kiṃ na kurutē ॥78॥

vinamrāṇāṃ chētōbhavanavalabhīsīmni charaṇa- pradīpē prākāśyaṃ dadhati tava nirdhūtatamasi । asīmā kāmākṣi svayamalaghuduṣkarmalaharī vighūrṇantī śāntiṃ śalabhaparipāṭīva bhajatē ॥79॥

virājantī śuktirnakhakiraṇamuktāmaṇitatēḥ vipatpāthōrāśau tarirapi narāṇāṃ praṇamatām । tvadīyaḥ kāmākṣi dhruvamalaghuvahnirbhavavanē munīnāṃ jñānāgnēraraṇirayamaṅghirvijayatē ॥80॥

samastaiḥ saṃsēvyaḥ satatamapi kāmākṣi vibudhaiḥ stutō gandharvastrīsulalitavipañchīkalaravaiḥ । bhavatyā bhindānō bhavagirikulaṃ jṛmbhitatamō- baladrōhī mātaścharaṇapuruhūtō vijayatē ॥81॥

vasantaṃ bhaktānāmapi manasi nityaṃ parilasad- ghanachChāyāpūrṇaṃ śuchimapi nṛṇāṃ tāpaśamanam । nakhēndujyōtsnābhiḥ śiśiramapi padmōdayakaraṃ namāmaḥ kāmākṣyāścharaṇamadhikāścharyakaraṇam ॥82॥

kavīndrāṇāṃ nānābhaṇitiguṇachitrīkṛtavachaḥ- prapañchavyāpāraprakaṭanakalākauśalanidhiḥ । adhaḥkurvannabjaṃ sanakabhṛgumukhyairmunijanaiḥ namasyaḥ kāmākṣyāścharaṇaparamēṣṭhī vijayatē ॥83॥

bhavatyāḥ kāmākṣi sphuritapadapaṅkēruhabhuvāṃ parāgāṇāṃ pūraiḥ parihṛtakalaṅkavyatikaraiḥ । natānāmāmṛṣṭē hṛdayamukurē nirmalaruchi prasannē niśśēṣaṃ pratiphalati viśvaṃ girisutē ॥84॥

tava trastaṃ pādātkisalayamaraṇyāntaramagāt paraṃ rēkhārūpaṃ kamalamamumēvāśritamabhūt । jitānāṃ kāmākṣi dvitayamapi yuktaṃ paribhavē vidēśē vāsō vā śaraṇagamanaṃ vā nijaripōḥ ॥85॥

gṛhītvā yāthārthyaṃ nigamavachasāṃ dēśikakṛpā- kaṭākṣarkajyōtiśśamitamamatābandhatamasaḥ । yatantē kāmākṣi pratidivasamantardraḍhayituṃ tvadīyaṃ pādābjaṃ sukṛtaparipākēna sujanāḥ ॥86॥

jaḍānāmapyamba smaraṇasamayē tavachcharaṇayōḥ bhramanmanthakṣmābhṛddhumughumitasindhupratibhaṭāḥ । prasannāḥ kāmākṣi prasabhamadharaspandanakarā bhavanti svachChandaṃ prakṛtiparipakkā bhaṇitayaḥ ॥87॥

vahannapyaśrāntaṃ madhuraninadaṃ haṃsakamasau tamēvādhaḥ kartuṃ kimiva yatatē kēligamanē । bhavasyaivānandaṃ vidadhadapi kāmākṣi charaṇō bhavatyāstaddrōhaṃ bhagavati kimēvaṃ vitanutē ॥88॥

yadatyantaṃ tāmyatyalasagativārtāsvapi śivē tadētatkāmākṣi prakṛtimṛdulaṃ tē padayugam । kirīṭaiḥ saṅghaṭṭaṃ kathamiva suraughasya sahatē munīndrāṇāmāstē manasi cha kathaṃ sūchiniśitē ॥89॥

manōraṅgē matkē vibudhajanasammōdajananī sarāgavyāsaṅgaṃ sarasamṛdusañchārasubhagā । manōjñā kāmākṣi prakaṭayatu lāsyaprakaraṇaṃ raṇanmañjīrā tē charaṇayugalīnartakavadhūḥ ॥90॥

pariṣkurvanmātaḥ paśupatikapardaṃ charaṇarāṭ parāchāṃ hṛtpadmaṃ paramabhaṇitīnāṃ cha makuṭam । bhavākhyē pāthōdhau pariharatu kāmākṣi mamatā- parādhīnatvaṃ mē parimuṣitapāthōjamahimā ॥91॥

prasūnaiḥ samparkādamarataruṇīkuntalabhavaiḥ abhīṣṭānāṃ dānādaniśamapi kāmākṣi namatām । svasaṅgātkaṅkēliprasavajanakatvēna cha śivē tridhā dhattē vārtāṃ surabhiriti pādō girisutē ॥92॥

mahāmōhastēnavyatikarabhayātpālayati yō vinikṣiptaṃ svasminnijajanamanōratnamaniśam । sa rāgasyōdrēkātsatatamapi kāmākṣi tarasā kimēvaṃ pādō'sau kisalayaruchiṃ chōrayati tē ॥93॥

sadā svāduṅkāraṃ viṣayalaharīśālikaṇikāṃ samāsvādya śrāntaṃ hṛdayaśukapōtaṃ janani mē । kṛpājālē phālēkṣaṇamahiṣi kāmākṣi rabhasāt gṛhītvā rundhīthārastava padayugīpañjarapuṭē ॥94॥

dhunānaṃ kāmākṣi smaraṇalavamātrēṇa jaḍima- jvaraprauḍhiṃ gūḍhasthiti nigamanaikuñjakuharē । alabhyaṃ sarvēṣāṃ katichana labhantē sukṛtinaḥ chirādanviṣyantastava charaṇasiddhauṣadhamidam ॥95॥

raṇanmañjīrābhyāṃ lalitagamanābhyāṃ sukṛtināṃ manōvāstavyābhyāṃ mathitatimirābhyāṃ nakharuchā । nidhēyābhyāṃ patyā nijaśirasi kāmākṣi satataṃ namastē pādābhyāṃ nalinamṛdulābhyāṃ girisutē ॥96॥

surāgē rākēndupratinidhimukhē parvatasutē chirāllabhyē bhaktyā śamadhanajanānāṃ pariṣadā । manōbhṛṅgō matkaḥ padakamalayugmē janani tē prakāmaṃ kāmākṣi tripuraharavāmākṣi ramatām ॥97॥

śivē saṃvidrūpē śaśiśakalachūḍapriyatamē śanairgatyāgatyā jitasuravarēbhē girisutē । yatantē santastē charaṇanalinālānayugalē sadā baddhaṃ chittapramadakariyūthaṃ dṛḍhataram ॥98॥

yaśaḥ sūtē mātarmadhurakavitāṃ pakṣmalayatē śriyaṃ dattē chittē kamapi paripākaṃ prathayatē । satāṃ pāśagranthiṃ śithilayati kiṃ kiṃ na kurutē prapannē kāmākṣyāḥ praṇatiparipāṭī charaṇayōḥ ॥99॥

manīṣāṃ māhēndrīṃ kakubhamiva tē kāmapi daśāṃ pradhattē kāmākṣyāścharaṇataruṇādityakiraṇaḥ । yadīyē samparkē dhṛtarasamarandā kavayatāṃ parīpākaṃ dhattē parimalavatī sūktinalinī ॥100॥

purā mārārātiḥ puramajayadamba stavaśataiḥ prasannāyāṃ satyāṃ tvayi tuhinaśailēndratanayē । atastē kāmākṣi sphuratu tarasā kālasamayē samāyātē mātarmama manasi pādābjayugalam ॥101॥

padadvandvaṃ mandaṃ gatiṣu nivasantaṃ hṛdi satāṃ girāmantē bhrāntaṃ kṛtakarahitānāṃ paribṛḍhē । janānāmānandaṃ janani janayantaṃ praṇamatāṃ tvadīyaṃ kāmākṣi pratidinamahaṃ naumi vimalam ॥102॥

idaṃ yaḥ kāmākṣyāścharaṇanalinastōtraśatakaṃ japēnnityaṃ bhaktyā nikhilajagadāhlādajanakam । sa viśvēṣāṃ vandyaḥ sakalakavilōkaikatilakaḥ chiraṃ bhuktvā bhōgānpariṇamati chidrūpakalayā ॥103॥

॥ iti pādāravindaśatakaṃ sampūrṇam ॥

Browse Related Categories: