Chanakya Neethi · Traditional devotional text · Source: vignanam.org (Traditional devotional text (public-domain shlokas))
പുസ്തകപ്രത്യയാധീതം നാധീതം ഗുരുസന്നിധൌ । സഭാമധ്യേ ന ശോഭംതേ ജാരഗര്ഭാ ഇവ സ്ത്രിയഃ ॥ 01 ॥
കൃതേ പ്രതികൃതിം കുര്യാദ്ധിംസനേ പ്രതിഹിംസനമ് । തത്ര ദോഷോ ന പതതി ദുഷ്ടേ ദുഷ്ടം സമാചരേത് ॥ 02 ॥
യദ്ദൂരം യദ്ദുരാരാധ്യം യച്ച ദൂരേ വ്യവസ്ഥിതമ് । തത്സർവം തപസാ സാധ്യം തപോ ഹി ദുരതിക്രമമ് ॥ 03 ॥
ലോഭശ്ചേദഗുണേന കിം പിശുനതാ യദ്യസ്തി കിം പാതകൈഃ സത്യം ചേത്തപസാ ച കിം ശുചി മനോ യദ്യസ്തി തീര്ഥേന കിമ് । സൌജന്യം യദി കിം ഗുണൈഃ സുമഹിമാ യദ്യസ്തി കിം മംഡനൈഃ സദ്വിദ്യാ യദി കിം ധനൈരപയശോ യദ്യസ്തി കിം മൃത്യുനാ ॥ 04 ॥
പിതാ രത്നാകരോ യസ്യ ലക്ഷ്മീര്യസ്യ സഹോദരാ । ശംഖോ ഭിക്ഷാടനം കുര്യാന്ന ദത്തമുപതിഷ്ഠതേ ॥ 05 ॥
അശക്തസ്തു ഭവേത്സാധു-ര്ബ്രഹ്മചാരീ വാ നിര്ധനഃ । വ്യാധിതോ ദേവഭക്തശ്ച വൃദ്ധാ നാരീ പതിവ്രതാ ॥ 06 ॥
നാഽന്നോദകസമം ദാനം ന തിഥിര്ദ്വാദശീ സമാ । ന ഗായത്ര്യാഃ പരോ മംത്രോ ന മാതുര്ദൈവതം പരമ് ॥ 07 ॥
തക്ഷകസ്യ വിഷം ദംതേ മക്ഷികായാസ്തു മസ്തകേ । വൃശ്ചികസ്യ വിഷം പുച്ഛേ സർവാംഗേ ദുര്ജനേ വിഷമ് ॥ 08 ॥
Offered for worship and study, not as prediction. Non-commercial.
More devotional texts
പത്യുരാജ്ഞാം വിനാ നാരീ ഹ്യുപോഷ്യ വ്രതചാരിണീ । ആയുഷ്യം ഹരതേ ഭര്തുഃ സാ നാരീ നരകം വ്രജേത് ॥ 09 ॥
ന ദാനൈഃ ശുധ്യതേ നാരീ നോപവാസശതൈരപി । ന തീര്ഥസേവയാ തദ്വദ്ഭര്തുഃ പദോദകൈര്യഥാ ॥ 10 ॥
പാദശേഷം പീതശേഷം സംധ്യാശേഷം തഥൈവ ച । ശ്വാനമൂത്രസമം തോയം പീത്വാ ചാംദ്രായണം ചരേത് ॥ 11 ॥
ദാനേന പാണിര്ന തു കംകണേന സ്നാനേന ശുദ്ധിര്ന തു ചംദനേന । മാനേന തൃപ്തിര്ന തു ഭോജനേന ജ്ഞാനേന മുക്തിര്ന തു മുംഡനേന ॥ 12 ॥
നാപിതസ്യ ഗൃഹേ ക്ഷൌരം പാഷാണേ ഗംധലേപനമ് । ആത്മരൂപം ജലേ പശ്യന് ശക്രസ്യാപി ശ്രിയം ഹരേത് ॥ 13 ॥
സദ്യഃ പ്രജ്ഞാഹരാ തുംഡീ സദ്യഃ പ്രജ്ഞാകരീ വചാ । സദ്യഃ ശക്തിഹരാ നാരീ സദ്യഃ ശക്തികരം പയഃ ॥ 14 ॥
പരോപകരണം യേഷാം ജാഗര്തി ഹൃദയേ സതാമ് । നശ്യംതി വിപദസ്തേഷാം സംപദഃ സ്യുഃ പദേ പദേ ॥ 15 ॥
യദി രാമാ യദി ച രമാ യദി തനയോ വിനയഗുണോപേതഃ । തനയേ തനയോത്പത്തിഃ സുരവരനഗരേ കിമാധിക്യമ് ॥ 16 ॥
ആഹാരനിദ്രാഭയമൈഥുനാനി സമാനി ചൈതാനി നൃണാം പശൂനാമ് । ജ്ഞാനം നരാണാമധികോ വിശേഷോ ജ്ഞാനേന ഹീനാഃ പശുഭിഃ സമാനാഃ ॥ 17 ॥
ദാനാര്ഥിനോ മധുകരാ യദി കര്ണതാലൈര്ദൂരീകൃതാഃ ദൂരീകൃതാഃ കരിവരേണ മദാംധബുദ്ധ്യാ । തസ്യൈവ ഗംഡയുഗ്മമംഡനഹാനിരേഷാ ഭൃംഗാഃ പുനർവികചപദ്മവനേ വസംതി ॥ 18 ॥
രാജാ വേശ്യാ യമശ്ചാഗ്നിസ്തസ്കരോ ബാലയാചകൌ । പരദുഃഖം ന ജാനംതി അഷ്ടമോ ഗ്രാമകംടകഃ ॥ 19 ॥
അധഃ പശ്യസി കിം ബാലേ പതിതം തവ കിം ഭുവി । രേ രേ മൂര്ഖ ന ജാനാസി ഗതം താരുണ്യമൌക്തികമ് ॥ 20 ॥
വ്യാലാശ്രയാപി വികലാപി സകംടകാപി വക്രാപി പംകിലഭവാപി ദുരാസദാപി । ഗംധേന ബംധുരസി കേതകി സർവജംതാ രേകോ ഗുണഃ ഖലു നിഹംതി സമസ്തദോഷാന് ॥ 21 ॥
Browse Related Categories: