Vishnu · Traditional devotional text · Source: vignanam.org (Traditional devotional text (public-domain shlokas))
ഹിരണ്യാക്ഷം താവദ്വരദ ഭവദന്വേഷണപരം ചരംതം സാംവര്തേ പയസി നിജജംഘാപരിമിതേ । ഭവദ്ഭക്തോ ഗത്വാ കപടപടുധീര്നാരദമുനിഃ ശനൈരൂചേ നംദന് ദനുജമപി നിംദംസ്തവ ബലമ് ॥1॥
സ മായാവീ വിഷ്ണുര്ഹരതി ഭവദീയാം വസുമതീം പ്രഭോ കഷ്ടം കഷ്ടം കിമിദമിതി തേനാഭിഗദിതഃ । നദന് ക്വാസൌ ക്വാസവിതി സ മുനിനാ ദര്ശിതപഥോ ഭവംതം സംപ്രാപദ്ധരണിധരമുദ്യംതമുദകാത് ॥2॥
അഹോ ആരണ്യോഽയം മൃഗ ഇതി ഹസംതം ബഹുതരൈ- ര്ദുരുക്തൈർവിധ്യംതം ദിതിസുതമവജ്ഞായ ഭഗവന് । മഹീം ദൃഷ്ട്വാ ദംഷ്ട്രാശിരസി ചകിതാം സ്വേന മഹസാ പയോധാവാധായ പ്രസഭമുദയുംക്ഥാ മൃധവിധൌ ॥3॥
ഗദാപാണൌ ദൈത്യേ ത്വമപി ഹി ഗൃഹീതോന്നതഗദോ നിയുദ്ധേന ക്രീഡന് ഘടഘടരവോദ്ഘുഷ്ടവിയതാ । രണാലോകൌത്സുക്യാന്മിലതി സുരസംഘേ ദ്രുതമമും നിരുംധ്യാഃ സംധ്യാതഃ പ്രഥമമിതി ധാത്രാ ജഗദിഷേ ॥4॥
ഗദോന്മര്ദേ തസ്മിംസ്തവ ഖലു ഗദായാം ദിതിഭുവോ ഗദാഘാതാദ്ഭൂമൌ ഝടിതി പതിതായാമഹഹ! ഭോഃ । മൃദുസ്മേരാസ്യസ്ത്വം ദനുജകുലനിര്മൂലനചണം മഹാചക്രം സ്മൃത്വാ കരഭുവി ദധാനോ രുരുചിഷേ ॥5॥
തതഃ ശൂലം കാലപ്രതിമരുഷി ദൈത്യേ വിസൃജതി ത്വയി ഛിംദത്യേനത് കരകലിതചക്രപ്രഹരണാത് । സമാരുഷ്ടോ മുഷ്ട്യാ സ ഖലു വിതുദംസ്ത്വാം സമതനോത് ഗലന്മായേ മായാസ്ത്വയി കില ജഗന്മോഹനകരീഃ ॥6॥
ഭവച്ചക്രജ്യോതിഷ്കണലവനിപാതേന വിധുതേ തതോ മായാചക്രേ വിതതഘനരോഷാംധമനസമ് । ഗരിഷ്ഠാഭിര്മുഷ്ടിപ്രഹൃതിഭിരഭിഘ്നംതമസുരം സ്വപാദാംഗുഷ്ഠേന ശ്രവണപദമൂലേ നിരവധീഃ ॥7॥
Offered for worship and study, not as prediction. Non-commercial.
More devotional texts
മഹാകായഃ സോഽയം തവ ചരണപാതപ്രമഥിതോ ഗലദ്രക്തോ വക്ത്രാദപതദൃഷിഭിഃ ശ്ലാഘിതഹതിഃ । തദാ ത്വാമുദ്ദാമപ്രമദഭരവിദ്യോതിഹൃദയാ മുനീംദ്രാഃ സാംദ്രാഭിഃ സ്തുതിഭിരനുവന്നധ്വരതനുമ് ॥8॥
ത്വചി ഛംദോ രോമസ്വപി കുശഗണശ്ചക്ഷുഷി ഘൃതം ചതുര്ഹോതാരോഽംഘ്രൌ സ്രുഗപി വദനേ ചോദര ഇഡാ । ഗ്രഹാ ജിഹ്വായാം തേ പരപുരുഷ കര്ണേ ച ചമസാ വിഭോ സോമോ വീര്യം വരദ ഗലദേശേഽപ്യുപസദഃ ॥9॥
മുനീംദ്രൈരിത്യാദിസ്തവനമുഖരൈര്മോദിതമനാ മഹീയസ്യാ മൂര്ത്യാ വിമലതരകീര്ത്യാ ച വിലസന് । സ്വധിഷ്ണ്യം സംപ്രാപ്തഃ സുഖരസവിഹാരീ മധുരിപോ നിരുംധ്യാ രോഗം മേ സകലമപി വാതാലയപതേ ॥10॥
Browse Related Categories: