ശിവാനംദ ലഹരി

ഗഭീരേ കാസാരേ വിശതി വിജനേ ഘോരവിപിനേ വിശാലേ ശൈലേ ച ഭ്രമതി കുസുമാര്ഥം ജഡമതിഃ । സമര്പ്യൈകം ചേതഃ സരസിജമു-മാനാഥ ഭവതേ സുഖേ-നാവസ്ഥാതും ജന ഇഹ ന ജാനാതി കിമഹോ ॥ 9 ॥

നരത്വം ദേവത്വം നഗവന-മൃഗത്വം മശകതാ പശുത്വം കീടത്വം ഭവതു വിഹഗത്വാദി ജനനമ് । സദാ ത്വത്പാദാബ്ജ-സ്മരണ-പരമാനംദലഹരീ- -വിഹാരാസക്തം ചേദ്ധൃദയമിഹ കിം തേന വപുഷാ ॥ 10 ॥

വടുർവാ ഗേഹീ വാ യതിരപി ജടീ വാ തദിതരോ നരോ വാ യഃ കശ്ചിദ്ഭവതു ഭവ കിം തേന ഭവതി । യദീയം ഹൃത്പദ്മം യദി ഭവദധീനം പശുപതേ തദീയസ്ത്വം ശംഭോ ഭവസി ഭവഭാരം ച വഹസി ॥ 11 ॥

ഗുഹായാം ഗേഹേ വാ ബഹിരപി വനേ വാഽദ്രിശിഖരേ ജലേ വാ വഹ്നൌ വാ വസതു വസതേഃ കിം വദ ഫലമ് । സദാ യസ്യൈവാംതഃ-കരണമപി ശംഭോ തവ പദേ സ്ഥിതം ചേദ്യോഗോഽസൌ സ ച പരമയോഗീ സ ച സുഖീ ॥ 12 ॥

അസാരേ സംസാരേ നിജ-ഭജനദൂരേ ജഡധിയാ ഭ്രമംതം മാമംധം പരമകൃപയാ പാതുമുചിതമ് । മദന്യഃ കോ ദീനസ്തവ കൃപണ-രക്ഷാതിനിപുണ- [രക്ഷാതിനിപുണഃ ത്വദന്യഃ] -സ്ത്വദന്യഃ കോ വാ മേ ത്രിജഗതി ശരണ്യഃ പശുപതേ ॥ 13 ॥

പ്രഭുസ്ത്വം ദീനാനാം ഖലു പരമബംധുഃ പശുപതേ പ്രമുഖ്യോഽഹം തേഷാമപി കിമുത ബംധുത്വമനയോഃ । ത്വയൈവ ക്ഷംതവ്യാഃ ശിവ മദപരാധാശ്ച സകലാഃ പ്രയത്നാ-ത്കര്തവ്യം മദവനമിയം ബംധുസരണിഃ ॥ 14 ॥

ഉപേക്ഷാ നോ ചേത്കിം ന ഹരസി ഭവദ്ധ്യാന-വിമുഖാം ദുരാശാ-ഭൂയിഷ്ഠാം വിധിലിപി-മശക്തോ യദി ഭവാന് । ശിരസ്തദ്വൈധാത്രം നനഖലു സുവൃത്തം പശുപതേ കഥം വാ നിര്യത്നം കരനഖ-മുഖേനൈവ ലുലിതമ് ॥ 15 ॥

വിരിംചി-ര്ദീര്ഘായു-ര്ഭവതു ഭവതാ തത്പരശിര- [തത്പരശിരഃ ചതുഷ്കം] -ശ്ചതുഷ്കം സംരക്ഷ്യം സ ഖലു ഭുവി ദൈന്യം ലിഖിതവാന് । വിചാരഃ കോ വാ മാം വിശദ കൃപയാ പാതി ശിവ തേ കടാക്ഷവ്യാപാരഃ സ്വയമപി ച ദീനാവനപരഃ ॥ 16 ॥

ഫലാദ്വാ പുണ്യാനാം മയി കരുണയാ വാ ത്വയി വിഭോ പ്രസന്നേഽപി സ്വാമിന് ഭവദമല-പാദാബ്ജ-യുഗളമ് । കഥം പശ്യേയം മാം സ്ഥഗയതി നമഃ സംഭ്രമജുഷാം നിലിംപാനാം ശ്രേണി-ര്നിജ-കനക-മാണിക്യ-മകുടൈഃ ॥ 17 ॥

ത്വമേകോ ലോകാനാം പരമഫലദോ ദിവ്യപദവീം വഹംതസ്ത്വന്മൂലാം പുനരപി ഭജംതേ ഹരിമുഖാഃ । കിയദ്വാ ദാക്ഷിണ്യം തവ ശിവ മദാശാ ച കിയതീ കദാ വാ മദ്രക്ഷാം വഹസി കരുണാ-പൂരിതദൃശാ ॥ 18 ॥

ദുരാശാ-ഭൂയിഷ്ഠേ ദുരധിപ-ഗൃഹദ്വാര-ഘടകേ ദുരംതേ സംസാരേ ദുരിതനിലയേ ദുഃഖജനകേ । മദായാസം കിം ന വ്യപനയസി കസ്യോപ-കൃതയേ വദേയം പ്രീതിശ്ചേത്തവ ശിവ കൃതാര്ഥാഃ ഖലു വയമ് ॥ 19 ॥

സദാ മോഹാടവ്യാം ചരതി യുവതീനാം കുചഗിരൌ നടത്യാശാ-ശാഖാ-സ്വടതി ഝടിതി സ്വൈരമഭിതഃ । കപാലിന് ഭിക്ഷോ മേ ഹൃദയ-കപിമത്യംത-ചപലം ദൃഢം ഭക്ത്യാ ബദ്ധ്വാ ശിവ ഭവദധീനം കുരു വിഭോ ॥ 20 ॥

ധൃതി-സ്തംഭാധാരാം ദൃഢ-ഗുണ-നിബദ്ധാം സഗമനാം വിചിത്രാം പദ്മാഢ്യാം പ്രതിദിവസ-സന്മാര്ഗ-ഘടിതാമ് । സ്മരാരേ മച്ചേതഃ-സ്ഫുട-പടകുടീം പ്രാപ്യ വിശദാം ജയ സ്വാമിന് ശക്ത്യാ സഹ ശിവ ഗണൈഃ സേവിത വിഭോ ॥ 21 ॥

പ്രലോഭാദ്യൈരര്ഥാഹരണ-പരതംത്രോ ധനിഗൃഹേ [പ്രലോഭാദ്യൈഃ അര്ഥാഹരണ-പരതംത്രോ] പ്രവേശോദ്യുക്തഃ സന് ഭ്രമതി ബഹുധാ തസ്കരപതേ । ഇമം ചേതശ്ചോരം കഥമിഹ സഹേ ശംകര വിഭോ തവാധീനം കൃത്വാ മയി നിരപരാധേ കുരു കൃപാമ് ॥ 22 ॥

കരോമി ത്വത്പൂജാം സപദി സുഖദോ മേ ഭവ വിഭോ വിധിത്വം വിഷ്ണുത്വം ദിശസി ഖലു തസ്യാഃ ഫലമിതി । പുനശ്ച ത്വാം ദ്രഷ്ടും ദിവി ഭുവി വഹന്പക്ഷി-മൃഗതാ- -മദൃഷ്ട്വാ തത്ഖേദം കഥമിഹ സഹേ ശംകര വിഭോ ॥ 23 ॥

കദാ വാ കൈലാസേ കനകമണിസൌധേ സഹ ഗണൈ- [സഹ ഗണൈഃ വസന്] -ർവസന് ശംഭോരഗ്രേ സ്ഫുട-ഘടിത-മൂര്ധാംജലിപുടഃ । വിഭോ സാംബ സ്വാമി-ന്പരമശിവ പാഹീതി നിഗദ- -ന്വിധാതൄണാം കല്പാന് ക്ഷണമിവ വിനേഷ്യാമി സുഖതഃ ॥ 24 ॥

സ്തവൈ-ര്ബ്രഹ്മാദീനാം ജയജയ-വചോഭിര്നിയമിനാം ഗണാനാം കേളീഭിര്മദകലമഹോക്ഷസ്യ കകുദി । [കേളീഭിഃ മദകല-മഹോക്ഷസ്യ] സ്ഥിതം നീലഗ്രീവം ത്രിനയന-മുമാശ്ലിഷ്ട-വപുഷം കദാ ത്വാം പശ്യേയം കരധൃത-മൃഗം ഖംഡ-പരശുമ് ॥ 25 ॥

കദാ വാ ത്വാം ദൃഷ്ട്വാ ഗിരിശ തവ ഭവ്യാംഘ്രി യുഗളം ഗൃഹീത്വാ ഹസ്താഭ്യാം ശിരസി നയനേ വക്ഷസി വഹന് । സമാ ശ്ലിഷ്യാ ഘ്രായ സ്ഫുട ജലജ ഗംധാന് പരിമലാ- -നലാഭ്യാം ബ്രഹ്മാദ്യൈര്മുദമനുഭവിഷ്യാമി ഹൃദയേ ॥ 26 ॥ [ബ്രഹ്മാദ്യൈഃ മുദ-മനുഭവിഷ്യാമി]

കരസ്ഥേ ഹേമാദ്രൌ ഗിരിശ നികടസ്ഥേ ധനപതൌ ഗൃഹസ്ഥേ സ്വര്ഭൂജാ മര സുരഭി ചിംതാമണിഗണേ । ശിരഃസ്ഥേ ശീതാംശൌ ചരണയുഗളസ്ഥേഽഖിലശുഭേ കമര്ഥം ദാസ്യേഽഹം ഭവതു ഭവദര്ഥം മമ മനഃ ॥ 27 ॥

സാരൂപ്യം തവ പൂജനേ ശിവ മഹാദേവേതി സംകീര്തനേ സാമീപ്യം ശിവഭക്തി-ധുര്യജനതാ-സാംഗത്യ-സംഭാഷണേ ॥ സാലോക്യം ച ചരാചരാത്മകതനുധ്യാനേ ഭവാനീപതേ സായുജ്യം മമ സിദ്ധമത്ര ഭവതി സ്വാമിന് കൃതാര്ഥോഽസ്മ്യഹമ് ॥ 28 ॥

ത്വത്പാദാംബുജമര്ചയാമി പരമം ത്വാം ചിംതയാമ്യന്വഹം ത്വാമീശം ശരണം വ്രജാമി വചസാ ത്വാമേവ യാചേ വിഭോ । വീക്ഷാം മേ ദിശ ചാക്ഷുഷീം സകരുണാം ദിവ്യൈശ്ചിരം പ്രാര്ഥിതാം ശംഭോ ലോകഗുരോ മദീയമനസഃ സൌഖ്യോപദേശം കുരു ॥ 29 ॥

വസ്ത്രോദ്ധൂതവിധൌ സഹസ്രകരതാ പുഷ്പാര്ചനേ വിഷ്ണുതാ ഗംധേ ഗംധവഹാത്മതാഽന്നപചനേ ബര്ഹിര്മുഖാധ്യക്ഷതാ । പാത്രേ കാംചനഗര്ഭതാസ്തി മയി ചേദ്ബാലേംദുചൂഡാമണേ ശുശ്രൂഷാം കരവാണി തേ പശുപതേ സ്വാമിംസ്ത്രിലോകീഗുരോ ॥ 30 ॥

നാലം വാ പരമോപകാരകമിദം ത്വേകം പശൂനാം പതേ പശ്യന് കുക്ഷിഗതാംശ്ചരാചരഗണാന് ബാഹ്യസ്ഥിതാന് രക്ഷിതുമ് । സർവാമര്ത്യപലായനൌഷധമതിജ്വാലാകരം ഭീകരം നിക്ഷിപ്തം ഗരളം ഗളേ ന ഗിളിതം നോദ്ഗീര്ണമേവ ത്വയാ ॥ 31 ॥

ജ്വാലോഗ്രഃ സകലാമരാതിഭയദഃ ക്ഷ്വേളഃ കഥം വാ ത്വയാ ദൃഷ്ടഃ കിം ച കരേ ധൃതഃ കരതലേ കിം പക്വജംബൂഫലമ് । ജിഹ്വായാം നിഹിതശ്ച സിദ്ധഘുടികാ വാ കംഠദേശേ ഭൃതഃ കിം തേ നീലമണിർവിഭൂഷണമയം ശംഭോ മഹാത്മന് വദ ॥ 32 ॥

നാലം വാ സകൃദേവ ദേവ ഭവതഃ സേവാ നതിർവാ നുതിഃ പൂജാ വാ സ്മരണം കഥാശ്രവണമപ്യാലോകനം മാദൃശാമ് । സ്വാമിന്നസ്ഥിരദേവതാനുസരണായാസേന കിം ലഭ്യതേ കാ വാ മുക്തിരിതഃ കുതോ ഭവതി ചേത്കിം പ്രാര്ഥനീയം തദാ ॥ 33 ॥

കിം ബ്രൂമസ്തവ സാഹസം പശുപതേ കസ്യാസ്തി ശംഭോ ഭവ- -ദ്ധൈര്യം ചേദൃശമാത്മനഃ സ്ഥിതിരിയം ചാന്യൈഃ കഥം ലഭ്യതേ । ഭ്രശ്യദ്ദേവഗണം ത്രസന്മുനിഗണം നശ്യത്പ്രപംചം ലയം പശ്യന്നിര്ഭയ ഏക ഏവ വിഹരത്യാനംദസാംദ്രോ ഭവാന് ॥ 34 ॥

യോഗക്ഷേമധുരംധരസ്യ സകലശ്രേയഃപ്രദോദ്യോഗിനോ ദൃഷ്ടാദൃഷ്ടമതോപദേശകൃതിനോ ബാഹ്യാംതരവ്യാപിനഃ । സർവജ്ഞസ്യ ദയാകരസ്യ ഭവതഃ കിം വേദിതവ്യം മയാ ശംഭോ ത്വം പരമാംതരംഗ ഇതി മേ ചിത്തേ സ്മരാമ്യന്വഹമ് ॥ 35 ॥

ഭക്തോ ഭക്തിഗുണാവൃതേ മുദമൃതാപൂര്ണേ പ്രസന്നേ മനഃ കുംഭേ സാംബ തവാംഘ്രിപല്ലവയുഗം സംസ്ഥാപ്യ സംവിത്ഫലമ് । സത്വം മംത്രമുദീരയന്നിജശരീരാഗാരശുദ്ധിം വഹന് പുണ്യാഹം പ്രകടീകരോമി രുചിരം കള്യാണമാപാദയന് ॥ 36 ॥

ആമ്നായാംബുധിമാദരേണ സുമനഃസംഘാഃ സമുദ്യന്മനോ [സമുദ്യന്മനഃ] മംഥാനം ദൃഢഭക്തിരജ്ജുസഹിതം കൃത്വാ മഥിത്വാ തതഃ । സോമം കല്പതരും സുപർവസുരഭിം ചിംതാമണിം ധീമതാം നിത്യാനംദസുധാം നിരംതരരമാസൌഭാഗ്യമാതന്വതേ ॥ 37 ॥

പ്രാക്പുണ്യാചലമാര്ഗദര്ശിതസുധാമൂര്തിഃ പ്രസന്നഃ ശിവഃ സോമഃ സദ്ഗണസേവിതോ മൃഗധരഃ പൂര്ണസ്തമോമോചകഃ । ചേതഃ പുഷ്കരലക്ഷിതോ ഭവതി ചേദാനംദപാഥോനിധിഃ പ്രാഗല്ഭ്യേന വിജൃംഭതേ സുമനസാം വൃത്തിസ്തദാ ജായതേ ॥ 38 ॥

ധര്മോ മേ ചതുരംഘ്രികഃ സുചരിതഃ പാപം വിനാശം ഗതം കാമക്രോധമദാദയോ വിഗളിതാഃ കാലാഃ സുഖാവിഷ്കൃതാഃ । ജ്ഞാനാനംദമഹൌഷധിഃ സുഫലിതാ കൈവല്യനാഥേ സദാ മാന്യേ മാനസപുംഡരീകനഗരേ രാജാവതംസേ സ്ഥിതേ ॥ 39 ॥

ധീയംത്രേണ വചോഘടേന കവിതാകുല്യോപകുല്യാക്രമൈ- [കവിതാകുല്യോപകുല്യാക്രമൈഃ] -രാനീതൈശ്ച സദാശിവസ്യ ചരിതാംഭോരാശിദിവ്യാമൃതൈഃ । ഹൃത്കേദാരയുതാശ്ച ഭക്തികലമാഃ സാഫല്യമാതന്വതേ ദുര്ഭിക്ഷാന്മമ സേവകസ്യ ഭഗവന്വിശ്വേശ ഭീതിഃ കുതഃ ॥ 40 ॥

പാപോത്പാതവിമോചനായ രുചിരൈശ്വര്യായ മൃത്യുംജയ സ്തോത്രധ്യാനനതിപ്രദക്ഷിണസപര്യാലോകനാകര്ണനേ । ജിഹ്വാചിത്തശിരോംഘ്രിഹസ്തനയനശ്രോത്രൈരഹം പ്രാര്ഥിതോ മാമാജ്ഞാപയ തന്നിരൂപയ മുഹുര്മാമേവ മാ മേഽവചഃ ॥ 41 ॥

ഗാംഭീര്യം പരിഖാപദം ഘനധൃതിഃ പ്രാകാര ഉദ്യദ്ഗുണ- [ഉദ്യദ്ഗുണസ്തൊമഃ] -സ്തോമശ്ചാപ്തബലം ഘനേംദ്രിയചയോ ദ്വാരാണി ദേഹേ സ്ഥിതഃ । വിദ്യാ വസ്തുസമൃദ്ധിരിത്യഖിലസാമഗ്രീസമേതേ സദാ ദുര്ഗാതിപ്രിയദേവ മാമകമനോദുര്ഗേ നിവാസം കുരു ॥ 42 ॥

മാ ഗച്ഛ ത്വമിതസ്തതോ ഗിരിശ ഭോ മയ്യേവ വാസം കുരു സ്വാമിന്നാദികിരാത മാമകമനഃകാംതാരസീമാംതരേ । വര്തംതേ ബഹുശോ മൃഗാ മദജുഷോ മാത്സര്യമോഹാദയ- [ മാത്സര്യമോഹാദയഃ] -സ്താന്ഹത്വാ മൃഗയാവിനോദരുചിതാ ലാഭം ച സംപ്രാപ്സ്യസി ॥ 43 ॥

കരലഗ്നമൃഗഃ കരീംദ്രഭംഗോ ഘനശാര്ദൂലവിഖംഡനോഽസ്തജംതുഃ । ഗിരിശോ വിശദാകൃതിശ്ച ചേതഃ- -കുഹരേ പംചമുഖോഽസ്തി മേ കുതോ ഭീഃ ॥ 44 ॥

ഛംദഃ ശാഖിശിഖാന്വിതൈര് [ശാഖിശിഖാന്വിതൈരഃ] ദ്വിജവരൈഃ സംസേവിതേ ശാശ്വതേ സൌഖ്യാപാദിനി ഖേദഭേദിനി സുധാസാരൈഃ ഫലൈര്ദീപിതേ । ചേതഃപക്ഷിശിഖാമണേ ത്യജ വൃഥാ അംചാരമന്യൈരലം നിത്യം ശംകര പാദപദ്മയുഗളീനീഡേ വിഹാരം കുരു ॥ 45 ॥

ആകീര്ണേ നഖരാജികാംതിവിഭവൈ [നഖരാജികാംതിവിഭവൈഃ] രുദ്യത്സുധാവൈഭവൈ-[രുദ്യത്സുധാവൈഭവൈഃ] -രാധൌതേഽപി ച പദ്മരാഗലലിതേ ഹംസവ്രജൈരാശ്രിതേ । നിത്യം ഭക്തിവധൂഗണൈശ്ച രഹസി സ്വേച്ഛാവിഹാരം കുരു സ്ഥിത്വാ മാനസരാജഹംസ ഗിരിജാനാഥാംഘ്രിസൌധാംതരേ ॥ 46 ॥

ശംഭുധ്യാന വസംതസംഗിനി ഹൃദാരാമേഽഘജീര്ണച്ഛദാഃ സ്രസ്താ ഭക്തിലതാച്ഛടാ വിലസിതാഃ പുണ്യപ്രവാളശ്രിതാഃ । ദീപ്യംതേ ഗുണകോരകാ ജപവചഃപുഷ്പാണി സദ്വാസനാ ജ്ഞാനാനംദ സുധാമരംദലഹരീ സംവിത്ഫലാഭ്യുന്നതിഃ ॥ 47 ॥

നിത്യാനംദരസാലയം സുരമുനിസ്വാംതാംബുജാതാശ്രയം സ്വച്ഛം സദ്ദ്വിജസേവിതം കലുഷഹൃത്സദ്വാസനാ വിഷ്കൃതമ് । ശംഭുധ്യാന സരോവരം വ്രജ മനോഹം സാവതംസ സ്ഥിരം കിം ക്ഷുദ്രാ ശ്രയപല്വല ഭ്രമണ സംജാതശ്രമം പ്രാപ്സ്യസി ॥ 48 ॥

ആനംദാമൃത പൂരിതാ ഹരപദാം ഭോജാ ലവാലോദ്യതാ സ്ഥൈര്യോപഘ്നമുപേത്യ ഭക്തിലതികാ ശാഖോപ ശാഖാന്വിതാ । ഉച്ഛൈര് മാനസ കായമാന പടലീമാക്രമ്യ നിഷ്കല്മഷാ നിത്യാഭീഷ്ട ഫലപ്രദാ ഭവതു മേ സത്കര്മ സംവര്ധിതാ ॥ 49 ॥

സംധ്യാ രംഭ വിജൃംഭിതം ശ്രുതിശിരഃ സ്ഥാനാംതരാധി ഷ്ഠിതം സപ്രേമ ഭ്രമരാഭിരാമം അസകൃത് സദ്വാസനാ ശോഭിതമ് । ഭോഗീംദ്രാ ഭരണം സമസ്തസുമനഃ പൂജ്യം ഗുണാവിഷ്കൃതം സേവേ ശ്രീഗിരി മല്ലികാര്ജുന മഹാലിംഗം ശിവാലിംഗിതമ് ॥ 50 ॥

ഭൃംഗീച്ഛാ നടനോത്കടഃ കരമദഗ്രാഹീ സ്ഫുരന് മാധവാ- [സ്ഫുരന് മാധവാവ്ഹ്ലാദോ] -ഹ്ലാദോ നാദയുതോ മഹാസിതവപുഃ പംചേഷുണാ ചാദൃതഃ । സത്പക്ഷഃ സുമനോ വനേഷു സ പുനഃ സാക്ഷാന്മദീയേ മനോ- -രാജീവേ ഭ്രമരാധിപോ വിഹരതാം ശ്രീശൈലവാസീ വിഭുഃ ॥ 51 ॥

കാരുണ്യാമൃത വര്ഷിണം ഘനവിപദ്ഗ്രീഷ്മച് ഛിദാകര്മഠം വിദ്യാസസ്യ ഫലോദയായ സുമനഃ സംസേവ്യ മിച്ഛാകൃതിമ് । നൃത്യദ് ഭക്ത മയൂരമദ്രി നിലയം ചംചജ്ജടാമംഡലം ശംഭോ വാംഛതി നീലകംധര സദാ ത്വാം മേ മനശ്ചാതകഃ ॥ 52 ॥

ആകാശേന ശിഖീ സമസ്തഫണിനാം നേത്രാ കലാപീ നതാ-[നതാനുഗ്രാഹി] -നുഗ്രാഹി പ്രണവോപദേ ശനിനദൈഃ കേകീതി യോ ഗീയതേ । ശ്യാമാം ശൈലസമുദ്ഭവാം ഘനരുചിം ദൃഷ്ട്വാ നടംതം മുദാ വേദാംതോപവനേ വിഹാരരസികം തം നീലകംഠം ഭജേ ॥ 53 ॥

സംധ്യാ ഘര്മദിനാത്യയോ ഹരികരാഘാത പ്രഭൂതാനക- [പ്രഭൂതാനകധ്വാനോ ] -ധ്വാനോ വാരിദഗര്ജിതം ദിവിഷദാം ദൃഷ്ടിച്ഛടാ ചംചലാ । ഭക്താനാം പരിതോഷബാഷ്പ വിതതിര് വൃഷ്ടിര് മയൂരീ ശിവാ യസ്മിന്നുജ്ജ്വല താംഡവം വിജയതേ തം നീലകംഠം ഭജേ ॥ 54 ॥ ആദ്യായാമിത തേജസേ ശ്രുതിപദൈർവേദ്യായ സാധ്യായ തേ വിദ്യാനംദമയാത്മനേ ത്രിജഗതഃ സംരക്ഷണോദ്യോഗിനേ । ധ്യേയായാഖിലയോഗിഭിഃ സുരഗണൈര്ഗേയായ മായാവിനേ സമ്യക്താംഡവ സംഭ്രമായ ജടിനേ സേയം നതിഃ ശംഭവേ ॥ 55 ॥

നിത്യായ ത്രിഗുണാത്മനേ പുരജിതേ കാത്യായനീ ശ്രേയസേ സത്യായാദി കുടുംബിനേ മുനിമനഃ പ്രത്യക്ഷ ചിന്മൂര്തയേ । മായാസൃഷ്ട ജഗത്ത്രയായ സകലാമ്നായാംതസംചാരിണേ സായം താംഡവ സംഭ്രമായ ജടിനേ സേയം നതിഃ ശംഭവേ ॥ 56 ॥

നിത്യം സ്വോദരപോഷണായ സകലാനുദ്ദിശ്യ വിത്താശയാ വ്യര്ഥം പര്യടനം കരോമി ഭവതഃ സേവാം ന ജാനേ വിഭോ । മജ്ജന്മാംതര പുണ്യ പാക ബലതസ്ത്വം ശർവ സർവാംതര- [സർവാംതരഃ] -സ്തിഷ്ഠസ്യേവ ഹി തേന വാ പശുപതേ തേ രക്ഷണീയോഽസ്മ്യഹമ് ॥ 57 ॥

ഏകോ വാരിജ ബാംധവഃ ക്ഷിതിനഭോ വ്യാപ്തം തമോ മംഡലം ഭിത്ത്വാ ലോചന ഗോചരോഽപി ഭവതി ത്വം കോടി സൂര്യപ്രഭഃ । വേദ്യഃ കിം ന ഭവസ്യഹോ ഘനതരം കീദൃഗ്ഭവേന്മത്തമ- [കീദൃഗ്ഭവേന്മത്തമഃ] -സ്തത്സർവം [തത്സർവം] വ്യപനീയ മേ പശുപതേ സാക്ഷാത്പ്രസന്നോ ഭവ ॥ 58 ॥

ഹംസഃ പദ്മവനം സമിച്ഛതി യഥാ നീലാംബുദം ചാതകഃ കോകഃ കോകനദപ്രിയം പ്രതിദിനം ചംദ്രം ചകോരസ്തഥാ । ചേതോ വാംഛതി മാമകം പശുപതേ ചിന്മാര്ഗമൃഗ്യം വിഭോ ഗൌരീനാഥ ഭവത്പദാബ്ജ യുഗളം കൈവല്യ സൌഖ്യപ്രദമ് ॥ 59 ॥

രോധസ്തോയഹൃതഃ ശ്രമേണ പഥികശ്ഛായാം തരോർവൃഷ്ടിതോ [തരോർവൃഷ്ടിതഃ] ഭീതഃ സ്വസ്ഥഗൃഹം ഗൃഹസ്ഥമതിഥിര് ദീനഃ പ്രഭും ധാര്മികമ് । ദീപം സംതമസാകുലശ്ച ശിഖിനം ശീതാ വൃതസ്ത്വം തഥാ ചേതഃ സർവഭയാപഹം വ്രജ സുഖം ശംഭോഃ പദാംഭോരുഹമ് ॥ 60 ॥

അംകോലം നിജ-ബീജ-സംതതിരയസ്കാംതോപലം [സംതതിഃ അയസ്കാംതോപലം] സൂചികാ സാധ്വീ നൈജവിഭും ലതാ ക്ഷിതിരുഹം സിംധുഃ സരിദ് വല്ലഭമ് । പ്രാപ്നോതീഹ യഥാ തഥാ പശുപതേഃ പാദാരവിംദ ദ്വയം ചേതോവൃത്തി രുപേത്യ തിഷ്ഠതി സദാ സാ ഭക്തി രിത്യുച്യതേ ॥ 61 ॥

ആനംദാശ്രുഭിരാതനോതി പുലകം നൈര്മല്യതശ്ഛാദനം വാചാ-ശംഖമുഖേ സ്ഥിതൈശ്ച ജഠരാപൂര്തിം ചരിത്രാമൃതൈഃ । രുദ്രാക്ഷൈര് ഹസിതേന ദേവ വപുഷോ രക്ഷാം ഭവദ്ഭാവനാ- -പര്യംകേ വിനിവേശ്യ ഭക്തിജനനീ ഭക്താര്ഭകം രക്ഷതി ॥ 62 ॥

മാര്ഗാവര്തിതപാദുകാ പശുപതേരംഗസ്യ കൂര്ചായതേ ഗംഡൂഷാംബുനിഷേചനം പുരരിപോര്ദിവ്യാഭിഷേകായതേ । കിംചി-ദ്ഭക്ഷിത-മാംസ-ശേഷകബളം നവ്യോപഹാരായതേ ഭക്തിഃ കിം ന കരോത്യഹോ വനചരോ ഭക്താവതംസായതേ ॥ 63 ॥

വക്ഷസ്താഡനമംതകസ്യ കഠിനാപസ്മാരസംമര്ദനം ഭൂഭൃത്പര്യടനം നമത്സുരശിരഃകോടീരസംഘര്ഷണമ് । കര്മേദം മൃദുലസ്യ താവകപദദ്വംദ്വസ്യ കിം വോചിതം മച്ചേതോമണിപാദുകാവിഹരണം ശംഭോ സദാംഗീകുരു ॥ 64 ॥

വക്ഷസ്താഡനശംകയാ വിചലിതോ വൈവസ്വതോ നിര്ജരാഃ കോടീരോജ്ജ്വലരത്നദീപകലികാനീരാജനം കുർവതേ । ദൃഷ്ട്വാ മുക്തിവധൂസ്തനോതി നിഭൃതാശ്ലേഷം ഭവാനീപതേ യച്ചേതസ്തവ പാദപദ്മഭജനം തസ്യേഹ കിം ദുര്ലഭമ് ॥ 65 ॥

ക്രീഡാര്ഥം സൃജസി പ്രപംചമഖിലം ക്രീഡാമൃഗാസ്തേ ജനാഃ യത്കര്മാചരിതം മയാ ച ഭവതഃ പ്രീത്യൈ ഭവത്യേവ തത് । ശംഭോ സ്വസ്യ കുതൂഹലസ്യ കരണം മച്ചേഷ്ടിതം നിശ്ചിതം തസ്മാന്മാമകരക്ഷണം പശുപതേ കര്തവ്യമേവ ത്വയാ ॥ 66 ॥

ബഹുവിധപരിതോഷബാഷ്പപൂര- -സ്ഫുടപുലകാംകിതചാരുഭോഗഭൂമിമ് । ചിരപദഫലകാംക്ഷിസേവ്യമാനാം പരമസദാശിവഭാവനാം പ്രപദ്യേ ॥ 67 ॥

അമിതമുദമൃതം മുഹുര്ദുഹംതീം വിമലഭവത്പദഗോഷ്ഠമാവസംതീമ് । സദയ പശുപതേ സുപുണ്യപാകാം മമ പരിപാലയ ഭക്തിധേനുമേകാമ് ॥ 68 ॥

ജഡതാ പശുതാ കളംകിതാ കുടിലചരത്വം ച നാസ്തി മയി ദേവ । അസ്തി യദി രാജമൌളേ ഭവദാഭരണസ്യ നാസ്മി കിം പാത്രമ് ॥ 69 ॥

അരഹസി രഹസി സ്വതംത്രബുദ്ധ്യാ വരിവസിതും സുലഭഃ പ്രസന്നമൂര്തിഃ । അഗണിതഫലദായകഃ പ്രഭുര്മേ ജഗദധികോ ഹൃദി രാജശേഖരോഽസ്തി ॥ 70 ॥

ആരൂഢഭക്തിഗുണകുംചിതഭാവചാപ- -യുക്തൈഃ ശിവസ്മരണബാണഗണൈരമോഘൈഃ । നിര്ജിത്യ കില്ബിഷരിപൂന്വിജയീ സുധീംദ്രഃ സാനംദമാവഹതി സുസ്ഥിരരാജലക്ഷ്മീമ് ॥ 71 ॥

ധ്യാനാംജനേന സമവേക്ഷ്യ തമഃപ്രദേശം ഭിത്ത്വാ മഹാബലിഭിരീശ്വരനാമമംത്രൈഃ । ദിവ്യാശ്രിതം ഭുജഗഭൂഷണമുദ്വഹംതി യേ പാദപദ്മമിഹ തേ ശിവ തേ കൃതാര്ഥാഃ ॥ 72 ॥

ഭൂദാരതാമുദവഹദ്യദപേക്ഷയാ ശ്രീ- -ഭൂദാര ഏവ കിമതഃ സുമതേ ലഭസ്വ । കേദാരമാകലിതമുക്തിമഹൌഷധീനാം പാദാരവിംദഭജനം പരമേശ്വരസ്യ ॥ 73 ॥

ആശാപാശക്ലേശദുർവാസനാദി- -ഭേദോദ്യുക്തൈര്ദിവ്യഗംധൈരമംദൈഃ । ആശാശാടീകസ്യ പാദാരവിംദം ചേതഃപേടീം വാസിതാം മേ തനോതു ॥ 74 ॥

കള്യാണിനം സരസചിത്രഗതിം സവേഗം സർവേംഗിതജ്ഞമനഘം ധ്രുവലക്ഷണാഢ്യമ് । ചേതസ്തുരംഗമധിരുഹ്യ ചര സ്മരാരേ നേതഃ സമസ്തജഗതാം വൃഷഭാധിരൂഢ ॥ 75 ॥

ഭക്തിര്മഹേശപദപുഷ്കരമാവസംതീ കാദംബിനീവ കുരുതേ പരിതോഷവര്ഷമ് । സംപൂരിതോ ഭവതി യസ്യ മനസ്തടാക- -സ്തജ്ജന്മസസ്യമഖിലം സഫലം ച നാന്യത് ॥ 76 ॥

ബുദ്ധിഃ സ്ഥിരാ ഭവിതുമീശ്വരപാദപദ്മ- -സക്താ വധൂർവിരഹിണീവ സദാ സ്മരംതീ । സദ്ഭാവനാസ്മരണദര്ശനകീര്തനാദി സമ്മോഹിതേവ ശിവമംത്രജപേന വിംതേ ॥ 77 ॥

സദുപചാരവിധിഷ്വനുബോധിതാം സവിനയാം സുഹൃദം സമുപാശ്രിതാമ് । മമ സമുദ്ധര ബുദ്ധിമിമാം പ്രഭോ വരഗുണേന നവോഢവധൂമിവ ॥ 78 ॥

നിത്യം യോഗിമനഃ സരോജദളസംചാരക്ഷമസ്ത്വത്ക്രമഃ ശംഭോ തേന കഥം കഠോരയമരാഡ്വക്ഷഃകവാടക്ഷതിഃ । അത്യംതം മൃദുലം ത്വദംഘ്രിയുഗളം ഹാ മേ മനശ്ചിംതയ- -ത്യേതല്ലോചനഗോചരം കുരു വിഭോ ഹസ്തേന സംവാഹയേ ॥ 79 ॥

ഏഷ്യത്യേഷ ജനിം മനോഽസ്യ കഠിനം തസ്മിന്നടാനീതി മ- -ദ്രക്ഷായൈ ഗിരിസീമ്നി കോമലപദന്യാസഃ പുരാഭ്യാസിതഃ । നോ ചേദ്ദിവ്യഗൃഹാംതരേഷു സുമനസ്തല്പേഷു വേദ്യാദിഷു പ്രായഃ സത്സു ശിലാതലേഷു നടനം ശംഭോ കിമര്ഥം തവ ॥ 80 ॥

കംചിത്കാലമുമാമഹേശ ഭവതഃ പാദാരവിംദാര്ചനൈഃ കംചിദ്ധ്യാനസമാധിഭിശ്ച നതിഭിഃ കംചിത്കഥാകര്ണനൈഃ । കംചിത്കംചിദവേക്ഷണൈശ്ച നുതിഭിഃ കംചിദ്ദശാമീദൃശീം യഃ പ്രാപ്നോതി മുദാ ത്വദര്പിതമനാ ജീവന് സ മുക്തഃ ഖലു ॥ 81 ॥

ബാണത്വം വൃഷഭത്വമര്ധവപുഷാ ഭാര്യാത്വമാര്യാപതേ ഘോണിത്വം സഖിതാ മൃദംഗവഹതാ ചേത്യാദി രൂപം ദധൌ । ത്വത്പാദേ നയനാര്പണം ച കൃതവാംസ്ത്വദ്ദേഹഭാഗോ ഹരിഃ പൂജ്യാത്പൂജ്യതരഃ സ ഏവ ഹി ന ചേത്കോ വാ തദന്യോഽധികഃ ॥ 82 ॥

ജനനമൃതിയുതാനാം സേവയാ ദേവതാനാം ന ഭവതി സുഖലേശഃ സംശയോ നാസ്തി തത്ര । അജനിമമൃതരൂപം സാംബമീശം ഭജംതേ യ ഇഹ പരമസൌഖ്യം തേ ഹി ധന്യാ ലഭംതേ ॥ 83 ॥

ശിവ തവ പരിചര്യാസന്നിധാനായ ഗൌര്യാ ഭവ മമ ഗുണധുര്യാം ബുദ്ധികന്യാം പ്രദാസ്യേ । സകലഭുവനബംധോ സച്ചിദാനംദസിംധോ സദയ ഹൃദയഗേഹേ സർവദാ സംവസ ത്വമ് ॥ 84 ॥

ജലധിമഥനദക്ഷോ നൈവ പാതാളഭേദീ ന ച വനമൃഗയായാം നൈവ ലുബ്ധഃ പ്രവീണഃ । അശനകുസുമഭൂഷാവസ്ത്രമുഖ്യാം സപര്യാം കഥയ കഥമഹം തേ കല്പയാനീംദുമൌളേ ॥ 85 ॥

പൂജാദ്രവ്യസമൃദ്ധയോ വിരചിതാഃ പൂജാം കഥം കുര്മഹേ പക്ഷിത്വം ന ച വാ കിടിത്വമപി ന പ്രാപ്തം മയാ ദുര്ലഭമ് । ജാനേ മസ്തകമംഘ്രിപല്ലവമുമാജാനേ ന തേഽഹം വിഭോ ന ജ്ഞാതം ഹി പിതാമഹേന ഹരിണാ തത്ത്വേന തദ്രൂപിണാ ॥ 86 ॥

അശനം ഗരളം ഫണീ കലാപോ വസനം ചര്മ ച വാഹനം മഹോക്ഷഃ । മമ ദാസ്യസി കിം കിമസ്തി ശംഭോ തവ പാദാംബുജഭക്തിമേവ ദേഹി ॥ 87 ॥

യദാ കൃതാംഭോനിധിസേതുബംധനഃ കരസ്ഥലാധഃകൃതപർവതാധിപഃ । ഭവാനി തേ ലംഘിതപദ്മസംഭവ- -സ്തദാ ശിവാര്ചാസ്തവഭാവനക്ഷമഃ ॥ 88 ॥

നതിഭിര്നുതിഭിസ്ത്വമീശ പൂജാ- -വിധിഭിര്ധ്യാനസമാധിഭിര്ന തുഷ്ടഃ । ധനുഷാ മുസലേന ചാശ്മഭിർവാ വദ തേ പ്രീതികരം തഥാ കരോമി ॥ 89 ॥

വചസാ ചരിതം വദാമി ശംഭോ- -രഹമുദ്യോഗവിധാസു തേഽപ്രസക്തഃ । മനസാകൃതിമീശ്വരസ്യ സേവേ ശിരസാ ചൈവ സദാശിവം നമാമി ॥ 90 ॥

ആദ്യാവിദ്യാ ഹൃദ്ഗതാ നിര്ഗതാസീ- -ദ്വിദ്യാ ഹൃദ്യാ ഹൃദ്ഗതാ ത്വത്പ്രസാദാത് । സേവേ നിത്യം ശ്രീകരം ത്വത്പദാബ്ജം ഭാവേ മുക്തേര്ഭാജനം രാജമൌളേ ॥ 91 ॥

ദൂരീകൃതാനി ദുരിതാനി ദുരക്ഷരാണി ദൌര്ഭാഗ്യദുഃഖദുരഹംകൃതിദുർവചാംസി । സാരം ത്വദീയചരിതം നിതരാം പിബംതം ഗൌരീശ മാമിഹ സമുദ്ധര സത്കടാക്ഷൈഃ ॥ 92 ॥

സോമകളാധരമൌളൌ കോമലഘനകംധരേ മഹാമഹസി । സ്വാമിനി ഗിരിജാനാഥേ മാമകഹൃദയം നിരംതരം രമതാമ് ॥ 93 ॥

സാ രസനാ തേ നയനേ താവേവ കരൌ സ ഏവ കൃതകൃത്യഃ । യാ യേ യൌ യോ ഭര്ഗം വദതീക്ഷേതേ സദാര്ചതഃ സ്മരതി ॥ 94 ॥

അതിമൃദുലൌ മമ ചരണാ- -വതികഠിനം തേ മനോ ഭവാനീശ । ഇതി വിചികിത്സാം സംത്യജ ശിവ കഥമാസീദ്ഗിരൌ തഥാ വേശഃ ॥ 95 ॥

ധൈര്യാംകുശേന നിഭൃതം രഭസാദാകൃഷ്യ ഭക്തിശൃംഖലയാ । പുരഹര ചരണാലാനേ ഹൃദയമദേഭം ബധാന ചിദ്യംത്രൈഃ ॥ 96 ॥

പ്രചരത്യഭിതഃ പ്രഗല്ഭവൃത്ത്യാ മദവാനേഷ മനഃ കരീ ഗരീയാന് । രിഗൃഹ്യ നയേന ഭക്തിരജ്വാ പരമ സ്ഥാണു പദം ദൃഢം നയാമുമ് ॥ 97 ॥ സർവാലംകാരയുക്താം സരളപദയുതാം സാധുവൃത്താം സുവര്ണാം സദ്ഭിഃ സംസ്തൂയമാനാം സരസഗുണയുതാം ലക്ഷിതാം ലക്ഷണാഢ്യാമ് । ഉദ്യദ്ഭൂഷാവിശേഷാമുപഗതവിനയാം ദ്യോതമാനാര്ഥരേഖാം കല്യാണീം ദേവ ഗൌരീപ്രിയ മമ കവിതാകന്യകാം ത്വം ഗൃഹാണ ॥ 98 ॥

ഇദം തേ യുക്തം വാ പരമശിവ കാരുണ്യജലധേ ഗതൌ തിര്യഗ്രൂപം തവ പദശിരോദര്ശനധിയാ । ഹരിബ്രഹ്മാണൌ തൌ ദിവി ഭുവി ചരംതൌ ശ്രമയുതൌ കഥം ശംഭോ സ്വാമിന്കഥയ മമ വേദ്യോഽസി പുരതഃ ॥ 99 ॥

സ്തോത്രേണാലമഹം പ്രവച്മി ന മൃഷാ ദേവാ വിരിംചാദയഃ സ്തുത്യാനാം ഗണനാപ്രസംഗസമയേ ത്വാമഗ്രഗണ്യം വിദുഃ । മാഹാത്മ്യാഗ്രവിചാരണപ്രകരണേ ധാനാതുഷസ്തോമവ- -ദ്ധൂതാസ്ത്വാം വിദുരുത്തമോത്തമഫലം ശംഭോ ഭവത്സേവകാഃ ॥ 100 ॥

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിംദഭഗവത്പൂജ്യപാദശിഷ്യസ്യ ശ്രീമച്ഛംകരഭഗവതഃ കൃതൌ ശിവാനംദലഹരീ ॥

Browse Related Categories: