ശ്രീ ലക്ഷ്മീ നാരായണ ഹൃദയ സ്തോത്രമ്

നാരായണഃ പരം ധാമ ധ്യാനം നാരായണഃ പരഃ । നാരായണ പരോ ധര്മോ നാരായണ നമോഽസ്തു തേ ॥ 3 ॥

നാരായണഃ പരോവേദ്യഃ വിദ്യാ നാരായണഃ പരഃ । വിശ്വം നാരായണഃ സാക്ഷാന്നാരായണ നമോഽസ്തു തേ ॥ 4 ॥

നാരായണാദ്വിധിര്ജാതോ ജാതോ നാരായണാദ്ഭവഃ । ജാതോ നാരായണാദിംദ്രോ നാരായണ നമോഽസ്തു തേ ॥ 5 ॥

രവിര്നാരായണസ്തേജഃ ചംദ്രോ നാരായണോ മഹഃ । വഹ്നിര്നാരായണഃ സാക്ഷാന്നാരായണ നമോഽസ്തു തേ ॥ 6 ॥

നാരായണ ഉപാസ്യഃ സ്യാദ്ഗുരുര്നാരായണഃ പരഃ । നാരായണഃ പരോ ബോധോ നാരായണ നമോഽസ്തു തേ ॥ 7 ॥

നാരായണഃ ഫലം മുഖ്യം സിദ്ധിര്നാരായണഃ സുഖമ് । സേവ്യോനാരായണഃ ശുദ്ധോ നാരായണ നമോഽസ്തു തേ ॥ 8 ॥ [ഹരി]

അഥ പ്രാര്ഥനാദശകമ് । നാരായണ ത്വമേവാസി ദഹരാഖ്യേ ഹൃദി സ്ഥിതഃ । പ്രേരകഃ പ്രേര്യമാണാനാം ത്വയാ പ്രേരിതമാനസഃ ॥ 9 ॥

ത്വദാജ്ഞാം ശിരസാ ധൃത്വാ ജപാമി ജനപാവനമ് । നാനോപാസനമാര്ഗാണാം ഭവകൃദ്ഭാവബോധകഃ ॥ 10 ॥

ഭാവാര്ഥകൃദ്ഭവാതീതോ ഭവ സൌഖ്യപ്രദോ മമ । ത്വന്മായാമോഹിതം വിശ്വം ത്വയൈവ പരികല്പിതമ് ॥ 11 ॥

ത്വദധിഷ്ഠാനമാത്രേണ സാ വൈ സർവാര്ഥകാരിണീ । ത്വമേതാം ച പുരസ്കൃത്യ സർവകാമാന്പ്രദര്ശയ ॥ 12 ॥

ന മേ ത്വദന്യസ്ത്രാതാസ്തി ത്വദന്യന്ന ഹി ദൈവതമ് । ത്വദന്യം ന ഹി ജാനാമി പാലകം പുണ്യവര്ധനമ് ॥ 13 ॥

യാവത്സാംസാരികോ ഭാവോ മനസ്സ്ഥോ ഭാവനാത്മകഃ । താവത്സിദ്ധിര്ഭവേത്സാധ്യാ സർവഥാ സർവദാ വിഭോ ॥ 14 ॥

പാപിനാമഹമേവാഗ്ര്യോ ദയാളൂനാം ത്വമഗ്രണീഃ । ദയനീയോ മദന്യോഽസ്തി തവ കോഽത്ര ജഗത്ത്രയേ ॥ 15 ॥

ത്വയാഹം നൈവ സൃഷ്ടശ്ചേന്ന സ്യാത്തവ ദയാളുതാ । ആമയോ വാ ന സൃഷ്ടശ്ചേദൌഷധസ്യ വൃഥോദയഃ ॥ 16 ॥

പാപസംഘപരിശ്രാംതഃ പാപാത്മാ പാപരൂപധൃത് । ത്വദന്യഃ കോഽത്ര പാപേഭ്യസ്ത്രാതാസ്തി ജഗതീതലേ ॥ 17 ॥

ത്വമേവ മാതാ ച പിതാ ത്വമേവ ത്വമേവ ബംധുശ്ച സഖാ ത്വമേവ । ത്വമേവ സേവ്യശ്ച ഗുരുസ്ത്വമേവ ത്വമേവ സർവം മമ ദേവ ദേവ ॥ 18 ॥

പ്രാര്ഥനാദശകം ചൈവ മൂലാഷ്ടകമതഃ പരമ് । യഃ പഠേച്ഛൃണുയാന്നിത്യം തസ്യ ലക്ഷ്മീഃ സ്ഥിരാ ഭവേത് ॥ 19 ॥

നാരായണസ്യ ഹൃദയം സർവാഭീഷ്ടഫലപ്രദമ് । ലക്ഷ്മീഹൃദയകം സ്തോത്രം യദി ചേത്തദ്വിനാകൃതമ് ॥ 20 ॥

തത്സർവം നിഷ്ഫലം പ്രോക്തം ലക്ഷ്മീഃ ക്രുദ്ധ്യതി സർവദാ । ഏതത്സംകലിതം സ്തോത്രം സർവകാമഫലപ്രദമ് ॥ 21 ॥

ലക്ഷ്മീഹൃദയകം ചൈവ തഥാ നാരായണാത്മകമ് । ജപേദ്യഃ സംകലീകൃത്യ സർവാഭീഷ്ടമവാപ്നുയാത് ॥ 22 ॥

നാരായണസ്യ ഹൃദയമാദൌ ജപ്ത്വാ തതഃ പരമ് । ലക്ഷ്മീഹൃദയകം സ്തോത്രം ജപേന്നാരായണം പുനഃ ॥ 23 ॥

പുനര്നാരായണം ജപ്ത്വാ പുനര്ലക്ഷ്മീനുതിം ജപേത് । പുനര്നാരായണം ജാപ്യം സംകലീകരണം ഭവേത് ॥ 24 ॥

ഏവം മധ്യേ ദ്വിവാരേണ ജപേത്സംകലിതം തു തത് । ലക്ഷ്മീഹൃദയകം സ്തോത്രം സർവകാമപ്രകാശിതമ് ॥ 25 ॥

തദ്വജ്ജപാദികം കുര്യാദേതത്സംകലിതം ശുഭമ് । സർവാന്കാമാനവാപ്നോതി ആധിവ്യാധിഭയം ഹരേത് ॥ 26 ॥

ഗോപ്യമേതത്സദാ കുര്യാന്ന സർവത്ര പ്രകാശയേത് । ഇതി ഗുഹ്യതമം ശാസ്ത്രം പ്രാപ്തം ബ്രഹ്മാദികൈഃ പുരാ ॥ 27 ॥

തസ്മാത്സർവപ്രയത്നേന ഗോപയേത്സാധയേസുധീഃ । യത്രൈതത്പുസ്തകം തിഷ്ഠേല്ലക്ഷ്മീനാരായണാത്മകമ് ॥ 28 ॥

ഭൂതപൈശാചവേതാള ഭയം നൈവ തു സർവദാ । ലക്ഷ്മീഹൃദയകം പ്രോക്തം വിധിനാ സാധയേത്സുധീഃ ॥ 29 ॥

ഭൃഗുവാരേ ച രാത്രൌ ച പൂജയേത്പുസ്തകദ്വയമ് । സർവഥാ സർവദാ സത്യം ഗോപയേത്സാധയേത്സുധീഃ । ഗോപനാത്സാധനാല്ലോകേ ധന്യോ ഭവതി തത്ത്വതഃ ॥ 30 ॥

ഇത്യഥർവരഹസ്യേ ഉത്തരഭാഗേ നാരായണഹൃദയം സംപൂര്ണമ് ।

അഥ ലക്ഷ്മീ ഹൃദയ സ്തോത്രമ്

അസ്യ ശ്രീ മഹാലക്ഷ്മീഹൃദയസ്തോത്ര മഹാമംത്രസ്യ ഭാര്ഗവ ഋഷിഃ, അനുഷ്ടുപാദീനി നാനാഛംദാംസി, ആദ്യാദി ശ്രീമഹാലക്ഷ്മീര്ദേവതാ, ശ്രീം ബീജം, ഹ്രീം ശക്തിഃ, ഐം കീലകം, ആദ്യാദിമഹാലക്ഷ്മീ പ്രസാദസിദ്ധ്യര്ഥം ജപേ വിനിയോഗഃ ॥

ഋഷ്യാദിന്യാസഃ – ഓം ഭാര്ഗവൃഷയേ നമഃ ശിരസി । ഓം അനുഷ്ടുപാദിനാനാഛംദോഭ്യോ നമോ മുഖേ । ഓം ആദ്യാദിശ്രീമഹാലക്ഷ്മീ ദേവതായൈ നമോ ഹൃദയേ । ഓം ശ്രീം ബീജായ നമോ ഗുഹ്യേ । ഓം ഹ്രീം ശക്തയേ നമഃ പാദയോഃ । ഓം ഐം കീലകായ നമോ നാഭൌ । ഓം വിനിയോഗായ നമഃ സർവാംഗേ ।

കരന്യാസഃ – ഓം ശ്രീം അംഗുഷ്ഠാഭ്യാം നമഃ । ഓം ഹ്രീം തര്ജനീഭ്യാം നമഃ । ഓം ഐം മധ്യമാഭ്യാം നമഃ । ഓം ശ്രീം അനാമികാഭ്യാം നമഃ । ഓം ഹ്രീം കനിഷ്ഠികാഭ്യാം നമഃ । ഓം ഐം കരതല കരപൃഷ്ഠാഭ്യാം നമഃ ।

അംഗന്യാസഃ – ഓം ശ്രീം ഹൃദയായ നമഃ । ഓം ഹ്രീം ശിരസേ സ്വാഹാ । ഓം ഐം ശിഖായൈ വഷട് । ഓം ശ്രീം കവചായ ഹുമ് । ഓം ഹ്രീം നേത്രത്രയായ വൌഷട് । ഓം ഐം അസ്ത്രായ ഫട് । ഓം ശ്രീം ഹ്രീം ഐം ഇതി ദിഗ്ബംധഃ ।

അഥ ധ്യാനമ് । ഹസ്തദ്വയേന കമലേ ധാരയംതീം സ്വലീലയാ । ഹാരനൂപുരസംയുക്താം ലക്ഷ്മീം ദേവീം വിചിംതയേ ॥

കൌശേയപീതവസനാമരവിംദനേത്രാം പദ്മദ്വയാഭയവരോദ്യതപദ്മഹസ്താമ് । ഉദ്യച്ഛതാര്കസദൃശീം പരമാംകസംസ്ഥാം ധ്യായേദ്വിധീശനതപാദയുഗാം ജനിത്രീമ് ॥

പീതവസ്ത്രാം സുവര്ണാംഗീം പദ്മഹസ്തദ്വായാന്വിതാമ് । ലക്ഷ്മീം ധ്യാത്വേതി മംത്രേണ സ ഭവേത്പൃഥിവീപതിഃ ॥ മാതുലുംഗം ഗദാം ഖേടം പാണൌ പാത്രം ച ബിഭ്രതീ । നാഗം ലിംഗം ച യോനിം ച ബിഭ്രതീം ചൈവ മൂര്ധനി ॥

[ ഇതി ധ്യാത്വാ മാനസോപചാരൈഃ സംപൂജ്യ । ശംഖചക്രഗദാഹസ്തേ ശുഭ്രവര്ണേ സുവാസിനീ । മമ ദേഹി വരം ലക്ഷ്മീഃ സർവസിദ്ധിപ്രദായിനീ । ഇതി സംപ്രാര്ഥ്യ ഓം ശ്രീം ഹ്രീം ഐം മഹാലക്ഷ്മ്യൈ കമലധാരിണ്യൈ സിംഹവാഹിന്യൈ സ്വാഹാ ഇതി മംത്രം ജപ്ത്വാ പുനഃ പൂർവവദ്ധൃദയാദി ഷഡംഗന്യാസം കൃത്വാ സ്തോത്രം പഠേത് । ]

സ്തോത്രമ് । വംദേ ലക്ഷ്മീം പരമശിവമയീം ശുദ്ധജാംബൂനദാഭാം തേജോരൂപാം കനകവസനാം സർവഭൂഷോജ്ജ്വലാംഗീമ് । ബീജാപൂരം കനകകലശം ഹേമപദ്മം ദധാനാ- -മാദ്യാം ശക്തിം സകലജനനീം വിഷ്ണുവാമാംകസംസ്ഥാമ് ॥ 1 ॥

ശ്രീമത്സൌഭാഗ്യജനനീം സ്തൌമി ലക്ഷ്മീം സനാതനീമ് । സർവകാമഫലാവാപ്തിസാധനൈകസുഖാവഹാമ് ॥ 2 ॥

സ്മരാമി നിത്യം ദേവേശി ത്വയാ പ്രേരിതമാനസഃ । ത്വദാജ്ഞാം ശിരസാ ധൃത്വാ ഭജാമി പരമേശ്വരീമ് ॥ 3 ॥

സമസ്തസംപത്സുഖദാം മഹാശ്രിയം സമസ്തസൌഭാഗ്യകരീം മഹാശ്രിയമ് । സമസ്തകള്യാണകരീം മഹാശ്രിയം ഭജാമ്യഹം ജ്ഞാനകരീം മഹാശ്രിയമ് ॥ 4 ॥

വിജ്ഞാനസംപത്സുഖദാം സനാതനീം വിചിത്രവാഗ്ഭൂതികരീം മനോഹരാമ് । അനംതസംമോദസുഖപ്രദായിനീം നമാമ്യഹം ഭൂതികരീം ഹരിപ്രിയാമ് ॥ 5 ॥

സമസ്തഭൂതാംതരസംസ്ഥിതാ ത്വം സമസ്തഭോക്ത്രീശ്വരി വിശ്വരൂപേ । തന്നാസ്തി യത്ത്വദ്വ്യതിരിക്തവസ്തു ത്വത്പാദപദ്മം പ്രണമാമ്യഹം ശ്രീഃ ॥ 6 ॥

ദാരിദ്ര്യ ദുഃഖൌഘതമോപഹംത്രീ ത്വത്പാദപദ്മം മയി സന്നിധത്സ്വ । ദീനാര്തിവിച്ഛേദനഹേതുഭൂതൈഃ കൃപാകടാക്ഷൈരഭിഷിംച മാം ശ്രീഃ ॥ 7 ॥

അംബ പ്രസീദ കരുണാസുധയാര്ദ്രദൃഷ്ട്യാ മാം ത്വത്കൃപാദ്രവിണഗേഹമിമം കുരുഷ്വ । ആലോകയ പ്രണതഹൃദ്ഗതശോകഹംത്രീ ത്വത്പാദപദ്മയുഗളം പ്രണമാമ്യഹം ശ്രീഃ ॥ 8 ॥

ശാംത്യൈ നമോഽസ്തു ശരണാഗതരക്ഷണായൈ കാംത്യൈ നമോഽസ്തു കമനീയഗുണാശ്രയായൈ । ക്ഷാംത്യൈ നമോഽസ്തു ദുരിതക്ഷയകാരണായൈ ദാത്ര്യൈ നമോഽസ്തു ധനധാന്യസമൃദ്ധിദായൈ ॥ 9 ॥

ശക്ത്യൈ നമോഽസ്തു ശശിശേഖരസംസ്തുതായൈ രത്യൈ നമോഽസ്തു രജനീകരസോദരായൈ । ഭക്ത്യൈ നമോഽസ്തു ഭവസാഗരതാരകായൈ മത്യൈ നമോഽസ്തു മധുസൂദനവല്ലഭായൈ ॥ 10 ॥

ലക്ഷ്മ്യൈ നമോഽസ്തു ശുഭലക്ഷണലക്ഷിതായൈ സിദ്ധ്യൈ നമോഽസ്തു ശിവസിദ്ധസുപൂജിതായൈ । ധൃത്യൈ നമോഽസ്ത്വമിതദുര്ഗതിഭംജനായൈ ഗത്യൈ നമോഽസ്തു വരസദ്ഗതിദായികായൈ ॥ 11 ॥

ദേവ്യൈ നമോഽസ്തു ദിവി ദേവഗണാര്ചിതായൈ ഭൂത്യൈ നമോഽസ്തു ഭുവനാര്തിവിനാശനായൈ । ധാത്ര്യൈ നമോഽസ്തു ധരണീധരവല്ലഭായൈ പുഷ്ട്യൈ നമോഽസ്തു പുരുഷോത്തമവല്ലഭായൈ ॥ 12 ॥

സുതീവ്രദാരിദ്ര്യവിദുഃഖഹംത്ര്യൈ നമോഽസ്തു തേ സർവഭയാപഹംത്ര്യൈ । ശ്രീവിഷ്ണുവക്ഷഃസ്ഥലസംസ്ഥിതായൈ നമോ നമഃ സർവവിഭൂതിദായൈ ॥ 13 ॥

ജയതു ജയതു ലക്ഷ്മീര്ലക്ഷണാലംകൃതാംഗീ ജയതു ജയതു പദ്മാ പദ്മസദ്മാഭിവംദ്യാ । ജയതു ജയതു വിദ്യാ വിഷ്ണുവാമാംകസംസ്ഥാ ജയതു ജയതു സമ്യക്സർവസംപത്കരീ ശ്രീഃ ॥ 14 ॥

ജയതു ജയതു ദേവീ ദേവസംഘാഭിപൂജ്യാ ജയതു ജയതു ഭദ്രാ ഭാര്ഗവീ ഭാഗ്യരൂപാ । ജയതു ജയതു നിത്യാ നിര്മലജ്ഞാനവേദ്യാ ജയതു ജയതു സത്യാ സർവഭൂതാംതരസ്ഥാ ॥ 15 ॥

ജയതു ജയതു രമ്യാ രത്നഗര്ഭാംതരസ്ഥാ ജയതു ജയതു ശുദ്ധാ ശുദ്ധജാംബൂനദാഭാ । ജയതു ജയതു കാംതാ കാംതിമദ്ഭാസിതാംഗീ ജയതു ജയതു ശാംതാ ശീഘ്രമാഗച്ഛ സൌമ്യേ ॥ 16 ॥

യസ്യാഃ കലായാഃ കമലോദ്ഭവാദ്യാ രുദ്രാശ്ച ശക്ര പ്രമുഖാശ്ച ദേവാഃ । ജീവംതി സർവേഽപി സശക്തയസ്തേ പ്രഭുത്വമാപ്താഃ പരമായുഷസ്തേ ॥ 17 ॥

ലിലേഖ നിടിലേ വിധിര്മമ ലിപിം വിസൃജ്യാംതരം ത്വയാ വിലിഖിതവ്യമേതദിതി തത്ഫലപ്രാപ്തയേ । തദംതരഫലേസ്ഫുടം കമലവാസിനീ ശ്രീരിമാം സമര്പയ സമുദ്രികാം സകലഭാഗ്യസംസൂചികാമ് ॥ 18 ॥

കലയാ തേ യഥാ ദേവി ജീവംതി സചരാചരാഃ । തഥാ സംപത്കരേ ലക്ഷ്മി സർവദാ സംപ്രസീദ മേ ॥ 19 ॥

യഥാ വിഷ്ണുര്ധ്രുവേ നിത്യം സ്വകലാം സംന്യവേശയത് । തഥൈവ സ്വകലാം ലക്ഷ്മി മയി സമ്യക് സമര്പയ ॥ 20 ॥

സർവസൌഖ്യപ്രദേ ദേവി ഭക്താനാമഭയപ്രദേ । അചലാം കുരു യത്നേന കലാം മയി നിവേശിതാമ് ॥ 21 ॥

മുദാസ്താം മത്ഫാലേ പരമപദലക്ഷ്മീഃ സ്ഫുടകലാ സദാ വൈകുംഠശ്രീര്നിവസതു കലാ മേ നയനയോഃ । വസേത്സത്യേ ലോകേ മമ വചസി ലക്ഷ്മീർവരകലാ ശ്രിയഃ ശ്വേതദ്വീപേ നിവസതു കലാ മേ സ്വകരയോഃ ॥ 22 ॥

താവന്നിത്യം മമാംഗേഷു ക്ഷീരാബ്ധൌ ശ്രീകലാ വസേത് । സൂര്യാചംദ്രമസൌ യാവദ്യാവല്ലക്ഷ്മീപതിഃ ശ്രിയാഃ ॥ 23 ॥

സർവമംഗളസംപൂര്ണാ സർവൈശ്വര്യസമന്വിതാ । ആദ്യാദി ശ്രീര്മഹാലക്ഷ്മീ ത്വത്കലാ മയി തിഷ്ഠതു ॥ 24 ॥

അജ്ഞാനതിമിരം ഹംതും ശുദ്ധജ്ഞാനപ്രകാശികാ । സർവൈശ്വര്യപ്രദാ മേഽസ്തു ത്വത്കലാ മയി സംസ്ഥിതാ ॥ 25 ॥

അലക്ഷ്മീം ഹരതു ക്ഷിപ്രം തമഃ സൂര്യപ്രഭാ യഥാ । വിതനോതു മമ ശ്രേയസ്ത്വത്കളാ മയി സംസ്ഥിതാ ॥ 26 ॥

ഐശ്വര്യമംഗളോത്പത്തിസ്ത്വത്കലായാം നിധീയതേ । മയി തസ്മാത്കൃതാര്ഥോഽസ്മി പാത്രമസ്മി സ്ഥിതേസ്തവ ॥ 27 ॥

ഭവദാവേശഭാഗ്യാര്ഹോ ഭാഗ്യവാനസ്മി ഭാര്ഗവി । ത്വത്പ്രസാദാത്പവിത്രോഽഹം ലോകമാതര്നമോഽസ്തു തേ ॥ 28 ॥

പുനാസി മാം ത്വത്കലയൈവ യസ്മാ- -ദതഃ സമാഗച്ഛ മമാഗ്രതസ്ത്വമ് । പരം പദം ശ്രീര്ഭവ സുപ്രസന്നാ മയ്യച്യുതേന പ്രവിശാദിലക്ഷ്മീഃ ॥ 29 ॥

ശ്രീവൈകുംഠസ്ഥിതേ ലക്ഷ്മി സമാഗച്ഛ മമാഗ്രതഃ । നാരായണേന സഹ മാം കൃപാദൃഷ്ട്യാഽവലോകയ ॥ 30 ॥

സത്യലോകസ്ഥിതേ ലക്ഷ്മി ത്വം മമാഗച്ഛ സന്നിധിമ് । വാസുദേവേന സഹിതാ പ്രസീദ വരദാ ഭവ ॥ 31 ॥

ശ്വേതദ്വീപസ്ഥിതേ ലക്ഷ്മി ശീഘ്രമാഗച്ഛ സുവ്രതേ । വിഷ്ണുനാ സഹിതേ ദേവി ജഗന്മാതഃ പ്രസീദ മേ ॥ 32 ॥

ക്ഷീരാംബുധിസ്ഥിതേ ലക്ഷ്മി സമാഗച്ഛ സമാധവാ । ത്വത്കൃപാദൃഷ്ടിസുധയാ സതതം മാം വിലോകയ ॥ 33 ॥

രത്നഗര്ഭസ്ഥിതേ ലക്ഷ്മി പരിപൂര്ണേ ഹിരണ്മയേ । സമാഗച്ഛ സമാഗച്ഛ സ്ഥിത്വാഽഽശു പുരതോ മമ ॥ 34 ॥

സ്ഥിരാ ഭവ മഹാലക്ഷ്മി നിശ്ചലാ ഭവ നിര്മലേ । പ്രസന്നേ കമലേ ദേവി പ്രസന്നഹൃദയാ ഭവ ॥ 35 ॥

ശ്രീധരേ ശ്രീമഹാഭൂതേ ത്വദംതഃസ്ഥം മഹാനിധിമ് । ശീഘ്രമുദ്ധൃത്യ പുരതഃ പ്രദര്ശയ സമര്പയ ॥ 36 ॥

വസുംധരേ ശ്രീവസുധേ വസുദോഗ്ധ്രി കൃപാമയേ । ത്വത്കുക്ഷിഗതസർവസ്വം ശീഘ്രം മേ സംപ്രദര്ശയ ॥ 37 ॥

വിഷ്ണുപ്രിയേ രത്നഗര്ഭേ സമസ്തഫലദേ ശിവേ । ത്വദ്ഗര്ഭഗതഹേമാദീന് സംപ്രദര്ശയ ദര്ശയ ॥ 38 ॥

രസാതലഗതേ ലക്ഷ്മി ശീഘ്രമാഗച്ഛ മേ പുരഃ । ന ജാനേ പരമം രൂപം മാതര്മേ സംപ്രദര്ശയ ॥ 39 ॥

ആവിര്ഭവ മനോവേഗാച്ഛീഘ്രമാഗച്ഛ മേ പുരഃ । മാ വത്സ ഭൈരിഹേത്യുക്ത്വാ കാമം ഗൌരിവ രക്ഷ മാമ് ॥ 40 ॥

ദേവി ശീഘ്രം സമാഗച്ഛ ധരണീഗര്ഭസംസ്ഥിതേ । മാതസ്ത്വദ്ഭൃത്യഭൃത്യോഽഹം മൃഗയേ ത്വാം കുതൂഹലാത് ॥ 41 ॥

ഉത്തിഷ്ഠ ജാഗൃഹി ത്വം മേ സമുത്തിഷ്ഠ സുജാഗൃഹി । അക്ഷയാന് ഹേമകലശാന് സുവര്ണേന സുപൂരിതാന് ॥ 42 ॥

നിക്ഷേപാന്മേ സമാകൃഷ്യ സമുദ്ധൃത്യ മമാഗ്രതഃ । സമുന്നതാനനാ ഭൂത്വാ സമാധേഹി ധരാംതരാത് ॥ 43 ॥

മത്സന്നിധിം സമാഗച്ഛ മദാഹിതകൃപാരസാത് । പ്രസീദ ശ്രേയസാം ദോഗ്ധ്രീ ലക്ഷ്മീര്മേ നയനാഗ്രതഃ ॥ 44 ॥

അത്രോപവിശ ലക്ഷ്മി ത്വം സ്ഥിരാ ഭവ ഹിരണ്മയേ । സുസ്ഥിരാ ഭവ സംപ്രീത്യാ പ്രസീദ വരദാ ഭവ ॥ 45 ॥

ആനീതാംസ്തു തഥാ ദേവി നിധീന്മേ സംപ്രദര്ശയ । അദ്യ ക്ഷണേന സഹസാ ദത്ത്വാ സംരക്ഷ മാം സദാ ॥ 46 ॥

മയി തിഷ്ഠ തഥാ നിത്യം യഥേംദ്രാദിഷു തിഷ്ഠസി । അഭയം കുരു മേ ദേവി മഹാലക്ഷ്മീര്നമോഽസ്തു തേ ॥ 47 ॥

സമാഗച്ഛ മഹാലക്ഷ്മി ശുദ്ധജാംബൂനദപ്രഭേ । പ്രസീദ പുരതഃ സ്ഥിത്വാ പ്രണതം മാം വിലോകയ ॥ 48 ॥

ലക്ഷ്മീര്ഭുവം ഗതാ ഭാസി യത്ര യത്ര ഹിരണ്മയീ । തത്ര തത്ര സ്ഥിതാ ത്വം മേ തവ രൂപം പ്രദര്ശയ ॥ 49 ॥

ക്രീഡംതീ ബഹുധാ ഭൂമൌ പരിപൂര്ണകൃപാമയി । മമ മൂര്ധനി തേ ഹസ്തമവിലംബിതമര്പയ ॥ 50 ॥

ഫലദ്ഭാഗ്യോദയേ ലക്ഷ്മി സമസ്തപുരവാസിനീ । പ്രസീദ മേ മഹാലക്ഷ്മി പരിപൂര്ണമനോരഥേ ॥ 51 ॥

അയോധ്യാദിഷു സർവേഷു നഗരേഷു സമാസ്ഥിതേ । വൈഭവൈർവിവിധൈര്യുക്തൈഃ സമാഗച്ഛ മുദാന്വിതേ ॥ 52 ॥

സമാഗച്ഛ സമാഗച്ഛ മമാഗ്രേ ഭവ സുസ്ഥിരാ । കരുണാരസനിഷ്യംദനേത്രദ്വയ വിലാസിനീ ॥ 53 ॥ [നിഷ്പന്ന]

സന്നിധത്സ്വ മഹാലക്ഷ്മി ത്വത്പാണിം മമ മസ്തകേ । കരുണാസുധയാ മാം ത്വമഭിഷിംച്യ സ്ഥിരം കുരു ॥ 54 ॥

സർവരാജഗൃഹേ ലക്ഷ്മി സമാഗച്ഛ ബലാന്വിതേ । [മുദാന്വിതേ] സ്ഥിത്വാഽഽശു പുരതോ മേഽദ്യ പ്രസാദേനാഽഭയം കുരു ॥ 55 ॥

സാദരം മസ്തകേ ഹസ്തം മമ ത്വം കൃപയാര്പയ । സർവരാജഗൃഹേ ലക്ഷ്മി ത്വത്കലാ മയി തിഷ്ഠതു ॥ 56 ॥

ആദ്യാദി ശ്രീമഹാലക്ഷ്മി വിഷ്ണുവാമാംകസംസ്ഥിതേ । പ്രത്യക്ഷം കുരു മേ രൂപം രക്ഷ മാം ശരണാഗതമ് ॥ 57 ॥

പ്രസീദ മേ മഹാലക്ഷ്മി സുപ്രസീദ മഹാശിവേ । അചലാ ഭവ സംപ്രീത്യാ സുസ്ഥിരാ ഭവ മദ്ഗൃഹേ ॥ 58 ॥

യാവത്തിഷ്ഠംതി വേദാശ്ച യാവച്ചംദ്രദിവാകരൌ । യാവദ്വിഷ്ണുശ്ച യാവത്ത്വം താവത്കുരു കൃപാം മയി ॥ 59 ॥

ചാംദ്രീകലാ യഥാ ശുക്ലേ വര്ധതേ സാ ദിനേ ദിനേ । തഥാ ദയാ തേ മയ്യേവ വര്ധതാമഭിവര്ധതാമ് ॥ 60 ॥

യഥാ വൈകുംഠനഗരേ യഥാ വൈ ക്ഷീരസാഗരേ । തഥാ മദ്ഭവനേ തിഷ്ഠ സ്ഥിരം ശ്രീവിഷ്ണുനാ സഹ ॥ 61 ॥

യോഗിനാം ഹൃദയേ നിത്യം യഥാ തിഷ്ഠസി വിഷ്ണുനാ । തഥാ മദ്ഭവനേ തിഷ്ഠ സ്ഥിരം ശ്രീവിഷ്ണുനാ സഹ ॥ 62 ॥

നാരായണസ്യ ഹൃദയേ ഭവതീ യഥാസ്തേ നാരായണോഽപി തവ ഹൃത്കമലേ യഥാസ്തേ । നാരായണസ്ത്വമപി നിത്യമുഭൌ തഥൈവ തൌ തിഷ്ഠതാം ഹൃദി മമാപി ദയാന്വിതൌ ശ്രീഃ ॥ 63 ॥

വിജ്ഞാനവൃദ്ധിം ഹൃദയേ കുരു ശ്രീഃ സൌഭാഗ്യവൃദ്ധിം കുരു മേ ഗൃഹേ ശ്രീഃ । ദയാസുവൃദ്ധിം കുരുതാം മയി ശ്രീഃ സുവര്ണവൃദ്ധിം കുരു മേ ഗൃഹേ ശ്രീഃ ॥ 64 ॥

ന മാം ത്യജേഥാഃ ശ്രിതകല്പവല്ലി സദ്ഭക്തചിംതാമണികാമധേനോ । വിശ്വസ്യ മാതര്ഭവ സുപ്രസന്നാ ഗൃഹേ കലത്രേഷു ച പുത്രവര്ഗേ ॥ 65 ॥

ആദ്യാദിമായേ ത്വമജാംഡബീജം ത്വമേവ സാകാരനിരാകൃതിസ്ത്വമ് । ത്വയാ ധൃതാശ്ചാബ്ജഭവാംഡസംഘാ- -ശ്ചിത്രം ചരിത്രം തവ ദേവി വിഷ്ണോഃ ॥ 66 ॥

ബ്രഹ്മരുദ്രാദയോ ദേവാ വേദാശ്ചാപി ന ശക്നുയുഃ । മഹിമാനം തവ സ്തോതും മംദോഽഹം ശക്നുയാം കഥമ് ॥ 67 ॥

അംബ ത്വദ്വത്സവാക്യാനി സൂക്താസൂക്താനി യാനി ച । താനി സ്വീകുരു സർവജ്ഞേ ദയാലുത്വേന സാദരമ് ॥ 68 ॥

ഭവതീം ശരണം ഗത്വാ കൃതാര്ഥാഃ സ്യുഃ പുരാതനാഃ । ഇതി സംചിംത്യ മനസാ ത്വാമഹം ശരണം വ്രജേ ॥ 69 ॥

അനംതാ നിത്യസുഖിനസ്ത്വദ്ഭക്താസ്ത്വത്പരായണാഃ । ഇതി വേദപ്രമാണാദ്ധി ദേവി ത്വാം ശരണം വ്രജേ ॥ 70 ॥

തവ പ്രതിജ്ഞാ മദ്ഭക്താ ന നശ്യംതീത്യപി ക്വചിത് । ഇതി സംചിംത്യ സംചിംത്യ പ്രാണാന് സംധാരയാമ്യഹമ് ॥ 71 ॥

ത്വദധീനസ്ത്വഹം മാതസ്ത്വത്കൃപാ മയി വിദ്യതേ । യാവത്സംപൂര്ണകാമഃ സ്യാത്താവദ്ദേഹി ദയാനിധേ ॥ 72 ॥

ക്ഷണമാത്രം ന ശക്നോമി ജീവിതും ത്വത്കൃപാം വിനാ । ന ജീവംതീഹ ജലജാ ജലം ത്യക്ത്വാ ജലഗ്രഹാഃ ॥ 73 ॥

യഥാ ഹി പുത്രവാത്സല്യാജ്ജനനീ പ്രസ്നുതസ്തനീ । വത്സം ത്വരിതമാഗത്യ സംപ്രീണയതി വത്സലാ ॥ 74 ॥

യദി സ്യാം തവ പുത്രോഽഹം മാതാ ത്വം യദി മാമകീ । ദയാപയോധരസ്തന്യസുധാഭിരഭിഷിംച മാമ് ॥ 75 ॥

മൃഗ്യോ ന ഗുണലേശോഽപി മയി ദോഷൈകമംദിരേ । പാംസൂനാം വൃഷ്ടിബിംദൂനാം ദോഷാണാം ച ന മേ മതിഃ ॥ 76 ॥

പാപിനാമഹമേവാഗ്ര്യോ ദയാലൂനാം ത്വമഗ്രണീഃ । ദയനീയോ മദന്യോഽസ്തി തവ കോഽത്ര ജഗത്ത്രയേ ॥ 77 ॥

വിധിനാഹം ന സൃഷ്ടശ്ചേന്ന സ്യാത്തവ ദയാലുതാ । ആമയോ വാ ന സൃഷ്ടശ്ചേദൌഷധസ്യ വൃഥോദയഃ ॥ 78 ॥

കൃപാ മദഗ്രജാ കിം തേ അഹം കിം വാ തദഗ്രജഃ । വിചാര്യ ദേഹി മേ വിത്തം തവ ദേവി ദയാനിധേ ॥ 79 ॥

മാതാ പിതാ ത്വം ഗുരുസദ്ഗതിഃ ശ്രീ- -സ്ത്വമേവ സംജീവനഹേതുഭൂതാ । അന്യം ന മന്യേ ജഗദേകനാഥേ ത്വമേവ സർവം മമ ദേവി സത്യേ ॥ 80 ॥

ആദ്യാദിലക്ഷ്മീര്ഭവ സുപ്രസന്നാ വിശുദ്ധവിജ്ഞാനസുഖൈകദോഗ്ധ്രീ । അജ്ഞാനഹംത്രീ ത്രിഗുണാതിരിക്താ പ്രജ്ഞാനനേത്രീ ഭവ സുപ്രസന്നാ ॥ 81 ॥

അശേഷവാഗ്ജാഡ്യമലാപഹംത്രീ നവം നവം സ്പഷ്ടസുവാക്പ്രദായിനീ । മമേഹ ജിഹ്വാഗ്ര സുരംഗനര്തകീ [നര്തിനീ] ഭവ പ്രസന്നാ വദനേ ച മേ ശ്രീഃ ॥ 82 ॥

സമസ്തസംപത്സുവിരാജമാനാ സമസ്തതേജശ്ചയഭാസമാനാ । വിഷ്ണുപ്രിയേ ത്വം ഭവ ദീപ്യമാനാ വാഗ്ദേവതാ മേ നയനേ പ്രസന്നാ ॥ 83 ॥

സർവപ്രദര്ശേ സകലാര്ഥദേ ത്വം പ്രഭാസുലാവണ്യദയാപ്രദോഗ്ധ്രീ । സുവര്ണദേ ത്വം സുമുഖീ ഭവ ശ്രീ- -ര്ഹിരണ്മയീ മേ നയനേ പ്രസന്നാ ॥ 84 ॥

സർവാര്ഥദാ സർവജഗത്പ്രസൂതിഃ സർവേശ്വരീ സർവഭയാപഹംത്രീ । സർവോന്നതാ ത്വം സുമുഖീ ഭവ ശ്രീ- -ര്ഹിരണ്മയീ മേ നയനേ പ്രസന്നാ ॥ 85 ॥

സമസ്തവിഘ്നൌഘവിനാശകാരിണീ സമസ്തഭക്തോദ്ധരണേ വിചക്ഷണാ । അനംതസൌഭാഗ്യസുഖപ്രദായിനീ ഹിരണ്മയീ മേ നയനേ പ്രസന്നാ ॥ 86 ॥

ദേവി പ്രസീദ ദയനീയതമായ മഹ്യം ദേവാധിനാഥഭവദേവഗണാഭിവംദ്യേ । മാതസ്തഥൈവ ഭവ സന്നിഹിതാ ദൃശോര്മേ പത്യാ സമം മമ മുഖേ ഭവ സുപ്രസന്നാ ॥ 87 ॥

മാ വത്സ ഭൈരഭയദാനകരോഽര്പിതസ്തേ മൌലൌ മമേതി മയി ദീനദയാനുകംപേ । മാതഃ സമര്പയ മുദാ കരുണാകടാക്ഷം മാംഗള്യബീജമിഹ നഃ സൃജ ജന്മ മാതഃ ॥ 88 ॥

കടാക്ഷ ഇഹ കാമധുക്തവ മനസ്തു ചിംതാമണിഃ കരഃ സുരതരുഃ സദാ നവനിധിസ്ത്വമേവേംദിരേ । ഭവേ തവ ദയാരസോ മമ രസായനം ചാന്വഹം മുഖം തവ കലാനിധിർവിവിധവാംഛിതാര്ഥപ്രദമ് ॥ 89 ॥

യഥാ രസസ്പര്ശനതോഽയസോഽപി സുവര്ണതാ സ്യാത്കമലേ തഥാ തേ । കടാക്ഷസംസ്പര്ശനതോ ജനാനാ- -മമംഗളാനാമപി മംഗളത്വമ് ॥ 90 ॥

ദേഹീതി നാസ്തീതി വചഃ പ്രവേശാ- -ദ്ഭീതോ രമേ ത്വാം ശരണം പ്രപദ്യേ । അതഃ സദാഽസ്മിന്നഭയപ്രദാ ത്വം സഹൈവ പത്യാ മയി സന്നിധേഹി ॥ 91 ॥

കല്പദ്രുമേണ മണിനാ സഹിതാ സുരമ്യാ ശ്രീസ്തേ കലാ മയി രസേന രസായനേന । ആസ്താം യതോ മമ ശിരഃകരദൃഷ്ടിപാദ- -സ്പൃഷ്ടാഃ സുവര്ണവപുഷഃ സ്ഥിരജംഗമാഃ സ്യുഃ ॥ 92 ॥

ആദ്യാദിവിഷ്ണോഃ സ്ഥിരധര്മപത്നീ ത്വമേവ പത്യാ മയി സന്നിധേഹി । ആദ്യാദിലക്ഷ്മി ത്വദനുഗ്രഹേണ പദേ പദേ മേ നിധിദര്ശനം സ്യാത് ॥ 93 ॥

ആദ്യാദിലക്ഷ്മീഹൃദയം പഠേദ്യഃ സ രാജ്യലക്ഷ്മീമചലാം തനോതി । മഹാദരിദ്രോഽപി ഭവേദ്ധനാഢ്യ- -സ്തദന്വയേ ശ്രീഃ സ്ഥിരതാം പ്രയാതി ॥ 94 ॥

യസ്യ സ്മരണമാത്രേണ തുഷ്ടാ സ്യാദ്വിഷ്ണുവല്ലഭാ । തസ്യാഭീഷ്ടം ദദത്യാശു തം പാലയതി പുത്രവത് ॥ 95 ॥

ഇദം രഹസ്യം ഹൃദയം സർവകാമഫലപ്രദമ് । ജപഃ പംചസഹസ്രം തു പുരശ്ചരണമുച്യതേ ॥ 96 ॥

ത്രികാലമേകകാലം വാ നരോ ഭക്തിസമന്വിതഃ । യഃ പഠേച്ഛൃണുയാദ്വാപി സ യാതി പരമാം ശ്രിയമ് ॥ 97 ॥

മഹാലക്ഷ്മീം സമുദ്ദിശ്യ നിശി ഭാര്ഗവവാസരേ । ഇദം ശ്രീഹൃദയം ജപ്ത്വാ പംചവാരം ധനീ ഭവേത് ॥ 98 ॥

അനേന ഹൃദയേനാന്നം ഗര്ഭിണ്യാ അഭിമംത്രിതമ് । ദദാതി തത്കുലേ പുത്രോ ജായതേ ശ്രീപതിഃ സ്വയമ് ॥ 99 ॥

നരേണ വാഽഥവാ നാര്യാ ലക്ഷ്മീഹൃദയമംത്രിതേ । ജലേ പീതേ ച തദ്വംശേ മംദഭാഗ്യോ ന ജായതേ ॥ 100 ॥

യ ആശ്വിനേ മാസി ച ശുക്ലപക്ഷേ രമോത്സവേ സന്നിഹിതേ സുഭക്ത്യാ । പഠേത്തഥൈകോത്തരവാരവൃദ്ധ്യാ ലഭേത്സ സൌവര്ണമയീം സുവൃഷ്ടിമ് ॥ 101 ॥

യ ഏകഭക്തോഽന്വഹമേകവര്ഷം വിശുദ്ധധീഃ സപ്തതിവാരജാപീ । സ മംദഭാഗ്യോഽപി രമാകടാക്ഷാ- -ദ്ഭവേത്സഹസ്രാക്ഷശതാധികശ്രീഃ ॥ 102 ॥

ശ്രീശാംഘ്രിഭക്തിം ഹരിദാസദാസ്യം പ്രസന്നമംത്രാര്ഥദൃഢൈകനിഷ്ഠാമ് । ഗുരോഃ സ്മൃതിം നിര്മലബോധബുദ്ധിം പ്രദേഹി മാതഃ പരമം പദം ശ്രീഃ ॥ 103 ॥

പൃഥ്വീപതിത്വം പുരുഷോത്തമത്വം വിഭൂതിവാസം വിവിധാര്ഥസിദ്ധിമ് । സംപൂര്ണകീര്തിം ബഹുവര്ഷഭോഗം പ്രദേഹി മേ ലക്ഷ്മി പുനഃ പുനസ്ത്വമ് ॥ 104 ॥

വാദാര്ഥസിദ്ധിം ബഹുലോകവശ്യം വയഃ സ്ഥിരത്വം ലലനാസുഭോഗമ് । പൌത്രാദിലബ്ധിം സകലാര്ഥസിദ്ധിം പ്രദേഹി മേ ഭാര്ഗവി ജന്മജന്മനി ॥ 105 ॥

സുവര്ണവൃദ്ധിം കുരു മേ ഗൃഹേ ശ്രീഃ സുധാന്യവൃദ്ധിം കുരൂ മേ ഗൃഹേ ശ്രീഃ । കല്യാണവൃദ്ധിം കുരു മേ ഗൃഹേ ശ്രീഃ വിഭൂതിവൃദ്ധിം കുരു മേ ഗൃഹേ ശ്രീഃ ॥ 106 ॥

ധ്യായേല്ലക്ഷ്മീം പ്രഹസിതമുഖീം കോടിബാലാര്കഭാസാം വിദ്യുദ്വര്ണാംബരവരധരാം ഭൂഷണാഢ്യാം സുശോഭാമ് । ബീജാപൂരം സരസിജയുഗം ബിഭ്രതീം സ്വര്ണപാത്രം ഭര്ത്രായുക്താം മുഹുരഭയദാം മഹ്യമപ്യച്യുതശ്രീഃ ॥ 107 ॥

ഗുഹ്യാതിഗുഹ്യഗോപ്ത്രീ ത്വം ഗൃഹാണാസ്മത്കൃതം ജപമ് । സിദ്ധിര്ഭവതു മേ ദേവി ത്വത്പ്രസാദാന്മയി സ്ഥിതാ ॥ 108 ॥

ഇതി ശ്രീഅഥർവണരഹസ്യേ ശ്രീലക്ഷ്മീഹൃദയസ്തോത്രം സംപൂര്ണമ് ॥

Browse Related Categories: