സുബ്രഹ്മണ്യ ഭുജംഗ സ്തോത്രമ്

രണഥംസകേ മംജുലേഽത്യംതശോണേ മനോഹാരിലാവണ്യപീയൂഷപൂര്ണേ । മനഃഷട്പദോ മേ ഭവക്ലേശതപ്തഃ സദാ മോദതാം സ്കംദ തേ പാദപദ്മേ ॥ 9 ॥

സുവര്ണാഭദിവ്യാംബരൈര്ഭാസമാനാം ക്വണത്കിംകിണീമേഖലാശോഭമാനാമ് । ലസദ്ധേമപട്ടേന വിദ്യോതമാനം കടിം ഭാവയേ സ്കംദ തേ ദീപ്യമാനാമ് ॥ 10 ॥

പുലിംദേശകന്യാഘനാഭോഗതുംഗ- സ്തനാലിംഗനാസക്തകാശ്മീരരാഗമ് । നമസ്യാമ്യഹം താരകാരേ തവോരഃ സ്വഭക്താവനേ സർവദാ സാനുരാഗമ് ॥ 11 ॥

വിധൌ ക്ലൃപ്തദംഡാന്സ്വലീലാധൃതാംഡാ- ന്നിരസ്തേഭശുംഡാംദ്വിഷത്കാലദംഡാന് । ഹതേംദ്രാരിഷംഡാന്ജഗത്രാണശൌംഡാ- ന്സദാ തേ പ്രചംഡാന്ശ്രയേ ബാഹുദംഡാന് ॥ 12 ॥

സദാ ശാരദാഃ ഷണ്മൃഗാംകാ യദി സ്യുഃ സമുദ്യംത ഏവ സ്ഥിതാശ്ചേത്സമംതാത് । സദാ പൂര്ണബിംബാഃ കളംകൈശ്ച ഹീനാ- സ്തദാ ത്വന്മുഖാനാം ബ്രുവേ സ്കംദ സാമ്യമ് ॥ 13 ॥

സ്ഫുരന്മംദഹാസൈഃ സഹംസാനി ചംച- ത്കടാക്ഷാവലീഭൃംഗസംഘോജ്ജ്വലാനി । സുധാസ്യംദിബിംബാധരാണീശസൂനോ തവാലോകയേ ഷണ്മുഖാംഭോരുഹാണി ॥ 14 ॥

വിശാലേഷു കര്ണാംതദീര്ഘേഷ്വജസ്രം ദയാസ്യംദിഷു ദ്വാദശസ്വീക്ഷണേഷു । മയീഷത്കടാക്ഷഃ സകൃത്പാതിതശ്ചേ- ദ്ഭവേത്തേ ദയാശീല കാ നാമ ഹാനിഃ ॥ 15 ॥

സുതാംഗോദ്ഭവോ മേഽസി ജീവേതി ഷഡ്ധാ ജപന്മംത്രമീശോ മുദാ ജിഘ്രതേ യാന് । ജഗദ്ഭാരഭൃദ്ഭ്യോ ജഗന്നാഥ തേഭ്യഃ കിരീടോജ്ജ്വലേഭ്യോ നമോ മസ്തകേഭ്യഃ ॥ 16 ॥

സ്ഫുരദ്രത്നകേയൂരഹാരാഭിരാമ- ശ്ചലത്കുംഡലശ്രീലസദ്ഗംഡഭാഗഃ । കടൌ പീതവാസാഃ കരേ ചാരുശക്തിഃ പുരസ്താന്മമാസ്താം പുരാരേസ്തനൂജഃ ॥ 17 ॥

ഇഹായാഹി വത്സേതി ഹസ്താന്പ്രസാര്യാ- ഹ്വയത്യാദരാച്ഛംകരേ മാതുരംകാത് । സമുത്പത്യ താതം ശ്രയംതം കുമാരം ഹരാശ്ലിഷ്ടഗാത്രം ഭജേ ബാലമൂര്തിമ് ॥ 18 ॥

കുമാരേശസൂനോ ഗുഹ സ്കംദ സേനാ- പതേ ശക്തിപാണേ മയൂരാധിരൂഢ । പുലിംദാത്മജാകാംത ഭക്താര്തിഹാരിന് പ്രഭോ താരകാരേ സദാ രക്ഷ മാം ത്വമ് ॥ 19 ॥

പ്രശാംതേംദ്രിയേ നഷ്ടസംജ്ഞേ വിചേഷ്ടേ കഫോദ്ഗാരിവക്ത്രേ ഭയോത്കംപിഗാത്രേ । പ്രയാണോന്മുഖേ മയ്യനാഥേ തദാനീം ദ്രുതം മേ ദയാലോ ഭവാഗ്രേ ഗുഹ ത്വമ് ॥ 20 ॥

കൃതാംതസ്യ ദൂതേഷു ചംഡേഷു കോപാ- ദ്ദഹച്ഛിംദ്ധി ഭിംദ്ധീതി മാം തര്ജയത്സു । മയൂരം സമാരുഹ്യ മാ ഭൈരിതി ത്വം പുരഃ ശക്തിപാണിര്മമായാഹി ശീഘ്രമ് ॥ 21 ॥

പ്രണമ്യാസകൃത്പാദയോസ്തേ പതിത്വാ പ്രസാദ്യ പ്രഭോ പ്രാര്ഥയേഽനേകവാരമ് । ന വക്തും ക്ഷമോഽഹം തദാനീം കൃപാബ്ധേ ന കാര്യാംതകാലേ മനാഗപ്യുപേക്ഷാ ॥ 22 ॥

സഹസ്രാംഡഭോക്താ ത്വയാ ശൂരനാമാ ഹതസ്താരകഃ സിംഹവക്ത്രശ്ച ദൈത്യഃ । മമാംതര്ഹൃദിസ്ഥം മനഃക്ലേശമേകം ന ഹംസി പ്രഭോ കിം കരോമി ക്വ യാമി ॥ 23 ॥

അഹം സർവദാ ദുഃഖഭാരാവസന്നോ ഭവാംദീനബംധുസ്ത്വദന്യം ന യാചേ । ഭവദ്ഭക്തിരോധം സദാ ക്ലൃപ്തബാധം മമാധിം ദ്രുതം നാശയോമാസുത ത്വമ് ॥ 24 ॥

അപസ്മാരകുഷ്ടക്ഷയാര്ശഃ പ്രമേഹ- ജ്വരോന്മാദഗുല്മാദിരോഗാ മഹാംതഃ । പിശാചാശ്ച സർവേ ഭവത്പത്രഭൂതിം വിലോക്യ ക്ഷണാത്താരകാരേ ദ്രവംതേ ॥ 25 ॥

ദൃശി സ്കംദമൂര്തിഃ ശ്രുതൌ സ്കംദകീര്തി- ര്മുഖേ മേ പവിത്രം സദാ തച്ചരിത്രമ് । കരേ തസ്യ കൃത്യം വപുസ്തസ്യ ഭൃത്യം ഗുഹേ സംതു ലീനാ മമാശേഷഭാവാഃ ॥ 26 ॥

മുനീനാമുതാഹോ നൃണാം ഭക്തിഭാജാ- മഭീഷ്ടപ്രദാഃ സംതി സർവത്ര ദേവാഃ । നൃണാമംത്യജാനാമപി സ്വാര്ഥദാനേ ഗുഹാദ്ദേവമന്യം ന ജാനേ ന ജാനേ ॥ 27 ॥

കലത്രം സുതാ ബംധുവര്ഗഃ പശുർവാ നരോ വാഥ നാരീ ഗൃഹേ യേ മദീയാഃ । യജംതോ നമംതഃ സ്തുവംതോ ഭവംതം സ്മരംതശ്ച തേ സംതു സർവേ കുമാര ॥ 28 ॥

മൃഗാഃ പക്ഷിണോ ദംശകാ യേ ച ദുഷ്ടാ- സ്തഥാ വ്യാധയോ ബാധകാ യേ മദംഗേ । ഭവച്ഛക്തിതീക്ഷ്ണാഗ്രഭിന്നാഃ സുദൂരേ വിനശ്യംതു തേ ചൂര്ണിതക്രൌംചശൈല ॥ 29 ॥

ജനിത്രീ പിതാ ച സ്വപുത്രാപരാധം സഹേതേ ന കിം ദേവസേനാധിനാഥ । അഹം ചാതിബാലോ ഭവാന് ലോകതാതഃ ക്ഷമസ്വാപരാധം സമസ്തം മഹേശ ॥ 30 ॥

നമഃ കേകിനേ ശക്തയേ ചാപി തുഭ്യം നമശ്ഛാഗ തുഭ്യം നമഃ കുക്കുടായ । നമഃ സിംധവേ സിംധുദേശായ തുഭ്യം പുനഃ സ്കംദമൂര്തേ നമസ്തേ നമോഽസ്തു ॥ 31 ॥

ജയാനംദഭൂമം ജയാപാരധാമം ജയാമോഘകീര്തേ ജയാനംദമൂര്തേ । ജയാനംദസിംധോ ജയാശേഷബംധോ ജയ ത്വം സദാ മുക്തിദാനേശസൂനോ ॥ 32 ॥

ഭുജംഗാഖ്യവൃത്തേന ക്ലൃപ്തം സ്തവം യഃ പഠേദ്ഭക്തിയുക്തോ ഗുഹം സംപ്രണമ്യ । സ പുത്രാന്കലത്രം ധനം ദീര്ഘമായു- ര്ലഭേത്സ്കംദസായുജ്യമംതേ നരഃ സഃ ॥ 33 ॥

Browse Related Categories: