गीतगोविंदं द्वादशः सर्गः - सुप्रीत पीतांबरः

॥ ഗീതം 23 ॥

കിസലയശയനതലേ കുരു കാമിനി ചരണനലിനവിനിവേശമ് । തവ പദപല്ലവവൈരിപരാഭവമിദമനുഭവതു സുവേശമ് ॥ ക്ഷണമധുനാ നാരായണമനുഗതമനുസര രാധികേ ॥ 1 ॥

കരകമലേന കരോമി ചരണമഹമാഗമിതാസി വിദൂരമ് । ക്ഷണമുപകുരു ശയനോപരി മാമിവ നൂപുരമനുഗതിശൂരമ് ॥ 2 ॥

വദനസുധാനിധിഗലിതമമൃതമിവ രചയ വചനമനുകൂലമ് । വിരഹമിവാപനയാമി പയോധരരോധകമുരസി ദുകൂലമ് ॥ 3 ॥

പ്രിയപരിരംഭണരഭസവലിതമിവ പുലകിതമതിദുരവാപമ് । മദുരസി കുചകലശം വിനിവേശയ ശോഷയ മനസിജതാപമ് ॥ 4 ॥

അധരസുധാരസമുപനയ ഭാവിനി ജീവയ മൃതമിവ ദാസമ് । ത്വയി വിനിഹിതമനസം വിരഹാനലദഗ്ധവപുഷമവിലാസമ് ॥ 5 ॥

ശശിമുഖി മുഖരയ മണിരശനാഗുണമനുഗുണകംഠനിദാനമ് । ശ്രുതിയുഗലേ പികരുതവികലേ മമ ശമയ ചിരാദവസാദമ് ॥ 6 ॥

മാമതിവിഫലരുഷാ വികലീകൃതമവലോകിതമധുനേദമ് । മീലിതലജ്ജിതമിവ നയനം തവ വിരമ വിസൃജ രതിഖേദമ് ॥ 7 ॥

ശ്രീജയദേവഭണിതമിദമനുപദനിഗദിതമധുരിപുമോദമ് । ജനയതു രസികജനേഷു മനോരമതിരസഭാവവിനോദമ് ॥ 8 ॥

മാരംകേ രതികേലിസംകുലരണാരംഭേ തയാ സാഹസ-പ്രായം കാംതജയായ കിംചിദുപരി പ്രാരംഭി യത്സംഭ്രമാത് । നിഷ്പംദാ ജഘനസ്ഥലീ ശിഥിലതാ ദോർവല്ലിരുത്കംപിതം വക്ഷോ മീലിതമക്ഷി പൌരുഷരസഃ സ്ത്രീണാം കുതഃ സിധ്യതി ॥ 69 ॥

അഥ കാംതം രതിക്ലാംതമപി മംഡനവാംഛയാ । നിജഗാദ നിരാബാധാ രാധാ സ്വാധീനഭര്തൃകാ ॥ 70 ॥

॥ ഗീതം 24 ॥

കുരു യദുനംദന ചംദനശിശിരതരേണ കരേണ പയോധരേ । മൃഗമദപത്രകമത്ര മനോഭവമംഗലകലശസഹോദരേ । നിജഗാദ സാ യദുനംദനേ ക്രീഡതി ഹൃദയാനംദനേ ॥ 1 ॥

അലികുലഗംജനമംജനകം രതിനായകസായകമോചനേ । ത്വദധരചുംബനലംബിതകജ്ജലമുജ്ജ്വലയ പ്രിയ ലോചനേ ॥ 2 ॥

നയനകുരംഗതരംഗവികാസനിരാസകരേ ശ്രുതിമംഡലേ । മനസിജപാശവിലാസധരേ ശുഭവേശ നിവേശയ കുംഡലേ ॥ 3 ॥

ഭ്രമരചയം രചഹയംതമുപരി രുചിരം സുചിരം മമ സംമുഖേ । ജിതകമലേ വിമലേ പരികര്മയ നര്മജനകമലകം മുഖേ ॥ 4 ॥

മൃഗമദരസവലിതം ലലിതം കുരു തിലകമലികരജനീകരേ । വിഹിതകലംകകലം കമലാനന വിശ്രമിതശ്രമശീകരേ ॥ 5 ॥

മമ രുചിരേ ചികുരേ കുരു മാനദ മാനസജധ്വജചാമരേ । രതിഗലിതേ ലലിതേ കുസുമാനി ശിഖംഡിശിഖംഡകഡാമരേ ॥ 6 ॥

സരസഘനേ ജഘനേ മമ ശംബരദാരണവാരണകംദരേ । മണിരശനാവസനാഭരണാനി ശുഭാശയ വാസയ സുംദരേ ॥ 7 ॥

ശ്രീജയദേവവചസി രുചിരേ ഹൃദയം സദയം കുരു മംഡനേ । ഹരിചരണസ്മരണാമൃതകൃതകലികലുഷഭവജ്വരഖംഡനേ ॥ 8 ॥

രചയ കുചയോഃ പത്രം ചിത്രം കുരുഷ്വ കപോലയോ-ര്ഘടയ ജഘനേ കാംചീമംച സ്രജാ കബരീഭരമ് । കലയ വലയശ്രേണീം പാണൌ പദേ കുരു നൂപുരാ-വിതി നിഗതിതഃ പ്രീതഃ പീതാംബരോഽപി തഥാകരോത് ॥ 71 ॥

യദ്ഗാംധ്ഗർവകലാസു കൌശലമനുധ്യാനം ച യദ്വൈഷ്ണവം യച്ഛൃംഗാരവിവേകതത്വമപി യത്കാവ്യേഷു ലീലായിതമ് । തത്സർവം ജയദേവപംഡിതകവേഃ കൃഷ്ണൈകതാനാത്മനഃ സാനംദാഃ പരിശോധയംതു സുധിയഃ ശ്രീഗീതഗോവിംദതഃ ॥ 72 ॥

ശ്രീഭോജദേവപ്രഭവസ്യ രാമാദേവീസുതശ്രീജയദേവകസ്യ । പരാശരാദിപ്രിയവര്ഗകംഠേ ശ്രീഗീതഗോവിംദകവിത്വമസ്തു ॥ 73 ॥

॥ ഇതി ശ്രീജയദേവകൃതൌ ഗീതഗോവിംദേ സുപ്രീതപീതാംബരോ നാമ ദ്വാദശഃ സര്ഗഃ ॥ ॥ ഇതി ഗീതഗോവിംദം സമാപ്തമ് ॥

Browse Related Categories: