श्री गुरुगीता द्वितीयोध्यायः

yasmin sṛṣṭisthitidhvaṃsanigrahānugrahātmakam । kṛtyaṃ pañchavidhaṃ śaśvat bhāsatē taṃ guruṃ bhajēt ॥ 116 ॥

pādābjē sarvasaṃsāradāvakālānalaṃ svakē । brahmarandhrē sthitāmbhōjamadhyasthaṃ chandramaṇḍalam ॥ 117 ॥

akathāditrirēkhābjē sahasradaḻamaṇḍalē । haṃsapārśvatrikōṇē cha smarēttanmadhyagaṃ gurum ॥ 118 ॥

nityaṃ śuddhaṃ nirābhāsaṃ nirākāraṃ nirañjanam । nityabōdhaṃ chidānandaṃ guruṃ brahma namāmyaham ॥ 119 ॥

sakalabhuvanasṛṣṭiḥ kalpitāśēṣasṛṣṭiḥ nikhilanigamadṛṣṭiḥ satpadārthaikasṛṣṭiḥ । atadgaṇaparamēṣṭiḥ satpadārthaikadṛṣṭiḥ bhavaguṇaparamēṣṭirmōkṣamārgaikadṛṣṭiḥ ॥ 120 ॥

sakalabhuvanaraṅgasthāpanāstambhayaṣṭiḥ sakaruṇarasavṛṣṭistattvamālāsamaṣṭiḥ । sakalasamayasṛṣṭissachchidānandadṛṣṭiḥ nivasatu mayi nityaṃ śrīgurōrdivyadṛṣṭiḥ ॥ 121 ॥

na gurōradhikaṃ na gurōradhikaṃ na gurōradhikaṃ na gurōradhikam । śivaśāsanataḥ śivaśāsanataḥ śivaśāsanataḥ śivaśāsanataḥ ॥ 122 ॥

idamēva śivaṃ idamēva śivaṃ idamēva śivaṃ idamēva śivam । hariśāsanatō hariśāsanatō hariśāsanatō hariśāsanataḥ ॥ 123 ॥

viditaṃ viditaṃ viditaṃ viditaṃ vijanaṃ vijanaṃ vijanaṃ vijanam । vidhiśāsanatō vidhiśāsanatō vidhiśāsanatō vidhiśāsanataḥ ॥ 124 ॥

ēvaṃvidhaṃ guruṃ dhyātvā jñānamutpadyatē svayam । tadā gurūpadēśēna muktō'hamiti bhāvayēt ॥ 125 ॥

gurūpadiṣṭamārgēṇa manaśśuddhiṃ tu kārayēt । anityaṃ khaṇḍayētsarvaṃ yatkiñchidātmagōcharam ॥ 126 ॥

jñēyaṃ sarvaṃ pratītaṃ cha jñānaṃ cha mana uchyatē । jñānaṃ jñēyaṃ samaṃ kuryānnānyaḥ panthā dvitīyakaḥ ॥ 127 ॥

kimatra bahunōktēna śāstrakōṭiśatairapi । durlabhā chittaviśrāntiḥ vinā gurukṛpāṃ parām ॥ 128 ॥

karuṇākhaḍgapātēna Chitvā pāśāṣṭakaṃ śiśōḥ । samyagānandajanakaḥ sadguruḥ sō'bhidhīyatē ॥ 129 ॥

ēvaṃ śrutvā mahādēvi gurunindāṃ karōti yaḥ । sa yāti narakān ghōrān yāvachchandradivākarau ॥ 130 ॥

yāvatkalpāntakō dēhastāvaddēvi guruṃ smarēt । gurulōpō na kartavyaḥ svachChandō yadi vā bhavēt ॥ 131 ॥

huṅkārēṇa na vaktavyaṃ prājñaśiṣyaiḥ kadāchana । gurōragra na vaktavyamasatyaṃ tu kadāchana ॥ 132 ॥

guruṃ tvaṅkṛtya huṅkṛtya gurusānnidhyabhāṣaṇaḥ । araṇyē nirjalē dēśē sambhavēd brahmarākṣasaḥ ॥ 133 ॥

advaitaṃ bhāvayēnnityaṃ sarvāvasthāsu sarvadā । kadāchidapi nō kuryādadvaitaṃ gurusannidhau ॥ 134 ॥

dṛśyavismṛtiparyantaṃ kuryād gurupadārchanam । tādṛśasyaiva kaivalyaṃ na cha tadvyatirēkiṇaḥ ॥ 135 ॥

api sampūrṇatattvajñō gurutyāgī bhavēdyadā । bhavatyēva hi tasyāntakālē vikṣēpamutkaṭam ॥ 136 ॥

gurukāryaṃ na laṅghēta nāpṛṣṭvā kāryamācharēt । na hyuttiṣṭhēddiśē'natvā gurusadbhāvaśōbhitaḥ ॥ 137 ॥

gurau sati svayaṃ dēvi parēṣāṃ tu kadāchana । upadēśaṃ na vai kuryāt tathā chēdrākṣasō bhavēt ॥ 138 ॥

na gurōrāśramē kuryāt duṣpānaṃ parisarpaṇam । dīkṣā vyākhyā prabhutvādi gurōrājñāṃ na kārayēt ॥ 139 ॥

nōpāśrayaṃ cha paryakaṃ na cha pādaprasāraṇam । nāṅgabhōgādikaṃ kuryānna līlāmaparāmapi ॥ 140 ॥

gurūṇāṃ sadasadvā'pi yaduktaṃ tanna laṅghayēt । kurvannājñāṃ divā rātrau dāsavannivasēdgurō ॥ 141 ॥

adattaṃ na gurōrdravyamupabhuñjīta karhichit । dattē cha raṅkavadgrāhyaṃ prāṇō'pyētēna labhyatē ॥ 142 ॥

pādukāsanaśayyādi guruṇā yadabhīṣṭitam । namaskurvīta tatsarvaṃ pādābhyāṃ na spṛśēt kvachit ॥ 143 ॥

gachChataḥ pṛṣṭhatō gachChēt guruchChāyāṃ na laṅghayēt । nōlbaṇaṃ dhārayēdvēṣaṃ nālaṅkārāṃstatōlbaṇān ॥ 144 ॥

gurunindākaraṃ dṛṣṭvā dhāvayēdatha vāsayēt । sthānaṃ vā tatparityājyaṃ jihvāchChēdākṣamō yadi ॥ 145 ॥

nōchChiṣṭaṃ kasyachiddēyaṃ gurōrājñāṃ na cha tyajēt । kṛtsnamuchChiṣṭamādāya haviriva bhakṣayētsvayam ॥ 146 ॥

nā'nṛtaṃ nā'priyaṃ chaiva na garvaṃ nā'pi vā bahu । na niyōgaparaṃ brūyāt gurōrājñāṃ vibhāvayēt ॥ 147 ॥

prabhō dēvakulēśānāṃ svāmin rājan kulēśvara । iti sambōdhanairbhītō gurubhāvēna sarvadā ॥ 148 ॥

munibhiḥ pannagairvāpi surairvā śāpitō yadi । kālamṛtyubhayādvāpi guruḥ santrāti pārvati ॥ 149 ॥

aśaktā hi surādyāścha hyaśaktāḥ munayastathā । guruśāpōpapannasya rakṣaṇāya cha kutrachit ॥ 150 ॥

mantrarājamidaṃ dēvi gururityakṣaradvayam । smṛtivēdapurāṇānāṃ sāramēva na saṃśayaḥ ॥ 151 ॥

satkāramānapūjārthaṃ daṇḍakāṣayadhāraṇaḥ । sa sannyāsī na vaktavyaḥ sannyāsī jñānatatparaḥ ॥ 152 ॥

vijānanti mahāvākyaṃ gurōścharaṇa sēvayā । tē vai sannyāsinaḥ prōktā itarē vēṣadhāriṇaḥ ॥ 153 ॥

[pāṭhabhēdaḥ – nityaṃ brahma nirākāraṃ nirguṇaṃ bōdhayētparam । bhāsayan brahmabhāvaṃ cha dīpō dīpāntaraṃ yathā ॥ ] nityaṃ brahma nirākāraṃ nirguṇaṃ satyachiddhanam । yaḥ sākṣātkurutē lōkē gurutvaṃ tasya śōbhatē ॥ 154 ॥

guruprasādataḥ svātmanyātmārāmanirīkṣaṇāt । samatā muktimārgēṇa svātmajñānaṃ pravartatē ॥ 155 ॥

ābrahmastambaparyantaṃ paramātmasvarūpakam । sthāvaraṃ jaṅgamaṃ chaiva praṇamāmi jaganmayam ॥ 156 ॥

vandē'haṃ sachchidānandaṃ bhāvātītaṃ jagadgurum । nityaṃ pūrṇaṃ nirākāraṃ nirguṇaṃ svātmasaṃsthitam ॥ 157 ॥

parātparataraṃ dhyāyēnnityamānandakārakam । hṛdayākāśamadhyasthaṃ śuddhasphaṭikasannibham ॥ 158 ॥

sphāṭikē sphāṭikaṃ rūpaṃ darpaṇē darpaṇō yathā । tathā''tmani chidākāramānandaṃ sō'hamityuta ॥ 159 ॥

aṅguṣṭhamātraṃ puruṣaṃ dhyāyēchcha chinmayaṃ hṛdi । tatra sphurati yō bhāvaḥ śṛṇu tatkathayāmi tē ॥ 160 ॥

ajō'hamamarō'haṃ cha anādinidhanō hyaham । avikāraśchidānandō hyaṇīyānmahatō mahān ॥ 161 ॥

apūrvamaparaṃ nityaṃ svayañjyōtirnirāmayam । virajaṃ paramākāśaṃ dhruvamānandamavyayam ॥ 162 ॥

agōcharaṃ tathā'gamyaṃ nāmarūpavivarjitam । niśśabdaṃ tu vijānīyātsvabhāvādbrahma pārvati ॥ 163 ॥

yathā gandhasvabhāvatvaṃ karpūrakusumādiṣu । śītōṣṇatvasvabhāvatvaṃ tathā brahmaṇi śāśvatam ॥ 164 ॥

yathā nijasvabhāvēna kuṇḍalē kaṭakādayaḥ । suvarṇatvēna tiṣṭhanti tathā'haṃ brahma śāśvatam ॥ 165 ॥

svayaṃ tathāvidhō bhūtvā sthātavyaṃ yatra kutra chit । kīṭō bhṛṅga iva dhyānādyathā bhavati tādṛśaḥ ॥ 166 ॥

gurudhyānaṃ tathā kṛtvā svayaṃ brahmamayō bhavēt । piṇḍē padē tathā rūpē muktāstē nātra saṃśayaḥ ॥ 167 ॥

śrīpārvatī uvācha

piṇḍaṃ kiṃ tu mahādēva padaṃ kiṃ samudāhṛtam । rūpātītaṃ cha rūpaṃ kiṃ ētadākhyāhi śaṅkara ॥ 168

śrīmahādēva uvācha

piṇḍaṃ kuṇḍalinī śaktiḥ padaṃ haṃsamudāhṛtam । rūpaṃ binduriti jñēyaṃ rūpātītaṃ nirañjanam ॥ 169

piṇḍē muktāḥ padē muktā rūpē muktā varānanē । rūpātītē tu yē muktāstē muktā nā'tra saṃśayaḥ ॥ 170 ॥

gururdhyānēnaiva nityaṃ dēhī brahmamayō bhavēt । sthitaścha yatra kutrā'pi muktō'sau nā'tra saṃśayaḥ ॥ 171 ॥

jñānaṃ vairāgyamaiśvaryaṃ yaśaśrīḥ svamudāhṛtam । ṣaḍguṇaiśvaryayuktō hi bhagavān śrīguruḥ priyē ॥ 172 ॥

guruśśivō gururdēvō gururbandhuḥ śarīriṇām । gururātmā gururjīvō gurōranyanna vidyatē ॥ 173 ॥

ēkākī nisspṛhaḥ śāntaśchintā'sūyādivarjitaḥ । bālyabhāvēna yō bhāti brahmajñānī sa uchyatē ॥ 174 ॥

na sukhaṃ vēdaśāstrēṣu na sukhaṃ mantrayantrakē । gurōḥ prasādādanyatra sukhaṃ nāsti mahītalē ॥ 175 ॥

chārvākavaiṣṇavamatē sukhaṃ prābhākarē na hi । gurōḥ pādāntikē yadvatsukhaṃ vēdāntasammatam ॥ 176 ॥

na tatsukhaṃ surēndrasya na sukhaṃ chakravartinām । yatsukhaṃ vītarāgasya munērēkāntavāsinaḥ ॥ 177 ॥

nityaṃ brahmarasaṃ pītvā tṛptō yaḥ paramātmani । indraṃ cha manyatē tuchChaṃ nṛpāṇāṃ tatra kā kathā ॥ 178 ॥

yataḥ paramakaivalyaṃ gurumārgēṇa vai bhavēt । gurubhaktirataḥ kāryā sarvadā mōkṣakāṅkṣibhiḥ ॥ 179 ॥

ēka ēvā'dvitīyō'haṃ guruvākyēna niśchitaḥ । ēvamabhyasyatā nityaṃ na sēvyaṃ vai vanāntaram ॥ 180 ॥

abhyāsānnimiṣēṇaiva samādhimadhigachChati । ājanmajanitaṃ pāpaṃ tat​kṣaṇādēva naśyati ॥ 181 ॥

kimāvāhanamavyaktē vyāpakē kiṃ visarjanam । amūrtē cha kathaṃ pūjā kathaṃ dhyānaṃ nirāmayē ॥ 182 ॥

gururviṣṇuḥ sattvamayō rājasaśchaturānanaḥ । tāmasō rudrarūpēṇa sṛjatyavati hanti cha ॥ 183 ॥

svayaṃ brahmamayō bhūtvā tatparaṃ chāvalōkayēt । parātparataraṃ nānyat sarvagaṃ tannirāmayam ॥ 184 ॥

tasyāvalōkanaṃ prāpya sarvasaṅgavivarjitaḥ । ēkākī nisspṛhaḥ śāntaḥ sthātavyaṃ tatprasādataḥ ॥ 185 ॥

labdhaṃ vā'tha na labdhaṃ vā svalpaṃ vā bahuḻaṃ tathā । niṣkāmēnaiva bhōktavyaṃ sadā santuṣṭamānasaḥ ॥ 186 ॥

sarvajñapadamityāhurdēhī sarvamayō bhuvi । sadā''nandaḥ sadā śāntō ramatē yatra kutra chit ॥ 187 ॥

yatraiva tiṣṭhatē sō'pi sa dēśaḥ puṇyabhājanaḥ । muktasya lakṣaṇaṃ dēvi tavā'grē kathitaṃ mayā ॥ 188 ॥

upadēśastvayaṃ dēvi gurumārgēṇa muktidaḥ । gurubhaktiḥ tathā'tyantā kartavyā vai manīṣibhiḥ ॥ 189 ॥

nityayuktāśrayaḥ sarvavēdakṛtsarvavēdakṛt । svaparajñānadātā cha taṃ vandē gurumīśvaram ॥ 190 ॥

yadyapyadhītā nigamāḥ ṣaḍaṅgā āgamāḥ priyē । adhyātmādīni śāstrāṇi jñānaṃ nāsti guruṃ vinā ॥ 191 ॥

śivapūjāratō vā'pi viṣṇupūjāratō'thavā । gurutattvavihīnaśchēttatsarvaṃ vyarthamēva hi ॥ 192 ॥

śivasvarūpamajñātvā śivapūjā kṛtā yadi । sā pūjā nāmamātraṃ syāchchitradīpa iva priyē ॥ 193 ॥

sarvaṃ syātsaphalaṃ karma gurudīkṣāprabhāvataḥ । gurulābhātsarvalābhō guruhīnastu bāliśaḥ ॥ 194 ॥

guruhīnaḥ paśuḥ kīṭaḥ pataṅgō vaktumarhati । śivarūpaṃ svarūpaṃ cha na jānāti yatassvayam ॥ 195 ॥

tasmātsarvaprayatnēna sarvasaṅgavivarjitaḥ । vihāya śāstrajālāni gurumēva samāśrayēt ॥ 196 ॥

nirastasarvasandēhō ēkīkṛtya sudarśanam । rahasyaṃ yō darśayati bhajāmi gurumīśvaram ॥ 197 ॥

jñānahīnō gurustyājyō mithyāvādī viḍambakaḥ । svaviśrāntiṃ na jānāti paraśāntiṃ karōti kim ॥ 198 ॥

śilāyāḥ kiṃ paraṃ jñānaṃ śilāsaṅghapratāraṇē । svayaṃ tartuṃ na jānāti paraṃ nistārayēt katham ॥ 199 ॥

na vandanīyāstē kaṣṭaṃ darśanādbhrāntikārakāḥ । varjayēttān gurūn dūrē dhīrasya tu samāśrayēt ॥ 200 ॥

pāṣaṇḍinaḥ pāparatāḥ nāstikā bhēdabuddhayaḥ । strīlampaṭā durāchārāḥ kṛtaghnā bakavṛttayaḥ ॥ 201 ॥

karmabhraṣṭāḥ kṣamānaṣṭā nindyatarkaiścha vādinaḥ । kāminaḥ krōdhinaśchaiva hiṃsrāśchaṇḍāḥ śaṭhāstathā ॥ 202 ॥

jñānaluptā na kartavyā mahāpāpāstathā priyē । ēbhyō bhinnō guruḥ sēvyaḥ ēkabhaktyā vichārya cha ॥ 203 ॥

śiṣyādanyatra dēvēśi na vadēdyasya kasyachit । narāṇāṃ cha phalaprāptau bhaktirēva hi kāraṇam ॥ 204 ॥

gūḍhō dṛḍhaścha prītaścha maunēna susamāhitaḥ । sakṛtkāmagatō vā'pi pañchadhā gururīritaḥ ॥ 205 ॥

sarvaṃ gurumukhāllabdhaṃ saphalaṃ pāpanāśanam । yadyadātmahitaṃ vastu tattaddravyaṃ na vañchayēt ॥ 206 ॥

gurudēvārpaṇaṃ vastu tēna tuṣṭō'smi suvratē । śrīgurōḥ pādukāṃ mudrāṃ mūlamantraṃ cha gōpayēt ॥ 207 ॥

natā'smi tē nātha padāravindaṃ buddhīndriyaprāṇamanōvachōbhiḥ । yachchintyatē bhāvita ātmayuktau mumukṣibhiḥ karmamayōpaśāntayē ॥ 208 ॥

anēna yadbhavētkāryaṃ tadvadāmi tava priyē । lōkōpakārakaṃ dēvi laukikaṃ tu vivarjayēt ॥ 209 ॥

laukikāddharmatō yāti jñānahīnō bhavārṇavē । jñānabhāvē cha yatsarvaṃ karma niṣkarma śāmyati ॥ 210 ॥

imāṃ tu bhaktibhāvēna paṭhēdvai śṛṇuyādapi । likhitvā yatpradānēna tatsarvaṃ phalamaśnutē ॥ 211 ॥

gurugītāmimāṃ dēvi hṛdi nityaṃ vibhāvaya । mahāvyādhigatairduḥkhaiḥ sarvadā prajapēnmudā ॥ 212 ॥

gurugītākṣaraikaikaṃ mantrarājamidaṃ priyē । anyē cha vividhāḥ mantrāḥ kalāṃ nārhanti ṣōḍaśīm ॥ 213 ॥

ananta phalamāpnōti gurugītā japēna tu । sarvapāpaharā dēvi sarvadāridryanāśinī ॥ 214 ॥

akālamṛtyuharā chaiva sarvasaṅkaṭanāśinī । yakṣarākṣasabhūtādichōravyāghravighātinī ॥ 215 ॥

sarvōpadravakuṣṭhādiduṣṭadōṣanivāriṇī । yatphalaṃ gurusānnidhyāttatphalaṃ paṭhanādbhavēt ॥ 216 ॥

mahāvyādhiharā sarvavibhūtēḥ siddhidā bhavēt । athavā mōhanē vaśyē svayamēva japētsadā ॥ 217 ॥

kuśadūrvāsanē dēvi hyāsanē śubhrakambalē । upaviśya tatō dēvi japēdēkāgramānasaḥ ॥ 218 ॥

śuklaṃ sarvatra vai prōktaṃ vaśyē raktāsanaṃ priyē । padmāsanē japēnnityaṃ śāntivaśyakaraṃ param ॥ 219 ॥

vastrāsanē cha dāridryaṃ pāṣāṇē rōgasambhavaḥ । mēdinyāṃ duḥkhamāpnōti kāṣṭhē bhavati niṣphalam ॥ 220 ॥

kṛṣṇājinē jñānasiddhiḥ mōkṣaśrīrvyāghracharmaṇi । kuśāsanē jñānasiddhiḥ sarvasiddhistu kambalē ॥ 221 ॥

āgnēyyāṃ karṣaṇaṃ chaiva vāyavyāṃ śatrunāśanam । nairṛtyāṃ darśanaṃ chaiva īśānyāṃ jñānamēva cha ॥ 222 ॥

udaṅmukhaḥ śāntijāpyē vaśyē pūrvamukhastathā । yāmyē tu māraṇaṃ prōktaṃ paśchimē cha dhanāgamaḥ ॥ 223 ॥

mōhanaṃ sarvabhūtānāṃ bandhamōkṣakaraṃ param । dēvarājapriyakaraṃ rājānaṃ vaśamānayēt ॥ 224 ॥

mukhastambhakaraṃ chaiva guṇānāṃ cha vivardhanam । duṣkarmanāśanaṃ chaiva tathā satkarmasiddhidam ॥ 225 ॥

asiddhaṃ sādhayētkāryaṃ navagrahabhayāpaham । duḥsvapnanāśanaṃ chaiva susvapnaphaladāyakam ॥ 226 ॥

mōhaśāntikaraṃ chaiva bandhamōkṣakaraṃ param । svarūpajñānanilayaṃ gītāśāstramidaṃ śivē ॥ 227 ॥

yaṃ yaṃ chintayatē kāmaṃ taṃ taṃ prāpnōti niśchayam । nityaṃ saubhāgyadaṃ puṇyaṃ tāpatrayakulāpaham ॥ 228 ॥

sarvaśāntikaraṃ nityaṃ tathā vandhyā suputradam । avaidhavyakaraṃ strīṇāṃ saubhāgyasya vivardhanam ॥ 229 ॥

āyurārōgyamaiśvaryaṃ putrapautravivardhanam । niṣkāmajāpī vidhavā paṭhēnmōkṣamavāpnuyāt ॥ 230 ॥

avaidhavyaṃ sakāmā tu labhatē chānyajanmani । sarvaduḥkhamayaṃ vighnaṃ nāśayēttāpahārakam ॥ 231 ॥

sarvapāpapraśamanaṃ dharmakāmārthamōkṣadam । yaṃ yaṃ chintayatē kāmaṃ taṃ taṃ prāpnōti niśchitam ॥ 232 ॥

kāmyānāṃ kāmadhēnurvai kalpatē kalpapādapaḥ । chintāmaṇiśchintitasya sarvamaṅgaḻakārakam ॥ 233 ॥

likhitvā pūjayēdyastu mōkṣaśriyamavāpnuyāt । gurūbhaktirviśēṣēṇa jāyatē hṛdi sarvadā ॥ 234 ॥

japanti śāktāḥ saurāścha gāṇapatyāścha vaiṣṇavāḥ । śaivāḥ pāśupatāḥ sarvē satyaṃ satyaṃ na saṃśayaḥ ॥ 235 ॥

iti śrīskandapurāṇē uttarakhaṇḍē umāmahēśvara saṃvādē śrī gurugītāyāṃ dvitīyō'dhyāyaḥ ॥

Browse Related Categories: