श्री हनुमान् मंगलाष्टकम्

वैशाखे मासि कृष्णायां दशम्यां मंदवासरे । पूर्वाभाद्रा प्रभूताय मंगलं श्रीहनूमते ॥ 1 ॥

करुणारसपूर्णाय फलापूपप्रियाय च । माणिक्यहारकंठाय मंगलं श्रीहनूमते ॥ 2 ॥

सुवर्चलाकलत्राय चतुर्भुजधराय च । उष्ट्रारूढाय वीराय मंगलं श्रीहनूमते ॥ 3 ॥

दिव्यमंगलदेहाय पीतांबरधराय च । तप्तकांचनवर्णाय मंगलं श्रीहनूमते ॥ 4 ॥

भक्तरक्षणशीलाय जानकीशोकहारिणे । सृष्टिकारणभूताय मंगलं श्रीहनूमते ॥ 5 ॥

रंभावनविहाराय गंधमादनवासिने । सर्वलोकैकनाथाय मंगलं श्रीहनूमते ॥ 6 ॥

पंचाननाय भीमाय कालनेमिहराय च । कौंडिन्यगोत्रजाताय मंगलं श्रीहनूमते ॥ 7 ॥

केसरीपुत्र दिव्याय सीतान्वेषपराय च । वानराणां वरिष्ठाय मंगलं श्रीहनूमते ॥ 8 ॥

इति श्री हनुमान् मंगलाष्टकम् ।