भवानी भुजंग प्रयात स्तोत्रं

चलत्कुंतलांतर्भ्रमद्भृंगबृंदं घनस्निग्धधम्मिल्लभूषोज्ज्वलं ते । स्फुरन्मौलिमाणिक्यबद्धेंदुरेखा- -विलासोल्लसद्दिव्यमूर्धानमीडे ॥ 9 ॥

इति श्रीभवानि स्वरूपं तवेदं प्रपंचात्परं चातिसूक्ष्मं प्रसन्नम् । स्फुरत्वंब डिंभस्य मे हृत्सरोजे सदा वाङ्मयं सर्वतेजोमयं च ॥ 10 ॥

गणेशाभिमुख्याखिलैः शक्तिबृंदै- -र्वृतां वै स्फुरच्चक्रराजोल्लसंतीम् । परां राजराजेश्वरि त्रैपुरि त्वां शिवांकोपरिस्थां शिवां भावयामि ॥ 11 ॥

त्वमर्कस्त्वमिंदुस्त्वमग्निस्त्वमाप- -स्त्वमाकाशभूवायवस्त्वं महत्त्वम् । त्वदन्यो न कश्चित् प्रपंचोऽस्ति सर्वं सदानंदसंवित्स्वरूपं भजेऽहम् ॥ 12 ॥

श्रुतीनामगम्ये सुवेदागमज्ञा महिम्नो न जानंति पारं तवांब । स्तुतिं कर्तुमिच्छामि ते त्वं भवानि क्षमस्वेदमत्र प्रमुग्धः किलाहम् ॥ 13 ॥

गुरुस्त्वं शिवस्त्वं च शक्तिस्त्वमेव त्वमेवासि माता पिता च त्वमेव । त्वमेवासि विद्या त्वमेवासि बंधु- -र्गतिर्मे मतिर्देवि सर्वं त्वमेव ॥ 14 ॥

शरण्ये वरेण्ये सुकारुण्यमूर्ते हिरण्योदराद्यैरगण्ये सुपुण्ये । भवारण्यभीतेश्च मां पाहि भद्रे नमस्ते नमस्ते नमस्ते भवानि ॥ 15 ॥

इतीमां महच्छ्रीभवानीभुजंगं स्तुतिं यः पठेद्भक्तियुक्तश्च तस्मै । स्वकीयं पदं शाश्वतं वेदसारं श्रियं चाष्टसिद्धिं भवानी ददाति ॥ 16 ॥

भवानी भवानी भवानी त्रिवारं उदारं मुदा सर्वदा ये जपंति । न शोकं न मोहं न पापं न भीतिः कदाचित्कथंचित्कुतश्चिज्जनानाम् ॥ 17 ॥

॥ इति श्रीमच्छंकराचार्यविरचिता भवानी भुजंगं संपूर्णम् ॥

Browse Related Categories: