लघु स्तवः

Devi · Traditional devotional text · Source: vignanam.org (Traditional devotional text (public-domain shlokas))

English हिन्दी ಕನ್ನಡ తెలుగు தமிழ்മലയാളം বাংলা

ऐंद्रस्येव शरासनस्य दधती मध्येललाटं प्रभां शौक्लीं कांतिमनुष्णगोरिव शिरस्यातन्वती सर्वतः । एषासौ त्रिपुरा हृदि द्युतिरिवोष्णांशोः सदाहः स्थितात् छिंद्यान्नः सहसा पदैस्त्रिभिरघं ज्योतिर्मयी वाङ्मयी ॥ 1 ॥

या मात्रा त्रपुसीलतातनुलसत्तंतूत्थितिस्पर्धिनी वाग्बीजे प्रथमे स्थिता तव सदा तां मन्महे ते वयम् । शक्तिः कुंडलिनीति विश्वजननव्यापारबद्धोद्यमाः ज्ञात्वेत्थं न पुनः स्पृशंति जननीगर्भेऽर्भकत्वं नराः ॥ 2 ॥

दृष्ट्वा संभ्रमकारि वस्तु सहसा ऐ ऐ इति व्याहृतं येनाकूतवशादपीह वरदे बिंदुं विनाप्यक्षरम् । तस्यापि ध्रुवमेव देवि तरसा जाते तवानुग्रहे वाचःसूक्तिसुधारसद्रवमुचो निर्यांति वक्त्रांबुजात् ॥ 3 ॥

यन्नित्ये तव कामराजमपरं मंत्राक्षरं निष्कलं तत्सारस्वतमित्यवैति विरलः कश्चिद्बुधश्चेद्भुवि । आख्यानं प्रतिपर्व सत्यतपसो यत्कीर्तयंतो द्विजाः प्रारंभे प्रणवास्पदप्रणयितां नीत्वोच्चरंति स्फुटम् ॥ 4 ॥

यत्सद्यो वचसां प्रवृत्तिकरणे दृष्टप्रभावं बुधैः तार्तीयं तदहं नमामि मनसा त्वद्बीजमिंदुप्रभम् । अस्त्यौर्वोऽपि सरस्वतीमनुगतो जाड्यांबुविच्छित्तये गोशब्दो गिरि वर्तते सनियतं योगं विना सिद्धिदः ॥ 5 ॥

एकैकं तव देवि बीजमनघं सव्यंजनाव्यंजनं कूटस्थं यदि वा पृथक् क्रमगतं यद्वा स्थितं व्युत्क्रमात् । यं यं काममपेक्ष्य येन विधिना केनापि वा चिंतितं जप्तं वा सफलीकरोति सततं तं तं समस्तं नृणाम् ॥ 6 ॥

वामे पुस्तकधारिणीमभयदां साक्षस्रजं दक्षिणे भक्तेभ्यो वरदानपेशलकरां कर्पूरकुंदोज्ज्वलाम् । उज्जृंभांबुजपत्रकांतिनयनस्निग्धप्रभालोकिनीं ये त्वामंब न शीलयंति मनसा तेषां कवित्वं कुतः ॥ 7 ॥

Offered for worship and study, not as prediction. Non-commercial.

More devotional texts

Aadya Kalika Ashtottara Sata Namavali Agastya Kruta Sri Lakshmi Stotram Amba Pancharatnam Amba Stavam Ananda Lahari Aparadha Kshamapana Stotram (Devi)Ardha Naareeswara Ashtakam Arjuna Kruta Durga Stotram Ashta Lakshmi Stotram Ashtaadasa Shaktipeetha Stotram Bhagyada Lakshmi Baramma