Devi · Traditional devotional text · Source: vignanam.org (Traditional devotional text (public-domain shlokas))
বিরিংচ্য়াদিভিঃ পংচভির্লোকপালৈঃ সমূঢে মহানংদপীঠে নিষণ্ণম্ । ধনুর্বাণপাশাংকুশপ্রোতহস্তং মহস্ত্রৈপুরং শংকরাদ্বৈতমব্য়াত্ ॥ 1 ॥
যদন্নাদিভিঃ পংচভিঃ কোশজালৈঃ শিরঃপক্ষপুচ্ছাত্মকৈরংতরংতঃ । নিগূঢে মহায়োগপীঠে নিষণ্ণং পুরারেরথাংতঃপুরং নৌমি নিত্যম্ ॥ 2 ॥
বিরিংচাদিরূপৈঃ প্রপংচে বিহৃত্য় স্বতংত্রা যদা স্বাত্মবিশ্রাংতিরেষা । তদা মানমাতৃপ্রমেয়াতিরিক্তং পরানংদমীডে ভবানি ত্বদীযম্ ॥ 3 ॥
বিনোদায় চৈতন্যমেকং বিভজ্য় দ্বিধা দেবি জীবঃ শিবশ্চেতি নাম্না । শিবস্য়াপি জীবত্বমাপাদয়ংতী পুনর্জীবমেনং শিবং বা করোষি ॥ 4 ॥
সমাকুংচ্য় মূলং হৃদি ন্যস্য় বায়ুং মনো ভ্রূবিলং প্রাপয়িত্বা নিবৃত্তাঃ । ততঃ সচ্চিদানংদরূপে পদে তে ভবংত্য়ংব জীবাঃ শিবত্বেন কেচিত্ ॥ 5 ॥
শরীরেঽতিকষ্টে রিপৌ পুত্রবর্গে সদাভীতিমূলে কলত্রে ধনে বা । ন কশ্চিদ্বিরজ্যত্যহো দেবি চিত্রং কথং ত্বত্কটাক্ষং বিনা তত্ত্ববোধঃ ॥ 6 ॥
শরীরে ধনেঽপত্যবর্গে কলত্রে বিরক্তস্য় সদ্দেশিকাদিষ্টবুদ্ধেঃ । যদাকস্মিকং জ্য়োতিরানংদরূপং সমাধৌ ভবেত্তত্ত্বমস্য়ংব সত্যম্ ॥ 7 ॥
মৃষান্য়ো মৃষান্য়ঃ পরো মিশ্রমেনং পরঃ প্রাকৃতং চাপরো বুদ্ধিমাত্রম্ । প্রপংচং মিমীতে মুনীনাং গণোঽয়ং তদেতত্ত্বমেবেতি ন ত্বাং জহীমঃ ॥ 8 ॥
Offered for worship and study, not as prediction. Non-commercial.
নিবৃত্তিঃ প্রতিষ্ঠা চ বিদ্য়া চ শাংতি- স্তথা শাংত্যতীতেতি পংচীকৃতাভিঃ । কলাভিঃ পরে পংচবিংশাত্মিকাভি- স্ত্বমেকৈব সেব্য়া শিবাভিন্নরূপা ॥ 9 ॥
অগাধেঽত্র সংসারপংকে নিমগ্নং কলত্রাদিভারেণ খিন্নং নিতাংতম্ । মহামোহপাশৌঘবদ্ধং চিরান্মাং সমুদ্ধর্তুমংব ত্বমেকৈব শক্তা ॥ 10 ॥
সমারভ্য় মূলং গতো ব্রহ্মচক্রং ভবদ্দিব্যচক্রেশ্বরীধামভাজঃ । মহাসিদ্ধিসংঘাতকল্পদ্রুমাভা- নবাপ্য়াংব নাদানুপাস্তে চ যোগী ॥ 11 ॥
গণেশৈর্গ্রহৈরংব নক্ষত্রপংক্ত্য়া তথা যোগিনীরাশিপীঠৈরভিন্নম্ । মহাকালমাত্মানমামৃশ্য় লোকং বিধত্সে কৃতিং বা স্থিতিং বা মহেশি ॥ 12 ॥
লসত্তারহারামতিস্বচ্ছচেলাং বহংতীং করে পুস্তকং চাক্ষমালাম্ । শরচ্চংদ্রকোটিপ্রভাভাসুরাং ত্বাং সকৃদ্ভাবযন্ভারতীবল্লভঃ স্য়াত্ ॥ 13 ॥
সমুদ্যত্সহস্রার্কবিংবাভবক্ত্রাং স্বভাসৈব সিংদূরিতাজাংডকোটিম্ । ধনুর্বাণপাশাংকুশাংধারয়ংতীং স্মরংতঃ স্মরং বাপি সংমোহয়েয়ুঃ ॥ 14 ॥
মণিস্য়ূততাটংকশোণাস্যবিংবাং হরিত্পট্টবস্ত্রাং ত্বগুল্লাসিভূষাম্ । হৃদা ভাবয়ংস্তপ্তহেমপ্রভাং ত্বাং শ্রিয়ো নাশযত্য়ংব চাংচল্যভাবম্ ॥ 15 ॥
মহামংত্ররাজাংতবীজং পরাখ্য়ং স্বতো ন্যস্তবিংদু স্বয়ং ন্যস্তহার্দম্ । ভবদ্বক্ত্রবক্ষোজগুহ্য়াভিধানং স্বরূপং সকৃদ্ভাবয়েত্স ত্বমেব ॥ 16 ॥
তথান্য়ে বিকল্পেষু নির্বিণ্ণচিত্তা- স্তদেকং সমাধায় বিংদুত্রয়ং তে । পরানংদসংধানসিংধৌ নিমগ্নাঃ পুনর্গর্ভরংধ্রং ন পশ্য়ংতি ধীরাঃ ॥ 17 ॥
ত্বদুন্মেষলীলানুবংধাধিকারা- ন্বিরিংচ্য়াদিকাংস্ত্বদ্গুণাংভোধিবিংদূন্ । ভজংতস্তিতীর্ষংতি সংসারসিংধুং শিবে তাবকীনা সুসংভাবনেযম্ ॥ 18 ॥
কদা বা ভবত্পাদপোতেন তূর্ণং ভবাংভোধিমুত্তীর্য় পূর্ণাংতরংগঃ । নিমজ্জংতমেনং দুরাশাবিষাব্ধৌ সমালোক্য় লোকং কথং পর্য়ুদাস্সে ॥ 19 ॥
কদাবা হৃষীকাণি সাম্য়ং ভজেয়ুঃ কদা বা ন শত্রুর্ন মিত্রং ভবানি । কদা বা দুরাশাবিষূচীবিলোপঃ কদা বা মনো মে সমূলং বিনশ্য়েত্ ॥ 20 ॥
নমোবাকমাশাস্মহে দেবি যুষ্ম- ত্পদাংভোজয়ুগ্মায় তিগ্মায় গৌরি । বিরিংচ্য়াদিভাস্বত্কিরীটপ্রতোলী- প্রদীপাযমানপ্রভাভাস্বরায় ॥ 21 ॥
কচে চংদ্ররেখং কুচে তারহারং করে স্বাদুচাপং শরে ষট্পদৌঘম্ । স্মরামি স্মরারেরভিপ্রাযমেকং মদাঘূর্ণনেত্রং মদীয়ং নিধানম্ ॥ 22 ॥
শরেষ্বেব নাসা ধনুষ্বেব জিহ্বা জপাপাটলে লোচনে তে স্বরূপে । ত্বগেষা ভবচ্চংদ্রখংডে শ্রবো মে গুণে তে মনোবৃত্তিরংব ত্বয়ি স্য়াত্ ॥ 23 ॥
জগত্কর্মধীরান্বচোধূতকীরান্ কুচন্যস্তহারাংকৃপাসিংধুপূরান্ । ভবাংভোধিপারান্মহাপাপদূরান্ ভজে বেদসারাংশিবপ্রেমদারান্ ॥ 24 ॥
সুধাসিংধুসারে চিদানংদনীরে সমুত্ফুল্লনীপে সুরত্রাংতরীপে । মণিব্য়ূহসালে স্থিতে হৈমশালে মনোজারিবামে নিষণ্ণং মনো মে ॥ 25 ॥
দৃগংতে বিলোলা সুগংধীষুমালা প্রপংচেংদ্রজালা বিপত্সিংধুকূলা । মুনিস্বাংতশালা নমল্লোকপালা হৃদি প্রেমলোলামৃতস্বাদুলীলা ॥ 26 ॥
জগজ্জালমেতত্ত্বয়ৈবাংব সৃষ্টং ত্বমেবাদ্য় যাসীংদ্রিয়ৈরর্থজালম্ । ত্বমেকৈব কর্ত্রী ত্বমেকৈব ভোক্ত্রী ন মে পুণ্যপাপে ন মে বংধমোক্ষৌ ॥ 27 ॥
ইতি প্রেমভারেণ কিংচিন্ময়োক্তং ন বুধ্বৈব তত্ত্বং মদীয়ং ত্বদীযম্ । বিনোদায় বালস্য় মৌর্খ্য়ং হি মাতস্- তদেতত্প্রলাপস্তুতিং মে গৃহাণ ॥ 28 ॥
॥ ইতি শ্রীমচ্ছংকরাচার্যবিরচিতা দেবীভুজংগং সংপূর্ণম্ ॥
Browse Related Categories: