Vishnu · Traditional devotional text · Source: vignanam.org (Traditional devotional text (public-domain shlokas))
ಗೋಪೀಜನಾಯ ಕಥಿತಂ ನಿಯಮಾವಸಾನೇ ಮಾರೋತ್ಸವಂ ತ್ವಮಥ ಸಾಧಯಿತುಂ ಪ್ರವೃತ್ತಃ । ಸಾಂದ್ರೇಣ ಚಾಂದ್ರಮಹಸಾ ಶಿಶಿರೀಕೃತಾಶೇ ಪ್ರಾಪೂರಯೋ ಮುರಲಿಕಾಂ ಯಮುನಾವನಾಂತೇ ॥1॥
ಸಮ್ಮೂರ್ಛನಾಭಿರುದಿತಸ್ವರಮಂಡಲಾಭಿಃ ಸಮ್ಮೂರ್ಛಯಂತಮಖಿಲಂ ಭುವನಾಂತರಾಲಮ್ । ತ್ವದ್ವೇಣುನಾದಮುಪಕರ್ಣ್ಯ ವಿಭೋ ತರುಣ್ಯ- ಸ್ತತ್ತಾದೃಶಂ ಕಮಪಿ ಚಿತ್ತವಿಮೋಹಮಾಪುಃ ॥2॥
Offered for worship and study, not as prediction. Non-commercial.
More devotional texts
ತಾ ಗೇಹಕೃತ್ಯನಿರತಾಸ್ತನಯಪ್ರಸಕ್ತಾಃ ಕಾಂತೋಪಸೇವನಪರಾಶ್ಚ ಸರೋರುಹಾಕ್ಷ್ಯಃ । ಸರ್ವಂ ವಿಸೃಜ್ಯ ಮುರಲೀರವಮೋಹಿತಾಸ್ತೇ ಕಾಂತಾರದೇಶಮಯಿ ಕಾಂತತನೋ ಸಮೇತಾಃ ॥3॥
ಕಾಶ್ಚಿನ್ನಿಜಾಂಗಪರಿಭೂಷಣಮಾದಧಾನಾ ವೇಣುಪ್ರಣಾದಮುಪಕರ್ಣ್ಯ ಕೃತಾರ್ಧಭೂಷಾಃ । ತ್ವಾಮಾಗತಾ ನನು ತಥೈವ ವಿಭೂಷಿತಾಭ್ಯ- ಸ್ತಾ ಏವ ಸಂರುರುಚಿರೇ ತವ ಲೋಚನಾಯ ॥4॥
ಹಾರಂ ನಿತಂಬಭುವಿ ಕಾಚನ ಧಾರಯಂತೀ ಕಾಂಚೀಂ ಚ ಕಂಠಭುವಿ ದೇವ ಸಮಾಗತಾ ತ್ವಾಮ್ । ಹಾರಿತ್ವಮಾತ್ಮಜಘನಸ್ಯ ಮುಕುಂದ ತುಭ್ಯಂ ವ್ಯಕ್ತಂ ಬಭಾಷ ಇವ ಮುಗ್ಧಮುಖೀ ವಿಶೇಷಾತ್ ॥5॥
ಕಾಚಿತ್ ಕುಚೇ ಪುನರಸಜ್ಜಿತಕಂಚುಲೀಕಾ ವ್ಯಾಮೋಹತಃ ಪರವಧೂಭಿರಲಕ್ಷ್ಯಮಾಣಾ । ತ್ವಾಮಾಯಯೌ ನಿರುಪಮಪ್ರಣಯಾತಿಭಾರ- ರಾಜ್ಯಾಭಿಷೇಕವಿಧಯೇ ಕಲಶೀಧರೇವ ॥6॥
ಕಾಶ್ಚಿತ್ ಗೃಹಾತ್ ಕಿಲ ನಿರೇತುಮಪಾರಯಂತ್ಯ- ಸ್ತ್ವಾಮೇವ ದೇವ ಹೃದಯೇ ಸುದೃಢಂ ವಿಭಾವ್ಯ । ದೇಹಂ ವಿಧೂಯ ಪರಚಿತ್ಸುಖರೂಪಮೇಕಂ ತ್ವಾಮಾವಿಶನ್ ಪರಮಿಮಾ ನನು ಧನ್ಯಧನ್ಯಾಃ ॥7॥
ಜಾರಾತ್ಮನಾ ನ ಪರಮಾತ್ಮತಯಾ ಸ್ಮರಂತ್ಯೋ ನಾರ್ಯೋ ಗತಾಃ ಪರಮಹಂಸಗತಿಂ ಕ್ಷಣೇನ । ತಂ ತ್ವಾಂ ಪ್ರಕಾಶಪರಮಾತ್ಮತನುಂ ಕಥಂಚಿ- ಚ್ಚಿತ್ತೇ ವಹನ್ನಮೃತಮಶ್ರಮಮಶ್ನುವೀಯ ॥8॥
ಅಭ್ಯಾಗತಾಭಿರಭಿತೋ ವ್ರಜಸುಂದರೀಭಿ- ರ್ಮುಗ್ಧಸ್ಮಿತಾರ್ದ್ರವದನಃ ಕರುಣಾವಲೋಕೀ । ನಿಸ್ಸೀಮಕಾಂತಿಜಲಧಿಸ್ತ್ವಮವೇಕ್ಷ್ಯಮಾಣೋ ವಿಶ್ವೈಕಹೃದ್ಯ ಹರ ಮೇ ಪವನೇಶ ರೋಗಾನ್ ॥9॥
Browse Related Categories: